For di novèmber 2026 te ku yüni 2027, Fundashon Bicentini ta organisá e proyekto ‘Di Liga di Nashonnan pa Kopa di Oro 2027 pa Mucha’. 41 pais, 157 partido, i un soño kompartí.
Skolnan básiko i barionan riba Kòrsou lo tin e oportunidat pa siña i krese huntu pa medio di futbòl, kultura, i aktividatnan den komunidat. E sorteo ofisial ta tuma lugá awe djaluna 9 di november pa 9:00 mainta. Durante e sorteo aki, e skolnan básiko i barionan partisipante lo keda elegí ku un di e 41 paisnan di Concacaf cu ta partisipá den e real Nations League i Gold Cup.
Por sigui e sorteo live via MAINTA. Curaçao su klasifikashon históriko pa Mundial dia 19 di novèmber 2025, a sirbi komo inspirashon pa un inisiativa spesial. Despues ku Blue Wave a klasifiká pa e Kopa Mundial di FIFA 2026 pa promé bia, un soño nobo a surgi pa Remko Bicentini: un Kopa di Mundu pa muchanan riba Kòrsou. Asina e Mundial di Fundashon Bicentini 2026 pa Mucha a nase.
Ku 48 pais partisipante, representá pa skolnan básiko, barionan i distritonan, e torneo no a enfoká solamente riba futbòl pero tambe riba koperashon, amistat i desaroyo personal. “E muchanan a deskubrí ku nan mundu ta mas grandi ku nan mes kaya, bario òf distrito. Nan a wòrdu introdusí na otro paisnan, kulturanan i tradishonnan i a siña tokante tópikonan importante manera salú, konekshon, partisipashon i inklushon,” Bicentini ta bisa. Ku e proyekto nobo, e aserkamentu sosial aki ta wòrdu kontinuá.
Mas ku djis futbòl
“Nos ta kere ku futbòl ta muchu mas ku djis un wega. E ta trese mucha i adulto huntu. Nos ta siña muchanan traha huntu, yuda otro, respetá otronan, i kere den nan mes,” Bicentini ta bisa. Tur skol básiko òf distrito partisipante ta representá un di e 41 paisnan di CONCACAF. Banda di partidonan di futbòl, e muchanan ta sera konosí ku e kultura i tradishonnan di nan pais. Nan ta traha tambe riba kuater tema sosial:
Salú: siña tokante nutrishon saludabel, ehersisio i un estilo di bida saludabel;
Konekshon: traha huntu, yuda otro, i skucha otro;
Partisipashon: enbolbí, kompartí ideanan, i ta enbolbí den desishonnan;
Inklushon: dunando tur hende e chèns pa partisipá, sin importá nan antesedente òf
talento.
Mucha di diferente edat ta hunga huntu den un tim. Esaki ta krea amistatnan nobo i ta siña nan kon pa dil ku gana i pèrdè, responsabilidat i rèspèt.
Konstruyendo Huntu
E meta prinsipal di Fundashon Bicentini ta pa laga muchanan deskubrí ku nan posibilidatnan ta ekstendé mas leu ku nan propio ambiente di biba. “Mucha tin talento, por probechá di oportunidatnan, i konstruí nan propio futuro. Futbòl ta un idioma ku tur hende ta komprondé. Ta hustamente dor di hunga huntu ku muchanan por siña, krese i soña,” Bicentini ta enfatisá. For di novèmber 2026 te ku yüni 2027, e partisipantenan lo eksperensiá un periodo yen di futbòl, dibertishon, eksperensianan nobo i amistat.












