23 hungadó di selekshon di Futbòl di Korsou ku lo topa Barbados na Kòrsou ta konosí i mas detaye di nos selekshon femenino
PREPARASHONNAN TA KONTINUÁ PA NOS SELEKSHON NASHONAL ENFRENTÁ BARBADOS DIA 5 DI YÜNI 2024 AKI NA KÒRSOU!
SERA KONOSÍ KU E HUNGADÓNAN DI NOS SELEKSHON!
WILLEMSTAD - Preparashonnan ta kanando den gran forma pa nos promé partido di kualifikashon pa Mundial di FIFA ku lo tuma lugá dia 5 di yüni 2024 den Stadion Ergilio Hato pa mitar di 8 di anochi. Durante nos promé partido nos lo topa Barbados pa seguidamente nos biaha pa Aruba kaminda nos lo enfrentá Aruba dia 8 di yüni den Centro Deportivo Guillermo Prospero Trinidad pa 8’or di anochi.
Despues ku nos ‘bondscoach’ sr. Dick Advocaat huntu ku su staf tékniko a yega na un lista di 30 hungadó ku a forma parti di e pre-selekshon, awor nos ta publiká e 23 hungadónan ku lo representá Kòrsou durante nos kompromisonan pa kualifikashon pa Mundial.
Karchinan pa e partido aki ya ta disponibel na e puntonan di benta di kustumber i ta bayendo duru. Entrada general ta kosta fl.25 pa adulto miéntras mucha di 6 pa 12 aña i 60+ ta paga fl.15,-. VIP ta kosta fl.125,- ku bibida i ‘snacks’ inkluí.
Nos selekshon ta konta ku pueblo di Kòrsou kompletu pa apoyá i sostené nos selekshon nashonal durante e partidonan importante aki! Nos ta topa den Stadion Ergilio Hato dia 5 di yüni ora nos enfrentá Barbados...kumpra bo karchi trempan pa bo no keda afó!
PREPARASHONNAN TA KONTINUÁ PA NOS SELEKSHON FEMENINO SU PARTISIPASHON NA CARIBBEAN QUEENS FRIENDLY MATCHES 2024!
NOS HUNGADÓNAN TA KONOSÍ!
Tiki tiki pero sigur e ora 0 ta yegando pa nos selekshon femenino senior su partisipashon na e Caribbean Queens Friendly Matches 2024 kaminda Kòrsou, Aruba i Trinidad & Tobago lo enfrentá otro di 28 di mei pa 3 yüni 2024. Tur partido lo tuma lugá 7’or di anochi den Stadion Rignaal ‘Jean’ Francisca.
Nos selekshon tin vários luna ta praktiká i preparando pa saka kara di Kòrsou. Un grupo di 22 hungadó ta forma parti di nos selekshon nashonal femenino senior. E hungadónan aki ta hungadónan áktivo di nos Kampionato Femenino pero tambe tin 8 hungadó residensiá den eksterior ku lo bin pa reforsá nos selekshon.
Nos selekshon ta wòrdu dirigí pa sr. Dean Gorré ku ta wòrdu asistí pa sr. Raúl Triana Gonzalez Ku Heinrich Roojer i sr. Pablo Alomá Mark komo entrenadó di portero. Sra. Denice Linger Berggraaf i sra. Laicam How Coeriel ta e masahistanan miéntras dòkter Eartha Helstone tambe ta kompañá nos selekshon. Sra. Jadira Laaf ta enkargá ku e materialanan di nos selekshon, e ‘team manager’ di nos selekshon ta sra. Christine Davelaar i e hefe di delegashon ta sra. Sharetti Bryan, miembro di direktiva di FFK.
Karchinan pa e partidonan di Kòrsou ta kosta fl.10,- pa adulto miéntras mucha di 6 pa 12 aña i 60+ ta kosta fl.5,-. Tambe por kumpra un pakete di karchi ku tur e 4 weganan di Kòrsou na balor di fl.35,- pa adulto i fl.15,- pa mucha di 6 pa 12 aña i 60+. E karchinan lo ta disponibel na e lokètnan di stadion un ora promé ku kada partido inisiá.
Preparashonnan ta kontinuá pa nos selekshon femenino senior su próksimo partidonan di e Caribbean Queens Friendly Matches 2024 ku lo tuma lugá di 28 di mei pa 3 di yüni 2024 aki na Kòrsou.
Pueblo di Kòrsou ta keda kordialmente invitá pa bin mira kiko tur nos selekshon femenino tin aden, nos damanan ta wardabo!
JOSHUA BRENET TA BIRA ELEGIBEL PA FORMA PARTI DI E SLEKSHON NASHONAL DI KÒRSOU!
Dick Advocaat, ‘bondscoach’ di e selekshon nashonal di Kòrsou, por hasi eskoho pa e defensa Joshua Brenet di 30 aña di edat pa forma parti di nos selekshon nashonal. Joshua Brenet a militá ku e selekshon di Hulanda durante 2 partido den luna di novèmber 2016, kontra Belgika durante un partido amistoso ku skor di 1-1 i kontra Luxemburg durante Mundial ku skor di 3-1 pa Hulanda.
E resultado despues di un deliberashon entre e presidente di FFK Ramiro Griffith i e tribunal di futbòl di FIFA ta ku entrante 14 di mei, Joshua ta liber pa kambia di nashonalidat pa futbòl. Joshua ku a forma parti di PSV, Hoffenheim, Vitesse i por último tabata parti di FC Twente a keda pone riba ‘non actief’ despues di hañ’é envolví ku hustisia debí na kore outo na 2 okashon sin un ‘rijbewijs’ bálido.
Presidente Ramiro Griffith a duna di konosé; ‘Nos ta di opinion ku Joshua mester haña un segundo oportunidat i p’esei nos a enkaminá e proseso pa e por forma parti di nos selekshon nashonal. Awor ta keda na Dick Advocaat pa tuma e desishon ku e lo ke pa Joshua forma parti di nos selekshon. ’
Manera ta konosí Kòrsou lo tin su partidonan di kualifikashon pa Mundial di FIFA riba dianan 5 yüni kontra Barbados na kas i despues kontra Aruba aya na Aruba dia 8 di yüni 2024.
Nos ‘bondscoach’, Dick Advocaat lo publiká e lista definitivo pa e 2 enkuentronan aki riba 20 di mei próksimo.
Keda pendiente pa mas informashon...
KÒRSOU VS BARBADOS 5 YÜNI PRÓKSIMO DEN STADION ERGILIO HATO!
KARCHINAN TA DISPONIBEL!
Despues ku nos selekshon nashonal maskulino ta tin un tremendo ‘trainingskamp’ 2 luna pasá na Turkia komo preparashon pa nos partidonan di kualifikashon pa Mundial di FIFA den luna di yüni 2024, preparashonnan ta kontinuá pa e partidonan mes mes, ku ta na kaminda.
Nos promé enkuentro lo ta dia 5 di yüni próksimo kontra Barbados aki na Kòrsou den Stadion Ergilio Hato pa mitar di 8 di anochi. Seguidamente nos selekshon lo biaha pa Aruba kaminda nos lo enfrentá Aruba dia 8 di yüni 2024 den Centro Deportivo Guillermo Prospero Trinidad pa 8’or di anochi.
E karchinan pa e partido entre Kòrsou i Barbados lo ta na benta entrante mañan, 8 di mei na tur punto di benta. Entrada general pa e partido aki ta kosta fl.25 pa adulto miéntras mucha di 6 pa 12 aña i 60+ ta paga fl.15,-. VIP ta kosta fl.125 ku bibida i ‘snacks’ inkluí.
%20copy.jpg)
