4 wega final Torneo Boy Constancia awe djadumingu 30 di mart
WILLEMSTAD - Torneo Boy Constancia ta den su último wikènt. Djasabra tabatin e último weganan di e buelta regular i djadumingu ta e último dia ku final den 4 kategoria. Djasabra Los Amigos a gana Lions, despues SDKK a laga Polis den tereno. Segidamente Raiders a gana Sluggers i Treasure a gana Golden Girls.
Djadumingu 10.00 final 60+, Los Amigos vs Lions, 12.00 final Komersial 40+ SDKK vs CRU, 14.00 final 50+ Jandoret Raiders vs Pitufos, 16.00 Treasure New Era vs Unidos.
Nos Goso a Mas Goso 10 pa 4 den The Diamond Stars League
WILLEMSTAD – The Diamond Stars League lo sigi e wikènt aki na Sam Bunting Ballpark. Djasabra e ekiponan ruman Nos Goso a gana Mas Goso 10 pa 4. E veteranísimo picher di Nos Goso Carlientje Cleopa a pidi bala kontra su ekipo ruman i gana luchando te den ultimo inning. Nos tin resultado di e dos weganan di wikènt pasá.
RESULTADONAN
Rising Phoenix 7, Nos Goso 1
Rising Phoenix a dal 11 hit i hasi 2 eror. Marie Windster tabata picher ganadó i Josmaye Chirino a bati di 3-3. Nos Goso a konektá 4 hit i hasi 1 eror. Carlientje Cleopa tabata e picher pèrdèdó i Miriela Carlo e mihó batiadó, bayendo di 2-2.
Treasure 7, The Fighters 0
Treasure a gana The Fighters ku skor di 7-0. No tabatin mas sifra di e wega aki.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bondia. Torneo Hope ta sigi den wikènt ku varios wega, i ku dos wega. Pa resumí djabièrnè tin 2 wega, djasabra 14 wega i djadumingu 13 wega repartí riba terenonan A i B di Van Engelen Ballpark. Djasabra entre 6 i 9 pm tin aktuashon di Highway Band na Van Engelen Ballpark naturalmente. Bar i kushina lo ta bon surtí. Torneo Hope ta organisá pa FDDK ku asistensia di The Greatest Umpire & Scorers Crew.
* * * * *
Awe nos tin resultadonan di Diamond Stars League ku ta tumando lugá na Sam Bunting Ballpark. E kampionato a kuminsá for di djabièrnè 14 di mart na e parke menshoná. Djabièrnè siman pasá no tabatin wega debí na elekshon pa Staten di Kòrsou. Djasabra Rising Phoenix a gana di Nos Goso fásil ku skor di 7 pa 1. Den e otro wega Treasure New Era a dal The Fighters 7-0. Un hungadó di The Fighters a leshoná i no tabata mas hungadó pa remplasá.
* * * * *
Torneo Boy Constancia organisá pa Pitufos tin 8 wega e wikènt aki. Djasabra tabatin 4 wega ku falta di e buelta regular i djadumingu tin 4 final sigí. Nos tin e skema kompletu. Djasabra 29 di mart: 10.00 Lions – Los Amigos, 12.00 Polis vs SDKK, 14.00 Jandoret Raiders – Sluggers, 16.00 Treasure – Golden Girls, 18.00 Marlins – Jaws (amistoso). Djadumingu 10.00 final 60+, 12.00 final Komersial 40+, 14.00 Final 50+, 16.00 Final Femenino. Despues di wega tin entrega di premio i lo tin un mini band sorpresa riba djadumingu. Riba djasabra i djadumingu lo tin animashon di DJ Dud.
* * * * *
Moveshonnan ta sigi pa Torneo Lions ku ta nèt promé ku kampionato Liga 60 na Frank Curiel Ballpark. Torneo Jaws ta promé ku Torneo Lions. Torneo Jaws ta start djasabra 5 di aprel i ta terminá djadumingu 13 di aprel. E torneo ta konta ku partisipashon di ekiponan di Liga 60. Ganadónan di e dos pulnan lo topa otro den final i e number 2nan lo hunga pa di 3 lugá. Number 3nan lo hunga un wega amistoso riba e fecha final pa train i alabes yena e skema. Aña pasá ekipo Nos Tambe Por tabata kampion miéntras na 2023 tabata ekipo Pitufos ku a bira kampion. Ekipo Nos Tambe Por tabata pendiente un torneo di un wikènt dianan 19 i 20 di aprel na Frank Curiel Ballpark. Ta trata di un torneo di Sòftbòl kombiná ku dominó pa ekiponan di 60+.
* * * * *
Ban pa Little League un ratu. Trainingnan di selekshonnan a sigi den full swing. Resientemente nos tabatin e kuerponan tékniko di Liga Pabou i nos tabata pendiente pa e kuerponan tékniko di Liga Pariba i Liga Willemstad. Dia 22 di aprel ta start ku play-off di Intermediate, Minor i Little ku lo tuma lugá den Stadion Post 6. Junior i Senior lo start dia 30 di aprel den Tio Daou Ballpark. Manera ya ta ampliamente konosí torneonan di Karibe di Senior i Little lo tuma lugá na Kòrsou. Senior ta di 22 pa 29 di yüni den Tio Daou Ballpark, miéntras Little League lo ta di 4 pa 12 di yüli den Stadion Post 6. Kòrsou lo ta di fiesta e aña aki rekordando ku na 2001 a kuminsá ku sponsering di RBTT ku despues a bira RBC i éksitonan a kuminsá einan. Na 2001 nos a kuminsá bayendo Serie Mundial di Little i na 2022 nos a logra e promé título di Mundu den kategoria Senior.
* * * * *
RBC spònser number 1 di Little League lo firma kontrakt ku Curacao Little League Foundation i direktiva di liganan medio aprel. RBC lo tei tambe durante e serinan di Karibe ku lo tin na Kòrsou. Naturalmente gobièrnu di Korsou tambe lo ta presente ku Little League den e dianan benidero. Nos lo topa den e wikènt na Torneo Hope i wikènt di Torneo Boy Constancia na Post 6. Te djaluna ku Poder di Dios.
