25 biyardista a partisipá i e tour tabata patrosiná pa Montana Bierhuis i House of Billiard Play
WILLEMSTAD.– Otro tremendo evento mensual a keda organisá pa Federashon Biyar Korsou. E biaha aki tabata turno di e disiplina di bola 9. 25 biyardista a partisipá i e tour tabata patrosiná pa Montana Bierhuis i House of Billiard Play, kual tambe tabata esenario di e torneo. Bataya tabata fuerte entre e partisipantenan i tambe ta tin vários sorpresa. E último kuater hungadónan ku a keda den buèlta di ganadó tabata Jeffrey Nieuwenhuijzen ku a gana di Alun Huang 7 pa 4 i Sybren Boekhoudt ku a bai ku e viktoria kontra Fyrich Benschop 7 pa 2.
Jeffrey i Sybren ta hunga e promé semi final i ta Jeffrey ta gana 7 pa 2 i pasa pa final. Den buèlta di pèrdèdó Fyrich Benschop ta gana Isidro Noor 7 pa 4 i Gemajel Rol tambe ta gana Alun Huang 7 pa 5. Tremendo demonstrashon di bon biar ta tin entre Rol i Benschop, pero tabata Rol ku ta sali viktorioso 7 pa 6. Asina aki tambe e ta bai topa Sybren Boekhoudt den e di dos semi final i atrobe ku skor pèrta 7 pa 6, Rol ta gana i ta pasa pa final.
Den e enkuentro final e number 1 di Kòrsou sin duda algun, ta demostrá su superioridat i ta gana Rol, 8 pa 6 i titulá kampeon. Resultadonan final empata na puesto 5 Isidro Noor i Alun Huang, puesto 4 Fyrich Benschop, puesto 3 Sybren Boekhoudt, sup kampeon Gemajel “Jimmy” Rol i kampeon Jeffrey Nieuwenhuijzen. Febiko ta manda un felisitashon speshal na Fyrich Benschop, Isidro Noor i Alun Huang, kendenan a demonstrá bon nivel di wega i a logra finalisá den e promé 5 puestonan. Tambe e federashon ta pidi pa nan sigui riba e bon kaminda i pa fin di ougùstùs ta turno pa tour di bola 10.
