Amstel Bright Premier Cup kayente mes, awe i e wikènt aki na Van Engelen Ballpark
WILLEMSTAD – Amstel Bright Premier Cup ta sigi djaweps, djabièrnè i djasabra ku algun wega krusial rumbo pa klasifikashon di ekiponan ku ta bai duru pa e 1000 florin komo premio den kada divishon. For di djabièrnè ta start ku weganan di playoff den vários divishon. Djabièrnè tin e promé wega di playoff entre Bala Brothers i G-Warriors i FDDK kontra Banco di Caribe/Ennia. Djasabra tin solamente un wega ku no ta playoff i tur e otro weganan ta playoff den e otro kategorianan.
Den 60+ ekipo Nos Tambe Por lo topa ku Nos Power i Los Amigos lo midi forsa kontra Jaws 60+. Djadumingu awor no tin wega debí na Marcha Hubenil. Kandela tras kandela den Amstel Bright Premier Cup di djaweps pa djasabra. Nos tin e standing tambe. Ekipo Cicoza ta fuerte den Modified ku rèkòrt di 3-0 sigí pa Terremoto 2-1, Swift sorprendentemente ta na di 3 lugá ku rèkòrt di 1-2, Bright Stars ta den sótano 0-3. Den Liga 50 Ban Serio ta na promé lugá sigí pa Jaws, pero por bini kambio den standing pendiente e wega di Ban Serio kontra Sluggers. Cerveceros ta number 1 den Slowpitch Latinos ku rèkòrt di 4-0. Den Soshal Corporate ekiponan EWT, SBAB, Aqualectra, FDDK i SOAB ta dominá.
Bala Brothers i The New Radiator ta dominá den Soshal Open. Fanátiko yega van Engelen Ballpark pa mira e weganan den e parti kulminante. Semi-final i final lo ta e último wikènt di e torneo, wikènt 7,8 9 di mart. Tene kuenta ku wikènt di gran marcha no tin wega.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bondia i felis wikènt Nos tei atrobe rumbo pa Marcha Hubenil ku lo tuma lugá djadumingu awor. Mientras tantu e Sòftbòl Slowpitch ta sigi ketu bai ku wega djaweps (ayera), djabièrnè i djasabra den Amstel Bright Premier Cup na Van Engelen Ballpark. Djadumingu awor manera nos a skibi na vários okashon, no tin wega di torneo. Ban Serio i Sluggers mester hunga e último wega di e kategoria 50+ djasabra mainta 9.30. E sigiente siman ku ta e último wikènt di luna lo no tin wega en konekshon ku Marchanan di Karnaval. Wikènt benidero tin un torneo internashonal organisá pa Pitufos kaminda un ekipo di USA lo partisipá.
* * * * *
5 aña pasá e momentunan aki hopi tabata den espektativa debí ku Covid-19 tabata na kaminda pa Kòrsou. E tempu tei tabatin Torneo The Greatest ainda pa despues pasa pa Amstel Bright Premier Cup. Na 2020 Torneo FABB a tuma lugá, Torneo The Greatest i Amstel Bright Premier Cup. Gobièrnu a dal Kòrsou sera nèt un dia despues di final di Amstel Bright Premier Cup. No tabatin final di Liga Amstel, Liga van Engelen, Liga 50 tampoko no a logra terminá kampionato den 2020. Liga 60 si a logra terminá nan kampionato ku ekipo Nos tambe Por birando kampion i Beisbòl Veterano a hunga te den desèmber i despues terminá kampionato 2020 den 2021.
* * * * *
Preparashonnan pa Torneo Hope 2025 ta sigi. Manera ta konosí e torneo lo keda organisá pa FDDK huntu ku The Greatest. Diskushon ta ku lo tuma ekiponan Soshal Open tantu riba nivel di Maskulino Soshal komo COED. Naturalmente e ekiponan aki ta gasta formal, pero nan a lubidá un tiki e parti soshal i ta pa gana ta bai. Ya… ta trata di torneo fundraising i tin algun di ekiponan aki ta gasta formal na bar. Kuminda tambe ta fundraising sea pa e organisadó òf esun ku tin kushina. Saludo pa esnan tras di e kushina den Amstel Bright Premier Cup ku ta Julise Koffy ku su crew. Tremendísimo ruman tur wikènt durante Amstel Bright Premier Cup.
* * * * *
Pa loke ta e 60+nan, ta pendiente pa dos torneo tradishonal atrobe. Na komienso di aprel lo tin torneo Lions i despues lo tin torneo Jaws 60+. Den 2024 ekipo Nos Tambe Por a bira kampion di e torneonan aki. Segun ekiponan Lions, Jaws i Los Amigos ta otro gai lo kanta e aña aki. E tres ekiponan aki a drecha formal pa 2025. Ekipo Los Amigos a haña resio batiadó Raimy Pastor for di Jaws i nan ta pendiente pa e shortstop Pito Postina kumpli 60 aña durante kampionato. Los Amigos tin otro gran batiadó ku ta Tyron de Palm den nan filanan pa 2025. Los Amigos a medio tira un bara di hak den Jaws su laman. Na komienso di 2024 Los Amigos a tira nèt i reda den laman di Nos Tambe Por i bai ku 6 hungadó i kual sigur 4 tabata estelar. Ekipo Lions a bai ku Fransje Lambertina for di Jaws. Moveshonnan kayente den 60+ atrobe den 2025 aki.
* * * * *
Di un bon fuente nos a tende ku siman pasá djarson tabatin un reunion di Liga 60 pa tuma Baranka den e liga. E liga 60 tin 8 ekipo i parse 3 a vota na fabor pa Baranka drenta i 5 kontra. Ekiponan Jaws, Sluggers i Nos Tambe Por a vota na fabor i e otronan den Liga 60 a vota kontra. Lástima ku e ekipo Baranka ku tin tim eksitoso den Liga 40 i 50 no a logra drenta Liga 60. Direktiva di Liga 60 a bini ku un proposishon pa ekiponan bira 9 ku skema i tur kos trahá kla kaba, pero enbano.
* * * * *
Baranka lo mester warda un ratu mas pa drenta den e liga. Jandoret Raiders pa hopi aña tabatin deseo di drenta Liga 50, pero no tabata por. Na momentu ku Jandoret a legumai e asuntu di drenta 50+, un oportunidat úniko a presenta, Jandoret a djòin Catpower i ta pendiente pa hunga kampionato di 2025 komo Catpower/Jandoret Raiders. Ke mèn Baranka tene pasenshi i e dia lo yega ku boso lo drenta Liga 60. Amstel Bright Premier Cup a la karga. Kòrda ku tin wega djaweps, djabièrnè i djasabra e siman aki. Te mayan ku Poder di Dios.
