Final di Minor Trai Seru vs Santa Maria i final di Little ta Aruba Rincones kontra di Trai Seru den final Torneo FABB djadumingu 19 di yanüari
WILLEMSTAD - Trai Seru vs Santa Maria den Minor pa 1'or pm i Trai Seru kontra Aruba Rincones pa 3'or pm den Little den final Torneo FABB 19 di yanuari 2025. Pa 1’or pm lo tin un wega amisotoso entre Montab i Minor Aruba na Velt B. Brievengat A topa ku Marchena for di 8.30 di mainta den un wega balido pa di 3 luga den Minor. Montanja Ariba i Santa aria lo hunga pa di 3 luga den den Little League. Montanja Ariba a pèrdè 1-0 kontra Rincones di Aruba den Little League i Trai Seru a gana Santa Maria ku skor di 5-4.
STANDING
Standing Torneo FABB Pul A Little
Trai Seru 3 – 0
Jandoret 2 – 1
Brievengat 1 – 2
St. Michiel 0 – 3
Standing Torneo FABB PUL B Little
Montaña Ariba 4 – 0
Sta Maria 3 – 1
Marchena 2 – 2
Sta Rosa 1 – 3
Montab 0 – 4
Standing Torneo FABB Pul A Minor
Brievengat 3 – 0
Marchena 2 – 1
St Michiel 1 – 2
Montab 0 – 2
Standing Torneo FABB Pul B Minor
Trai Seru 4 – 0
Sta Maria 3 – 1
Sta Rosa 2 – 2
Jaguars 1 – 3
Tera Kora 0 – 3
* * * * *
MAS INFORMASHON DI BEISBÒL SÒFTB0L
Felis dia Felis siman. Nos a dal den un pòtrèt di Baranka ku a bira kampion na 2014 ganando e ekipo di Swift den final. Na 2015 Baranka a baha bai promé ku kampionato a terminá i ekiponan Rangers i Dalpega tambe a bula afó. Den e ekipo di Baranka tabatin Charlie Merite, Jefferdion Polonius, Djaka Ogenia, Rollin Eustatius, Indjan Ilario, Mark Anthony Gijsbertha (e gai largu ku tabata bati homerun so). Gilbert Henrietta, Emeric Agatha, Kenchi Ortega (QEPD), Julius Veeris, Luigi Virginia, Edmar Cornelia, Wilfred Reinita, Remey Janga, Urvin Martina i Stanford Landburg. Bon tim ku a stòp di hunga Sòftbòl den Liga van Engelen. Ta Indjan Ilario, Gijsbertha i Luigi Virginia a stòp, otronan a sigi den Slowpitch i Beisbòl Veterano. Urvin Martina ta pendiente pa djoin 60+ dia e kumpli 60 aña.
* * * * *
Torneo Wim Felicia lo tuma lugá di 2 pa 6 di yüli na Frank Curiel Ballpark. Wim lo kumpli 50 aña den Slowpitch i lo selebrá en grande ku partisipashon di ekiponan di Aruba, Boneiru, Kòsou i Hulanda tantu den 60+ komo 50+. Antes tabatin e torneo Dia di Bandera organisá pa Rudy Brunken i segun nos despues di Covid-19 e torneo no a sigi mas. Algun aña pasá tabatin Torneo Himno i Bandera na Aruba den luna di mart kaminda ekiponan di Kòrsou tabata partisipá den 60+ i 50+. Ekiponan di Kòrsou no ta partisipá na e torneo manera ántes. Torneo ABC&S di 60+ si a start na 2022 i ta kresiendo formal i ta tumando lugá den luna di òktober. E aña aki ta na Aruba e ABC&S 60 lo sigi i Hulanda ku tabata tei na Boneiru na 2024 bou di direkshon di Ron Stewart lo tei atrobe na Aruba den 2025.
* * * * *
By the way, ekipo Nos Tambe Por a manda un mensahe Loud & Clear ku no tin mas espasio pa hungadó nobo. Parse ku bastante hungadó di 60+ a solisitá pa bin hunga den Nos Tambe Por den 2025. Despues di deliberashon den direktiva a partisipá na hungadónan ku den 2025 no tin espasio pa mas hungadó. Nos Tambe Por tin algun hungadó riba radar pero pa 2026. Ta hungadónan ku ya ta kla kaba pa drenta. Na 2024 Nos Tambe Por a pèrdè 6 hungadó ku mesun tim i e kos a dal Nos Tambe Por duru i te awe e asuntu ei ta hasi doló. Nos tambe Por lo bai Amstel Bright Premier Cup, Torneo Jaws, Torneo Lions, Torneo ABC&S 60+ i naturalmente kampionato di 60+ di 2025.
* * * * *
Djaweps a start ku e torneo profeshonal di Beisbòl di Kòrsou pa despues move e sigiente siman pa Nicaragua pa Serie de las Americas. Presidente a bisa ku e sèn pa kompletá e biahe no ta adén ainda, pero lo kompletá e sèn i lo yega Nicaragua. Aki na Kòrsou Nos Pais Television tei pa transmití e Serie de Las Americas i e siman despues e Serie del Caribe. Kòrsou tin bon chèns den Serie de Las Americas ku ta ménos fuerte ku Serie del Caribe. Den Serie del Caribe nos tabatin bon aktuashon na 2023 i 2024 nos no a logra klasifiká pa final.
* * * * *
Hungadó i fanátikonan ta pendiente pa desishon di e apelashon di e protesta di Yesterday / Santa Rosa. Nos a drenta temporada di Karnaval ofishalmente siman pasá i pa loke ta trata deporte i weganan di anochi ta hopi kore kore lo bai tin, debí ku nos hendenan stima Karnaval. Siman di Festival di Tumba práktikamente no tin nada na Kòrsou ku esepshon di hotelnan ku ta organisá nan Happy Hour i Live Music pa turistanan. Nos ta spera basta amigu di deporte di Aruba ku lo yega pa Festival di Tumba.
Awe djadumingu 19 di yanüari tin e finalnan di Torneo FABB manera nos a skibi mas ariba,. Torneo dediká na Jurickson Profar ku ta pendiente pa firma un ora pa otro komo agente liber. Durante simannan nos tabatin hopi detaye di Jurickson Profar. Loke ta un dje logronan grandi di Jurickson e aña ku nos a entrevisté ku ta na 2008 ta e kampionato Mundial ku el logra ku Little League na 2004. Jurickson a konta nos ku ela gana hopi premio hungando Little League apesar ku Little League no tin masha premio individual. Lider di doblete na Puerto Rico, lider di homerun na Puerto Rico, hungadó mas balioso na Puerto Rico den Minor i kampion bate, tur na Puerto Rico den Minor na 2003.
* * * * *
Den Junior, hungadó mas balioso na Sint Thomas Virgin Islands, mas homerun na Sint Thomas Virgin Islands, mas kareda empuhá, kampion bate na Sint Thomas Virgin Islands, kampion picher torneo Creme de La Creme 2004, MVP torneo Creme de La Creme 2004. Premio estímulo Fundashon Kosecha ( E tempu ei ) kampion Homerun Derby torneo Creme de La Creme", Jurickson a konta 15 pasá. Simplemente un super estrea foi chiki.
* * * * *
Jurickson su hòbi tabata futbòl tempu di su tempu promé ku e firma profeshonal. E tabata gusta hunga futbòl mes . Jurickson tabata hunga den Genesis Boys ku tabata pertenesé na Jong Holland U-15. Jurickson tabata praktiká Atletismo tambe, pero e tabatin Beisbòl komo promé naturalmente. Hunga nintendo tempu e tabata mucha i gusta kuminda kriyoyo. Ata un parti hopi importante ku Jurickson a bisa nos na 2008.
* * * * *
Jurickson: "Mi parti mental ta hopi fuerte. Mi ta pensa ku e hendenan ei (e tim kontrali) no por gana mi. Mi sa di mi brasa, mi poder, mi fildeo i picheo, pero e parti fuerte di mi ta mental. Mi mensahe ta pa e hendenan den deporte sigui traha duru, traha duru tur dia i un dia lo bo logra. Hóbennan sigui traha duru, e deporte riba su mes ta dushi tambe. No hasi deporte pa basilá. Esnan for di deporte, djòin deporte. Ami ta pasando hopi dushi den deporte, konosé hopi hende i hopi pais." Jurickson den gran forma mes mes na aña 2008 den un entrevista ku nos. Dia 2 di yüli 2009 Jurickson a firma profeshonal i a subi MLB ku Texas Rangers. 3 aña despues ku apénas 19 aña ela dal homerun den su promé turno na bate kontra Zack McCalister di Cleveland. Sobra ta historia. Nos lo wak espasio pa sigi riba e hazañanan di Jurickson Profar. Torneo FABB 2025 ta dediká na Jurickson Profar i e torneo ta terminá djadumingu dia 19 di yanüari.
* * * * *
Torneo Hope 2025 ta na kaminda. Torneo Hope 2025 ta den man di FDDK i mr. Softball Curtly ‘Gino’ Valeriaan lo ta na kabes di e organisashon. Mester bisa ku Gino Valeriaan tempu di su tempu na MCB a trese un revelashon den Torneo Hope i a yama e torneo Hope segun nos na 2011. E torneo tabata yama Torneo SBAB ku a organisá e torneo pa hopi aña, pa despues pasa e torneo pa empresanan. MCB a organisá e torneo sigí pa SOAB, despues Aqualectra i finalmente tabata Fundashon Van Engelen Ballpark tabata esun ku a organisá e torneo e último añanan. Keda pendiente pa mas informashon di Torneo FDDK ku a saka un komunikado di e torneo menshoná. By the way, tin moveshon tambe den Liga 70 ku ta bai ranka sali. Awe ta kuminsá train. Nos ta keda te aki pa awe. Te djaluna ku Poder di Dios.
