Apertura Torneo FABB dediká na Jurickson Profar a start djabièrnè na Van Engelen Ballpark
WILLEMSTAD- Djabièrnè 3 di yanüari tabatin apertura di Torneo FABB na Van Engelen Ballpark. E torneo anual di Little League ta dediká na Jurickson Profar, big Leaguer yu di Kórsou ku tabata presente.
Ekiponan di tur tres liga a desfilá drenta tereno riba ritmo di brasband. Ernst Meyer motor tras di e torneo pa 26 aña kaba hiba palabra. Umpire veterano Marshal ‘Chiki’ Osepa a huramentá e hungadónan siguí pa homenahe na Jurickson Profar.
Jurickson Profar tambe a dirigi palabra. MC Glenn Thomas a papia breve di e karera di e baluarte menshoná. Jurrangelo Cijntje a lansa e promé bala , miéntras Minister van Heydoorn tabata e kècher, Jurickson Profar e batiadó. Despues ekiponan a baha for di tereno, saludá e públiko presente i e baluartenan.
Durante e apertura umpire Marshal ‘Chiki’ Osepa a risibí homenahe pa su 25 añanan komo umpire di e torneo. Despues di apertura ofishal e ekipo Montaña Ariba a enfrentá Santa Maria den kategoria Little League i Jaguar a hunga kontra Trai Seru den Minor. Tur ekipo i organisashonan di Little League tabata presente na e apertura ku a tuma lugá dilanti un públiko grandi.
Montanja Ariba a gana Santa Maria ku skor di 4-3 den Little i Trai Seru a gana Jaguar ku mesun skor, 4-3 den Minor League.
