Amstel Bright Premier Cup ku vários wega na Van Engelen Ballpark
WILLEMSTAD – E tradishonal torneo Amstel Bright Premier Cup a start djasabra den gran forma ku masha hopi wega mes na Van Engelen Ballpark riba tereno A i B. Den Liga 50 ekipo Jaws a sorprendé Ban Serio ganando ku skor di 14- 6.
Den e sigiente wega ekipo Jandoret Raiders a derotá Sluggers 8-7 den un wega ku Jandoret Raiders tabata ganá ku skor di 7-3 te den último inning i ekipo Sluggers ta rèli pa 4 kareda i keda kòrtiku. Den wega bálido pa Liga 40 ekipo Bombers a gana Jaws ku skor di 9 pa 5. SOAB un dje grandinan den Soshal Maskulino a gana di Citco 9 pa 8 den otro wega pèrtá. Weganan ta sigi e siman benidero i nos tin e resultadonan i pòtrèt.
RESULTADONAN
Jaws 14, Ban Serio 6
Jandoret 8, Sluggers 7
Ban Serio 7, Jandoret 6
SOAB 9, CITCO 8
MCB 13, CGF/RBC 2
Choonchies 12, Bala Brothers 5 (COED)
Choonchies 17, Bala Brothers 11
Fridays 15, Fireboys 2
Among Us 15, Bomboshi 6
The New Radiator 14, The Road Runners 4
The Dominator 11, Tog Nos Tei 10,
Bombers 9, Jaws 5
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bon dia felis di siman. Amstel Bright Pemier Cup a start den gran forma ku bon asistensia di fanátikonan djasabra i djadumingu último na Van Engelen Ballpark. E weganan a drei zetá i ta hopi wega mes lo bai tin e próksimo luna. E torneo ta programá pa terminá djadumingu 9 di mart nèt e wikènt despues di Gran Marcha. Sòftbòl Tim Cicoza ta enkargá ku organisashon di Amstel Bright Premier Cup ku ta fungi komo fundraising pa e ekipo i alabes partisipashon na Kopa ABC&S 2025 ku e aña aki lo tuma lugá na Kòrsou.
* * * * *
Na 2015 ekipo Cicoza a bira kampion di Kopa ABC&S ku a tuma lugá na Aruba. Weganan tabata realmente pèrtá i dramátiko e aña ei na Aruba. Cicoza a gana Swift den un wega super pèrtá 4 pa 2 i despues gana Happy Brothers 10 pa 9 den un wega ku Happy Brothers por a laga Cicoza den tereno. Esnan ku tabata na Aruba a gosa un bòl i e sigiente aña na 2016 Swift a gana na Kòrsou i kai den un racha formal pa despues Cicoza mes bin kita e título na Sint Maarten te na 2024. Algun aña no tabatin Kopa ABC&S debí na Covid. Kopa ABC&S a para bira manera Kopa Antiano di ántes. Hopi di e mihónan di Beisbòl ta reforsá ekiponan den Sòftbòl.
* * * * *
Mester bini bèk ku algu manera Kopa Antiano entre e mihó ekipo òf ekiponan di Kòrsou i Sint Maarten. Naturalmente mester wak un nòmber pe kompetensia manera por ehèmpel Dutch Caribbean Baseball Championship. Kampion di Aruba, Kòrsou i Sint Maarten den un kompetensia. Si Sint Maarten no por kompetí ainda, entre Aruba i Kòrsou. Santa Maria i Wild Catsnan aki a yega di partisipá na Aruba den un manera Torneo Warm-up. Parti final di 2024 tambe Kòrsou a topa ku Aruba i Hulanda den preparashon pa Hulanda ku tabata rumbo pa Premier Cup 12, e kompetensia Mundial di Beisbòl Amatùr.
* * * * *
Miéntras tantu ekipo Curacao Goats a kai afó na Nicaragua den Serie de Las Americas kaminda nan e swip e Double Header. Nos a perde net un wega i esei tabata den semi-final djarason kontra di Panama 7-0. Un dia prome, djamars nos a gana di Panama 11 pa 8. E weganan a bai lo sigiente, djasabra 25 di yanüari, ekipo Curacao Goats mihó bisá e selekshon di Kòrsou a gana Colombia den un wega pèrtá ku skor di 5 pa 4 i e sigiente wega den oranan di anochi Kòrsou a gana di e ekipo di kas ku ta Nicaragua ku skor di 3 pa 0. Djadumingu den oranan di anochi Kòrsou a gana Cuba ku skor di 15 pa 2 i djaluna nos a dal Argentina 12 pa 2.
* * * * *
Djasabra algu hopi tristu i lamentable a sosedé na momentu ku umpire Jacqueline Wilson a sak den otro riba tereno i fayesé durante wega di Little League. Un dje poko umpirenan femenino ku nos tin den Little League i trahadó i kumplidó ínkansabel na bienestar di e deporte di Little League. Little League i arbitrahe di Beisbòl di Kòrsou ta di luto. Un tremendo persona ku ta kue masha hopi wega den Sòftbòl Femenino Veterano durante masha hopi aña. Kondolensia na famianan i esnan envolví den Little League i tambe Sòftbòl Slowpitch. Akto di entiero ta djadumingu na El Tributo i lo dera na Montanja. Nos ta keda te aki pa awe i te mayan ku Poder di Dios.
