Amstel Bright Premier Cup ta start 24 di yanüari na Van Engelen Ballpark
WILLEMSTAD- Dia 24 di yanüari 2024 e tradishonal torneo Amstel Bright Premier Cup ta start na Van Engelen Ballpark riba tereno A i B. Ta di 11 Amstel Bright Premier Cup organisá pa Klup di Sòftbòl Cicoza ku ta yegando 49 aña di eksistensia. Invitashonnan a sali pa ekiponan di e diferente kategoríanan.
Tantu djasabra komo djadumingu tin weganan riba tereno A i B. Lo ta liber riba fecha di Marcha Hubenil i e wikènt di Gran Marcha no tin wega. Finalnan lo ta dia 9 di mart na Van Engelen Ballpark riba tereno A i B, tene kuenta ku tur dos parke tin lus.
Lo tin e mihó ekiponan di aktualidat di Liga 50, Liga 60, Liga 40, ekiponan Komersial Maskulino, Femenino i Co-Ed (Sosial Corporate i Sosial Plùs), mas ekiponan di Liga Kompetitivo, lo kompetí kontra otro den Pul den nan mes respektivo kategoría.
Fechanan pa Amstel Bright Premier Cup 2025 lo ta maksimal (dependé di e kantidat di inskripshon) 6 fin di siman esta: 23-24-25-26 di yanüari, 30-31 yanüari i 1-2 febrüari, 6 febrüari i 8-9 febrüari, 13-14-15-16 febrüari, 20-21-22 febrüari pa finalisá den fin di siman di 6-7-8-9 mart 2025.
E torneo lo break sin mas pa e dianan di Karnaval ku ta 23 di febrüari 2025 i 28 febrüari te ku 4 di mart 2025.
Meskos ku aña pasá Amstel Bright Premier Cup lo repartí solamente pa e ekipo kampion di kada kategoría un premio estilo “CASH BACK” te un máksimo di 1000.00 florin. E Komishon organisadó tin e sumo plaser pa invitá ekiponan di Sosial Maskulino 40+ pa partisipá den sekshon Sosial Maskulino 40+.
Ke men 40+nan tambe ta bon bini. Manera tur aña inskripshon lo ta a base: “esun ku yega inskribí promé ta bebe awa limpi.” No tin duda ku pa organisá un torneo di tal magnitut tin basta gastu pa kubri pa kua e organisadónan ta pidi un aporte di Anf. 250.00 pa por yuda kubri gastunan básiko (bala-empayer-ets). E suma di inskripshon tin ku wòrdu pagá preferibel on line pa kuenta di SBC Cicoza, Mexicoweg 17, MCB Acc # 25857606, en todo kaso promé ku Bright Premier Cup ranka sali 24 di yanüari 2025.
Por inskribí solamente via e-mail òf app serka: pim@fangman.org òf frondelyanthonia@gmail.com òf ryanisebia@gmail.com. E organisadónan ta urgi un i tur pa inskribí mas lihé ku ta posibel. Inskripshon ta sera 15 yanüari 2025. Na su debido tempu lo duna mas informashon tokante reglanan pa kada kategoría i finalmente nos lo informá e skèdjel ku sufisiente antisipashon.
MAS INFOMASON DI SÒFTBÒL I BEISBÒL
Fanátikonan di Deporte Kòrsou bondia i felis aña tòg ainda. Aña 2025, aña di elekshon i naturalmente hopi aktividat deportivo atrobe. Promé ku Pasku Federashon di Beisbòl di Kòrsou (FEBEKO) a saka un lista di hungadónan di beisbòl lokal ku ta agente liber. Wild Cats tin 5 grandi na kabes di e lista ku ta entre otro Risandro Pastor, Nigel Calmes, Ruderly Manuel, Randy Kirindongo i Rayshaendal Michel. Royal Scorpions tambe tin vários grandi, entre otro Juruengelo Thielman, Urwin Juaquin i Givaine ‘Chucho’ Basilia. Santa Maria tin Reangelo Beaumont, Yurendell de Caster, Denzell Gregg, Claycandy Hariquez, Kevin Moesquit, Sherwnne Antersijn i Carol Servania.
* * * * *
Otro nòmbernan grandi menshoná ta Calten Daal, Terrence Goeloe, Ruigino Jonis, Jordan Lucas di Santa Rosa. Ata un grandi aki Andrelton Simmons di Marchena Braves. Tin Dennis Gustina tambe di Marchena. Groot Kwartier tin hopi nòmber grandi, entre otro Quincey Balentien, Dexler Macaay, Draydon Evelina ets. Tin nòmber di vários hungadó di Klase A tambe den e lista. Aworaki nos ta pendiente di e mini kampionato di e liga profeshonal di Kòrsou i despues Serie de las Americas ku lo tuma lugá di 24 pa 30 di yanüari na Nicaragua. Vários ekipo (pais) no a haña invitashon pa Serie del Caribe i a bini ku e Serie de Las Americas aki kaminda ekiponan manera Kòrsou, Colombia i Cuba por partisipá. E ekiponan ku lo partisipá na e seri aki ta Argentina, Colombia, Cuba, Kòrsou, Nicaragua i Panama. Nos lo sigi ku mas detaye di e seri aki den dianan benidero. Nos Pais TV lo transimití e weganan bibu i dirèkt.
* * * * *
Djabièrnè Torneo FABB ta start na Van Engelen Ballpark. E torneo ta dediká na Jurickson Profar ku nos tabatin vários detaye di e torneo i di e super estrea di MLB aki den nos edishon di 30 di desèmber. Den e kolumna aki nos lo sigi ku karera di Jurickson Profar tambe den e dianan benidero. Jurickson Bartholomeus Profar a nase na Kòrsou dia 20 di febrüari 1993. Ke men otro luna e lo kumpli 32 aña i pendiente pa firma un bon kontrakt despues di un tremendo temporada ku San Diego Padres. 2024 Jurickson a bati pa average di .280 ku 24 homerun, 85 RBI i 10 base robá. Jurickson a kometé solamente 1 eror den 249 chèns pa kometé eror. Un average di fildeo inkreíbel di .996. For di 3 aña Jurickson Profar a kuminsá move den Beisbòl, e tabata bai wega ku su tata.
* * * * *
Pa loke ta trata e torneo mes, djabièrnè tardi ta start. E hóbennan a yega tereno i 6’or a subi vèlt riba ritmo di Brassband. Glenn Thomas ta MC i lo tin palabra di Minister di Enseñansa, Siensa, Kultura i Deporte sr. van Heydoorn sigí pa rekonosimentu di Jurickson Profar. Jurangelo Cijntje ku ta na Kòrsou tambe lo ta presente na e apertura di Torneo FABB. E promé weganan ya lo ta kandela na momentu ku ekipo Jaguar di Minor League lo topa ku Trai Seru i na mesun momentu tin otro kandela ku ta Santa Maria kontra di Montanja Ariba den Little. Manera ya a bira un tradishon ta spera un públiko grandísimo pa mira e Torneo FABB ku ántes tabata Torneo Andruw Jones. Segun nos e torneo a start for di 1997 e aña despues ku Andruw Jones a pone drama den World Series na 1996 hungando pa Atlanta Braves kontra di New York Yankees.
* * * * *
Ban bèk pa Slowpitch. Invitashonnan a sali pa Amstel Bright Premier Cup ku lo tuma lugá na Van Engelen Ballpark. E torneo organisá pa Cicoza lo start 23 di yanüari i terminá dia 9 di mart ku ta despues di Karnaval. Lo tin diferente kategoría, Liganan soshal, 40, 50 i 60. Tambe lo tin liganan modified. Lo hunga den diferente pul den e kategoríanan riba vèlt A i B na Van Engelen Ballpark. Naturalmente lo tin weganan anochi riba velt B tambe ku for di aña pasá ta disponé di lus. Lo tin e kategoría Soshal di 40+ tambe i tene kuenta ku ekiponan ku bira kampion lo gana 1000 florin. Inskripshon ta 250 florin i kòrda esun ku yega promé ta bebe awa limpi. Nos ta keda te aki pa awe. Te djaluna ku Poder di Dios.
