Gai Lihe a entregá unifòrm na ekipo Mas Goso
WILLEMSTAD- Djadumingu 23 di mart den un tremendo ambiente i original tabatin entrega di unifòrm na ekipo Mas Goso. E entrega di unifòrm a tuma lugá na kas di presidente di e organisashon.
A kologá tur unifòrm na waya na kas di presidente i despues simbólikamente Gai lihe a entregá unifòrm nobo na Mas Goso. Awor famia Goso kompletu ta bou di un dak. Gai Lihe ta spònser Mas Goso, Tur Goso i Nos Goso. Pabien na e ekipo di Mas Goso i un danki di kurason na Gai lihe.
Torneo Boy Constancia ta sigi djasabra i djadumingu
WILLEMSTAD - Torneo Boy Constancia ta den su último wikènt. Djasabra tin e último weganan di e buelta regular i djadumingu ta e último dia ku final den 4 kategoria.
Djasabra 29 di mart: 10.00 Lions – Los Amigos, 12.00 Polis vs SDKK, 14.00 Jandoret Raiders – Sluggers, 16.00 Treasure – Golden Girls. 18.00 Marlins – Jaws (amistoso). Djadumingu 10.00 final 60+, 12.00 final Komersial 40+, 14.00 final 50+ i 16.00 Final Femenino.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bon dia. E torneo ku ta hala mas atenshon ta naturalmente Torneo Hope ku tin wega tur djasabra i djadumingu. Den añanan anterior tabatin wega tur djabièrnè i djaweps tambe na algun okashon. Mi ta kere ku e organisadónan a laga e dianan menshoná pa e momentu ku mester hunga un wega ku a keda kanselá pa kualke motibu. Ultimo ora nos a risibí skema nobo di e wikènt aki ku kambio i dos wega riba djabièrnè awor.
* * * * *
Djasabra den 40+ Flow a gana di Aqualectra 4 pa 2, pero parse ku Aqualectra a protestá e wega. Djadumingu Aqualectra mes atrobe riba tereno a gana di MCB ku skor di 6-4. Den e kategoria Femenino ku tin solamente 4 tim ku ta Onderwijs, CITCO, CMC/ADC.MNO i SBAB, tabatin solamente un wega. CMC a logra gana di SBAB ku skor di 4-1. Den COED si tabatin basta wega den wikènt. Den COED tin 15 tim repartí den 3 pul.
* * * * *
Ekipo Mas Goso ku ta kompetí fuerte den Diamond Stars League a risibí unifòrm serka nan spònser Roxiene Barbolina, alias Gai Lihe wikènt pasá. Gai Lihe un hòmber trahadó i servisial pa basta aña kaba ta spònser e organisashon Nos Goso, Mas Goso i Tur Goso. Gai Lihe ta yuda Royal Scorpions tambe i Santa Rosa Memories. Un gran fanátiko di Beisbòl i Sòftbòl Veterano ku semper tin sikiera algun minüt pa kombersá riba e desaroyonan di Sòftbòl i Beisbòl ku su amigunan durante su oranan di trabou aya na Gai Lihe Tire Service na Seroe Fortunaweg nèt na subida di Seroe Fortuna.
* * * * *
Nos a risibí resultado di tur e weganan di Torneo Boy Constancia organisá pa Pitufos ku a tuma lugá wikènt pasá den Stadion Post 6. Den wega di Liga 60 Lions a dal Pitufos duru ku skor 15-0. Parse ku Lions a presentá bon reforsá ku vários hungadó nobo. Den otro wega CRU despues di tabata pèrdí 7 pa 2, a bin bèk den wega i gana Polis ku skor 9-8. Jandoret a gana Pitufos 10-6 den e kategoria di 50+. Den e último wega di djasabra Treasure a gana Unidos 6-4. Djadumingu mainta Los Amigos den 60+ a dal Pitufos 10-2, Prison (SDKK) a gana CRU pèrtá 6-5 den 40+ Soshal Sòftbòl. Pitufos a gana Sluggers 8-5. Unidos a gana Golden Girls 8-6.
* * * * *
Entrega di premio pa loke ta trata Amstel Bright Premier Cup a keda aplasá pa dos siman. E mail ta sita lo sigiente. “ Motibu di nos mail ta pa informá boso ku pa motibunan logístiko i fuera di nos alkanse nos ta haña nos ta aplasá e entrega di premio ku originalmente tabata 22 di mart 2025 ku 2 siman. Sobra detayenan manera dia, orario i sitio nos lo manda den transkurso di otro siman pa boso tur. Nos diskulpa pa e tardansa i nos lo mantené boso informá.” Esei ta mail di dirigentenan di Cicoza ku ta organisadó di Amstel Bright Premier Cup 2025.
* * * * *
Nos a bai bèk den tempu di Torneo Hope pa loke ta trata entrega di premio. Na 2012 MCB, e tempu ei, organisadó a sera e torneo ku fiesta na WTC i a yama e fiesta aki ‘La Fiesta ’ ku aktuashon di Dreams, ERA i Cache Royal (direktamente for di Hulanda). Tabatin ekiponan nominá pa mihó fanatikada Maskulino, mihó fanatikada Femenino, Best Sportsmanship Femenino i Maskulino. Esnan nominá e tempu ei 13 aña pasá tabata ADC, SBAB, Refineria Isla i SOAB. Ekiponan nominá pa mihó fanatikada Maskulino : Apna/CHB, SOAB,UNA i Ernst & Young. Ekiponan nominá pa best sportmanship Femenino : Douane/Selikor, MCB, UAC i Kustwacht. Ekiponan nominá pa best sportmanship Maskulino: Refineria Isla, UTS/TDS, Centrale Bank/Deloitte i Banco di Caribe. Algun di e empresa nan ei no tei mas òf a kambia nòmber, ‘Recordar es Vivir’ Torneo Hope. Nos tin hopi detaye i pòtrèt di Torneo Hope for di tempu di Torneo SBAB na 2007. Nos ta keda te aki pa awe. Te mayan ku Poder di Dios.
