7 miembro nobo pa Salon di Fama di FDOK
WILLEMSTAD.- Salon di Fama di Federashon Deportivo Olímpiko Kòrsou (FDOK) a instalá 7 baluarte nobo dia 27 di yüni 2021. Den un seremonia impreshonante na Queens Ballroom di Marriott Beach Resort, a instalá 7 miembro nobo den e salon kaminda ta inmortalisá figuranan destaká den deporte aki na Kòrsou.
E anochi di instalashon a tuma lugá ku mas invitadonan kompará ku e seremonia di desèmber último tempu ku e situashon na Kòrsou tabata krítiko debí Covid-19. Manera ta e tradishon, a habri e anochi ku invokashon na enkargo di Obispo mgr. Luis Secco, siguí despues pa palabranan di presidente di FDOK, sr. Jean Francisca, i e mandatario enkargá ku deporte sr. Sythree van Heydoorn .Tambe tabata presente minister presidente sr. Gilmar Pisas.
Seguidamente a pasa pa instalashon di e baluartenan sra. Aminta Josefa Sprockel, (Vòlibòl), sr. Siechnar Geronimo Djaoen (Natashon), sr. Frits Gerhard Meursing (Futbòl). sr. Anthony Martinus Casildo Leito (Karate) sra. Sherry Sophia Veronica Howell (Sòftbòl), sra. Jeanne Yvette Lopes (Tiru),
sr. Hubert Romualdo Janzen (Futbòl).
Den dianan benidero Deporte Korsou tin e historia di Salon di Fama di FDOK i CV kompletu di tur e baluartenan.
