Dos coach di Beisbòl Yu di Kòrsou a biaha pa kampamentu di Rangers
WILLEMSTAD- Dos coach di Kòrsou a biaha djasabra 25 di yanüari pa kampamentu di Texas Rangers na República Dominicana. Ta trata di coachnan Charles ‘Chalie’ Merite i Merieldo ‘Lem’ Trinidad. Nan a keda invitá pa e Yu di Kòrsou, Sharnol ‘Pachito’ Adriana di Texas Rangers pa djòin un programa ku Texas tin pa yuda coachnan di tur nivel i duna bèk na komunidat. E training speshal ta pa atendé ku hungadó- i prospektonan di beisbòl ku ta rumbo pa e Beisbòl Profeshonal i e Beisbòl di Kolegio na USA òf den region i tambe desaroyá e coachnan pa nan ta mas prepará i por duna un mihó kontenido.
Durante e siman di training/tayer lo haña tur informashon riba e parti mental i físiko pa sa kon ta prepará e hóben riba su futuro den Beisbòl Profeshonal , Beisbòl di Kolegio i Lokal . E preparashon ta hopi amplio tantu riba tereno di beisbòl komo e parti mental. Na momentu ku e hóben no ta logrando òf no a logra su meta, den e preparashon e coachnan ta haña e instrumentonan pa pasa pa e hóbennan pa asina e hóbennan ta prepará pa plannan B,C, D ets. Ku otro palabra, otro opshonnan, bida mester sigi tambe i tin hopi mas ku por hasi tantu den beisbòl komo den bida. Texas Rangers lo sigi den futuro ku mas training pa coachnan di beisbòl di Kòrsou i di region.Un inisiativa ku sigur sigur nos coach, pelotero i mayornan por benefisiá di dje a base di tur e informashon ku ta wòrdu kompartí .
Teksto pa pòtrèt:
Lem Trinidad i Charlie Merite na kampamentu di Texas.
Eugene Kinsale di Texas huntu ku coachnan Merieldo ‘Lem’ Trinidad i Charles ‘Charlie’ Merite.
Amstel Bright Premier Cup ta sigi ku 34 wega den fin di siman na Van Engelen Ballpark
WILLEMSTAD- E popular i tradishonal Amstel Bright Premier Cup a sigi ku 6 wega ayeranochi na Van Engelen Ballpark. Grandinan den e kategoria Soshal a topa ku otro riba tereno A i B. MCB a topa SOAB den COED, despues tabatin SOAB kontra Selikor den Soshal Maskulino. Den último wega riba tereno A ta Cicoza kampion di Kopa ABC&S a dal den Bright Stars. Riba vèlt B tambe tabatin 3 wega kandela. Nos ta pendiente di e resultadonan. Awe, djasabra 9.30 am lo tin wega kandela entre Los Amigos i Nos Tambe Por den kategoria 60 +. Despues ta sigi Ban Serio kontra Sluggers den 50+ sigí pa Jandoret Raiders kontra Jaws 50+ pa 12.30. Ta 28 wega lo tuma luga djasabra i djadumingu riba tereno A i B na Van Engelen Ballpark.
MAS INFORMASHON DI SÒFTBÒL I BEISBOL
Fanátikonan di Deporte Kòrsou, bondia i felis wikènt. Ayera tabata último dia di yanüari 2025 i ya nos ta bai den febrüari kaminda aktividatnan di karnaval ta kue un drive formal. Djabierne Amstel Bright Premier Cup a sigi na Van Engelen Ballpark ku 6 wega. Tres wega riba tereno A i tres wega riba tereno B. Grandinan manera MCB, SOAB, Selikor, Cicoza, Bright Stars, The New Radiator, ets lo ta den akshon awenochi na Van Engelen Ballpark. For di aña pasá tin lus riba tereno B, ké mèn ta ambiente total tin awenochi ku weganan ku ta tumando lugá pareu. Djasabra tin weganan di Liganan 60, 50 i 40 riba tereno A i masha hopi wega mes di Soshal riba tereno B. 34 wega tin e wikènt aki den Torneo Amstel Bright.
* * * * *
Miéntras tantu desaroyo nobo den Liga 50 di Sòftbòl kaminda Jandoret Raiders a djoin Catpower. Ta spera mas kompetensia den e liga i tin intenshon pa hunga ménos wega. Hungando ménos wega lo kaba fin di òktober enbes di novèmber i desèmber manera tabata e kaso último añanan. Tin proposishon pa 6 tim klasifiká e aña aki i number 5 kontra 6 i despues ganadó di 5 vs 6 lo hunga kontra 4. Tin intenshon tambe di hunga play-off page system kaminda ekiponan number 1 i 2 lo tin mas bentaha kompará ku ántes kaminda ta hunga 1 vs 4 i 2 vs 3. Keda pendiente pa mas informashon di Liga 50 di Sòftbòl. Miéntras tantu nada ainda di Liga 40 di Beisbòl pa loke ta trata e apelashon entre Yesterday i Santa Rosa.
* * * * *
Nos di Deporte Kòrsou konstantemente tin komunikashon ku Sidney ‘Pipi’ Pieter ku ta fundadó di ekipo GGD ku a drei eksitosamente durante hopi aña. Despues ku Liga Amistad a stòp di eksistí ekiponan manera GGD, Veteranos, Nos ku Nos, Revelations Stars a stòp. Pipi Pieter ta sigi Liga 60 i Liga 50 dj’aserka i nos a risibí vários sugerensia i reakshon. Pipi ta kere ku tin algun klup di Liga 60 ku tin miedu di laga Baranka bira miembro di Liga 60. Según Pipi Pieter, klupnan ta bisa ku nan no ke solamente 1 klup. Mas aleu e klupnan ta bisa ku si tuma 2 ta bira 10.
* * * * *
E timnan e ora ei ta hunga 4 wega pa día i ta 8 klup ta hunga, klup 9 lo tin barwacht i e tim number 10 lo ta liber. Timnan ta pensa ku e 10 klupnan bo tin ku hunga demasiado wega. Pero naturalmente tin hopi manera pa hasi e weganan ménos. Tene kuenta ku tin mas liga ta usa mesun tereno. Ku Baranka birando number 9, e liga ta bira hopi mas atraktivo. Pipi ta pensa ku un klup ku barwacht ta hunga e promé wega di e dia. E klup lo tin sigur 90% di su hungadónan pa hunga i barwacht ta 10’or di mainta. Pipi ta pidi Please, kada klup mustra ku por tuma Baranka. Den Liga 60 no tin nada mas pa demostrá. Boso tur a duna i mustra tur ku tin kaba. Liga 60 lo bira dushi, mas alegre i na final e dividendo lo ta mas gordo.
* * * * *
Nos a risibí informashon ku Jair Josepha a bira manager di Jaws den Liga 60. Jair a kuminsá eksplorá kaba i ta papiando ku vários hungadó. Ta konosí ku vários hungadó a bai òf ke bai i Jair ta bezig ta wak pakiko nan a bai òf ke bai. Jair ke hasi Jaws e ekipo ku Jaws tabata e último añanan aki den Liga 60, esta un ekipo super kampion. Jaws tabata kampion na 2022 i 2023 i promé ku esei kampion na vários okashon. Jaws ta kampion na 2012, 2013, 2014, 2015 i 2018 tambe. Jaws ta den Amstel Bright Premier Cup i a kai vensí kontra Nos Tambe Por djadumingu último.
* * * * *
Djadumingu lo hiba umpire Jacquelin Wilson na su último lugá di sosiegu. Akto di entiero lo ta na El Tributo di 1 pa 3 i lo sigi un respons pa después sigi pa Santa Katóliko na Montaña. Un gran boluntario a bai laga nos i a hasi su esfuerso semper pa kontribuí ku Beisbòl Little League i Sòftbòl en general. Nos ta keda te aki pa awe. Te mayan ku Poder di Dios.
