Amstel Bright Premier Cup 2025 ta start djasabra ku partisipashon di 79 ekipo
WILLEMSTAD- Amstel Bright Premier Cup organisá pa Cicoza ta start djasabra 25 di yanüari na Van Engelen Ballpark ku partisipashon di 79 ekipo. Un kantidat rèkòrt pa loke ta trata Amstel Bright Premier Cup.
E torneo lo terminá 9 di mart ku ta e djadumingu despues di marchanan di Karnaval. Tantu djasabra komo djadumingu tin weganan riba tereno A i B. Lo ta liber riba fecha di Marcha Hubenil i e wikènt di Gran Marcha no tin wega. Finalnan lo ta dia 9 di mart na Van Engelen Ballpark manera menshoná i finalnan lo tuma lugá riba tereno A. Tene kuenta ku tur dos parke tin lus i lo hunga weganan riba tereno B tambe den oranan anochi.
Tin 4 ekipo di Liga 50, 4 di Liga 60, 4 di Liga 40, 4 di Modified, 6 ekipo Slowpitch Latino, 20 ekiponan Komersial Maskulino, 20 ekipo di Soshal Open, 9 Co-Ed Corporate, 6 COED open. Hopi ekipo mes mes e aña aki den Amstel Bright Premier Cup. Ta pidi pa ekiponan wak e skema nobo ku a drenta djaweps den oranan di mèrdia.
Jandoret Raiders a selebrá 29 aña di eksistensia i habri aña
WILLEMSTAD – Jandoret Raiders a selebrá 29 aña di eksistensia. E ekipo a habri aña tambe riba mesun fecha ku tabata dia 15 di yanüari. Hungadó, dirigente i fanátikonan di e ekipo a bai misa na Kapèl San Miguel na Boca Sami, pa despues sigi pa un enkuentro ameno huntu ku fanátikonan na nan station na Jandoret. Pa otro aña Jandoret Raiders lo kumpli 30 aña di eksistensia i lo selebrá esaki en grande. Ekipo Jandoret Kampion di Beisbòl Veterano 5 aña sigí den 40+ i 6 biaha den 50+ den apénas 12 aña den Beisbol Veterano. Jandoret a start na 1996 komo ekipo di Slowpitch i despues di vários éksito i título a pasa pa Beisbòl Veterano na 2012.
MAS INFOMASHON DI SÒFTBÒL I BEISBÒL
Fanátikonan di Deporte Kòrsou bon dia i felis wikènt. Awe, djasabra, Amstel Bright Premier Cup ta start na Van Engelen Ballpark. Ekiponan den e diferente kategorianan lo partisipá den e torneo i ekiponan di 60 i 50 lo hunga den e oranan tempran di dia sigí pa ekiponan di 40+ i Modified Slowpitch i finalmente ekiponan Soshal Maskulino i COED. Skema a sali for di djamars den oranan di anochi i tur ekipo ta kla pa drenta akshon. Amstel Bright Premier Cup ta organisá pa ekipo Cicoza ku ta kampion Kopa ABC&S pa loke ta trata e hóbennan. Cicoza a bira supkampion den Liga Amstel i den Liga 40. Cicoza ta yegando 49 aña di eksistensia i ta rumbo pa 50.
* * * * *
Tur djasabra i djadumingu tin weganan riba tereno A i B. Dia di Marcha Hubenil i e wikènt di Gran Marcha no tin wega. Finalnan lo ta dia 9 di mart na Van Engelen Ballpark riba tereno A i B. Meskos ku aña pasá Amstel Bright Premier Cup lo repartí solamente pa e ekipo kampion di kada kategoría un premio estilo “CASH BACK” te un máksimo di 1000 florin. Ke mèn ekiponan por gana mil florin, esei ta dependé kuantu nan gasta na bar naturalmente. Nos lo tei ku resultadonan i pòtrèt.
* * * * *
Den Liga 60 nos a mira ekiponan manera Jaws, Los Amigos, Nos Tambe Por i Nos Power. Despues ku Nos Tambe Por no a yega final den e Amstel Bright Premier Cup e ekipo a logra gana tur torneo i kampionatonan ku nan a hunga. Den Liga 50 tin ekiponan Jandoret Raiders, Ban Serio, Jaws i Sluggers. Den Liga 40 tin ekiponan manera Jaws, Twisters ets.
* * * * *
Ekiponan grandi pa loke ta e parti Soshal/Komersial tei atrobe manera Aqualectra, MCB, Selikor, Onderwijs, Coca Cola, FDDK, Brandweer, SBAB, CITCO, KPC, Selikor, Belastingdienst, Building Depot ets. E ekiponan di Bario i Soshal Open ta The New Radiator, Bala Brothers, Chonchies, Fire Boys, Among Us i Bòmbòshi. Ta spera hopi ambiente i moveshon durante 6 siman den Amstel Bright Premier Cup ku ta e úniko torneo ku ta parti plaka kèsh na final di e kompetensia.
* * * * *
Ekipo Curacao Goats a sali djabièrnè pa Serie de Las Americas ku lo tuma lugá na Nicaragua di 24 pa 30 di yanüari 2025. Ekipo Curacao Goats naturalmente a reforsá ku hungadónan di otro ekiponan. Pa loke ta trata hungadónan ku ta hunga den e kompetensia lokal nos a mira Siamani Boekhoudt i Nigel Calmes den e pichernan. Jonathan Schoop, Darren Seferina, Dudley Leonora i Kevin Josephina ta hungadónan di Beisbòl lokal. Nos ta referí aki na nos kompetensia Dòbel A. E kompetensia Serie de Las Americas ta un kompetensia ku esnan ku a kompetí den kampionato di Curacao Professional Baseball. Nos Pais Television lo transmiti e weganan ku un crew enkabesa pa Gino Valeriaan Alexnader Macaja huntu ku Hensley Josephina, Jair Quant, Carl Ruiter i Jeffrey Martina.
* * * * *
E kuerpo tékniko ta formá pa Hainley Statia komo manager, bench coach ta Carlos Pinedo. Coach di picheo ta Gustavo de Jongh, coach di tersera base ta Gionelo Jansen. Bullpen Coach Jonathan Ferreira. Demas coachnan ta Sorick Liberia, Jeremy Lucas, Richenel Eleonora i Rodney Michel. Curacao Goats mihó bisá e selekshon di Kòrsou mester a lucha pa yega na e parti finansiero pa yega Nicaragua i mester bisa ku e parti di e sèn ta motibu prinsipal ku e selekshon lo yega lat i lo hunga double header djaluna, ku otro palabra e wega di awe, djabièrnè 24 di yanüari kontra Colombia lo tuma lugá djaluna. Segun informashon di presidente di FEBEKO Jedrek Magdalena, selekshon di Colombia tambe lo mester a yega lat.
* * * * *
En todo kaso un lista di hungadó bon balansá ku bon refuerso den picheo ku hungadónan manera Kevin Kelly, Juan Carlos Sulbaran, e Merikano Cody Mincey ets. Djadumingu awor ta start ku Liga Soraida Juliana Curacao Little League Softball. E apertura lo tuma lugá na Muizenberg Ballpark i lo start 10’or i ekiponan mester yega 9.30’or. Curacao Little League Softball tei for di aña 2002. Nos ta keda te aki pa awe i te mayan ku Poder di Dios.
