RUNNING BLIND na Kòrsou: un paso nobo pa atletismo pa tur hende !

Picture of Deporte Korsou
By Deporte Korsou
November 22, 2026
Share:

RUNNING BLIND na Kòrsou: un paso nobo pa atletismo pa tur hende !

Kooperashon entre Curaçaose Atletiek Bond, Atletiekunie, Fundashon Pro-Bista i OWCS ta habri perspektivanan nobo pa deportistanan ku limitashon visual.

WILLEMSTAD, KÒRSOU – Di diabièrnè 13 i diasabra 14 di novèmber 2026, inklushon, deporte i oportunidat igual tabata sentral durante e presentashon i workshop práktiko tokante Running Blind. E aktividatnan aki a tuma lugá den kolaborashon ku Atletiekunie di Hulanda.

Pa e okashon spesial aki, nos tabatin e honor di risibí tres eksperto for di Hulanda: Joep Janssen, Sven Karel i Zara Temmink. Nan tin konosementu i eksperensia amplio riba tereno di para-atletismo i e akompañamentu di deportistanan ku un limitashon.

Konosé Running Blind

Durante e presentashon di diabierna 13 di novèmber na Bon Bini Business Center, e partisipantenan a konosé e konsepto Running Blind. E inisiativa aki ta duna hende ku ta siegu òf tin limitashon visual e posibilidat pa partisipá aktivamente den kareda, huntu ku un persona ku por mira, konosí komo un ‘guide’ òf guia.

Djasabra 14 di novèmber, e konosementu ku a wòrdu kompartí a keda apliká den práktika durante un workshop na Stadion Ergilio Hato (SDK). E partisipantenan a haña oportunidat pa eksperensiá personalmente kon e koperashon entre un koredó i su guia ta funshoná i kua téknikanan di kompañamentu ta importante.

E seshonnan no solamente a ofresé informashon, sino tambe e oportunidat pa eksperensiá kon deporte por bira mas aksesibel pa tur hende.

Amplio partisipashon di komunidat di Kòrsou

Un elemento sumamente balioso tabata e partisipashon di diferente organisashon lokal. E Ministerio di Enseñansa, Siensia, Kultura i Deporte (OWCS) tambe tabata envolví den tur dos aktividat. Diferente funshonario di e ministerio a partisipá ku hopi entusiasmo den e seshonnan i a konosé e posibilidatnan ku Running Blind ta ofresé.

Ademas, Fundashon Pro-Bista tabata presente durante tur dos enkuentro, huntu ku su klientenan, akompañantenan i boluntarionan. Nan presensia i partisipashon aktivo a subrayá e importansia di inisiativanan kaminda hende ku limitashon visual mes ta pará sentral.

Tambe entrenadónan di Curaçaose Atletiek Bond (CAB) tabata presente pa konosé e konsepto i investigá kon Running Blind por wordu introducí i desaroyá lokalmente.

Jacinto de Jesus

Curaçaose Atletiek Bond ta wak dilanti

Curaçaose Atletiek Bond ta spera pa por introducí Running Blind den su programa di oferta deportivo den un futuro serkano. E meta ta pa duna hende ku limitashon visual posibilidatnan konkret pa partisipá den kareda di un manera sigur, agradabel i bou di guia. E desaroyo aki ta konfirmá un biaha mas ku atletismo ta di bèrdat e deporte mayó, ku diferente disiplinanan i posibilidatnan pa tur hende, sin importá edat, orígen òf limitashon.

Huntu nos ta trahando pa un deporte inklusivo

E aktividatnan aki a bira posibel tambe grásias na e kooperashon ku Atletiekunie i e dedikashon di e ekspertonan Hulandes Joep Janssen, Sven Karel i Zara Temmink. E konosementu, eksperensianan i kontaktonan ku a wòrdu akumulá ta forma un base balioso pa sigui desaroyá kooperashon entre sektor deportivo, instansianan gubernamental i organisashonnan sosial.

Ku Running Blind nos ke kontribuí na un ambiente deportivo kaminda tambe hende ku limitashon visual ta haña e oportunidat pa deskubrí i desaroyá nan kapasidatnan deportivo.

Pasobra deporte ta pa tur hende. Ningun hende mester keda para na banda!

Huntu nos ta hasi atletismo aksesibel pa tur hende na Kòrsou.

TAGS:

PROUDLY SUPPORTED BY

Deporte Kõrsou Team

We are passionate about Curaçao sports. Bringing you the latest news, radio shows, interviews and memories that connect generations.

Deporte Kõrsou Radio Show

With your host live from studio

RELATED STORIES

LATEST INTERVIEWS

album-art

00:00

FROM THE PAST