Analisis di Pepi Sulvaran riba selekshon futbòl di Surnam i di Kòrsou
WILLEMSTAD- Resientemente nos a risibí mas análisis di Pepi Sulvaran pa loke ta trata nos selekshon di Futbòl di Kòrsou. E último tabata un análisis riba e selekshon di Surnam i riba selekshon di Kòrsou. Nos tin 3 análisis den e artikulo aki. Pepi Sulvaran ta eks direktor tékniko di futbòl di Kòrsou i eksperto ku gran konosementu riba futbòl internashonal. Konstantemente Pepi ta analisá i manda komunikado pa prensa lokal.
SURNAM SI TA HARMANDO UN MONSTER I MESTER WORDU KONSIDERA E FABORITO PA GANA GRUPO C DEN KOPA DI ORO
Ku atkisishon di Henk Ten Cate komo asistente i Brian Tevreden komo direktor di asuntunan futbòlistiko di SVB, e bond di futbòl di Surnam, a dal un paso mas serka di e meta di klasifiká pa mundial 2026. Ten Cate i Tevreden tur dos ta konosí den futbòl Ulandes. Ten Cate un eks rèksbuiten rápido di Go Ahead Eagles i Vitesse den Eredivisie, tin un karera impreshonante komo entrenado òf asistente den entre otro, Ajax, Vitesse, Barcelona, Chelsea, Panathinaikos i Sparta. Tevreden ta un bolante ku a hunga na Ulanda pa FC Volendam i FC Emmen i na Gresia. Entre Dean Gorré eks hungadó di Ajax i futbòl inglés, Stanley Menzo eks portero di Ajax i selekshon Ulandes, Aron Winter eks hungadó di Ajax, Inter Milan i eks internashonal Ulandes, tur hungadó di nòmber i entrenadornan di Surnam, nan a forma un ekipo pa ta un forsa den CONCACAF.
Den gol tin Warner Hahn, eks kiper di entre otro Heerenveen, PEC Zwolle i Go Ahead Eagles i eks international hubenil Ulandes ku awor ta hunga na Hapon den divishon máksimo. Nan defensa ta sólido ku entre otro e kapitan Ryan Donk di e ekipo den máksimo divishon Turko, Kasimpaşa, Ridgesiano Haps di Genoa den Serie B, Sean Klaiber eks Ajax i awor FC Utrecht, Damil Dankerlui di FC Groningen, Shaquille Pinas di Hammarby na Suesia i Djevencio van de Kust eks FC Utrecht i awor Houston Dynamo. Den bolante tin entre otro Tjarron Chery ku mas ku 100 wega den Eredivisie i kampion Israeli ku Maccabi Haifa. E veterano Diego Biseswar, eks Feyenoord i awor ku Thessaloniki den divishon máksimo Griego. Kelvin Leerdam ex Feyenoord i Vitesse i awor den MLS ku LA Galaxy. Kenneth Paal eks PSV i PEC Zwolle i awor ku Queens Park Rangers den Championship Ingles. Leerdam i Paal por hunga defensa tambe. Den delantero no papia mes, nan ta bin ku Sheraldo Becker (Union Berlin) un di e máksimo goliadónan den Bundesliga Aleman. Florian Jozefzoon eks Ajax i PSV i awor kompañero di ekipo di Anita, Gaari i Felida den RKC.
Tambe nan tin e talento Jeredy Hilterman ku un promedio di un gol kada dos wega den Almère City, ekipo fuerte den Keukendivisie Ulandes. Esey no ta tur kos. E trio di Winter, Ten Cate i Tevreden, tin planiá pa riba termino korto anunsiá e rápido Gyrano Kerk eks delantero di FC Utrecht, Lokomotiv Mosku i awor Royal Antwerp, e defensa sentral Stefano Denswil di e ekipo den divishon máksimo di Turkia Trabzonspor, eks Ajax, club Brugge i Bologna i eks internashonal hubenil Ulandes i e talento di Leeds United den Liga Premier Crecencio Summerville, eks Feyenoord, i aktual selekshonado U-21 Ulandes. Summerville ta úniko ku a bisa duné chèns pa pensé. E desaroyo na Surnam ta prueba ku Gorré, Menzo i awor Winter, Ten Cate i Tevreden pa nan nómber den futbòl Ulandes, a logra ku Surnam lo bai Kopa di Oro i pre-mundial ku speransa hustifiká pa yega lew. Esei ta e kaminda pa nos tambe. Aktualmente ni Costa Rica, ni Panama ni El Salvador no tin e material pa pasa fásil riba Surnam. Al kontrario, Surnam pa su potensial na hungadó, mester wòrdu konsiderá faborito den grupo C. Ku Surinam lo yega Kopa di Oro, ta sigur.
Ni Puerto Rico ku no ta un país futbòlistiko, ni e ganadó di Martinique ku Saint Lucia no por hasi masha na nan kurpa. Den Liga di Nashon nan a kai den grupo ku Mexico i Jamaica, dos trabuko den CONCACAF. Asina mes nan a tabla na kas ku Jamaica, lokual ta proba nan adelanto. Awor nan ta bin ku mihó ekipo, ku refuerso serio. Ta di ban wak día 19 awor ora Bicentini anunsiá su selekshon pa ‘Gold ‘Cup’ si a logra haña mas refuerso di taya. Su problema ta ku e no ta konosí den futbòl Ulandes kaminda nos fuente grandi di hungadó ta. No por benta tur kulpa riba Bicentini si. Paso hungadó manera Obispo (PSV), St. Jago (FC Utrecht), Bazoer (AZ) ku ta keinta banki den nan ekipo i Chong (Birmingham) i Locadia (Cangzhou), tur ta irealistiko i aparentemente ainda ta soña ku selekshon Ulandes. Pero basá riba kiko? Bo por sigui biba riba speransa falsu òf bo por yuda e país di bo rais i bo mes pa purba yega Mundial.
(KÒRSOU)
MESTER DI MAS REFUERSO PA ‘KOPA DI ORO’.
Si ta bon, via St. Kitts i Guiana Franses, nos lo yega fase final di ‘Kopa di Oro’ pa medio di play-off. Mirando ku Bicentini tampoko no a logra di konbensé, entre otro Bazoer, Chong, St. Jago, Obispo, Locadia i no por stèns ku lo logra esaki pa ‘Kopa di Oro’ na yüni, ora nos lo bai topa grandinan den CONCACAF manera Merka i Jamaica den nos pul, mester wak mas refuerso awor. Den un selekshon mester tin kompetensia serio pa puesto, pa tene tur hungadó skèrpi. Esnan ku ta bin mas na remarke ta, Nigel Thomas (Paços de Ferreira), Jearl Margaritha (Top Oss), Jurich Carolina (Miedz Legnica) i Daijiro Chirino (PEC Zwolle).
Nigel Tomas (22) a krese den Primeira Liga di Portugal. E ta hunga riba ala i preferibel ta hunga riba ala robes, pa drenta tira ku su pia drechi. E ta fisikamente fuerte i sa piki su golnan. Ela lanta den Jong PSV i a hunga di U-15 te ku U-17 den selekshon hubenil Ulandes. Pa su bon aktuashon na Portugal, su balor riba merkado a subi. E por hunga tur dos banda riba ala den atake. Esei ta konta pa Jearl Margaritha (23) tambe. Jearl tin promedio di kasi 1 gol kada dos wega i ta ser sperá ku e sigiente temporada e lo ta den Eredivisie. E ta rápido, tin bon skein i ta anotá fásil. Thomas i Margaritha, meskos ku Xander Severina i Jeremy Antonisse, lo oumentá konkurensia riba ala pa tantu Brandley Kuwas komo Kenji Gorré.
Otro hungadó ku mester ta den selekshon ta Jurich Carolina (24). E selekshon di nos tin masha hopi rèksbèk, pero pa straño ku por zona, no tin ni un defensa di pia robes. Esaki ta straño, paso Carolina ku ta un defensa lateral robes ku pia slengu, tur siman ta hunga den divishon máksimo di Polonia, hasta tambe defensa sentral. Carolina pa motibu deskonosí no a wòrdu invitá, kaminda tin hungadó ku ta hunga hopi mas abow kuné den selekshon. Kosnan asina no por mas, si ta Mundial nos ta pretendé di bai. Carolina a lanta den Jong PSV i huntu ku Suently Alberto a forma un duo di defensa sentral i nan tabata wòrdu konsiderá talentonan grandi. Suently su karera a stagna pa leshon. Carolina por hunga bolante defensivo tambe. Ela forma parti di selekshon hubenil Ulandes for di U-17 te ku U-20 i ya tabata parti di nos selekshon i a anotá gol desisivo pa nos gana e Kopa na Indonesia. E tin bon velosidat.
Daijiro Chirino (21) tin tur kos pa logra den Eredivisie Ulandes ku Zwolle e aña ku ta bin. Paso a paso ela bin ta haña oportunidat den tur wega después di a kuminsá kampionato riba banki. Ela hunga den selekshon U-17 i U-18 Ulandes. Originalmente e ta defensa lateral drechi i defensa sentral, pero último tempu pa su téknika i mente luchadó sa wòrdu postulá rèks den bolante. E ta rápido i ta kore hopi. Mester halé adén awor pa subi e konkurensia tantu den defensa komo den bolante i pa siguré pa futuro. Además e ta primu di Tahith Chong i kisas lo por konbensé su primu. Si logra trese un òf mas di e hungadónan ariba menshoná, esei ke mèn ku mester traha lugá.
Di bèrdat ta di apresiá ku Shanon ’Cheese’ Camelia tin hopi aña den selekshon. Pero tin otro realidat. Camelia ya tin 34 aña i ta hunga amatùr na Ulanda riba e di kuater nivel di futbòl Ulandes. Elson ‘Sontje’ Hooi a trese hopi alegría pa nos ku golnan oportuno algún aña pasá, pero ‘Sontje’ ta bai hasi 32 i a hunga lastu aki den di dos divishon na Irak ku no ta un nivel haltu. Mi ta kere ku tantu pa ‘Cheese’ komo ‘Sontje’ por organisá un wega di despedida amistoso ora selekshon ta aki den futuro.
Pero riba ruta pa Mundial 2026 mester renobá. Si mester traha mas lugá, Justin Ogenia (Eindhoven), Roshon van Eijma (Top Oss) i Darryl Lachman (Perth Glory) mester teme pa nan lugá. Ogenia (24) no tin puesto regular den Eindhoven i van Eijma (24) den tur e añanan den Keukendivisie no a yega mas lew. E kompetensia di Cuco Martina, Gaari, Floranus, Troupée si e kuminsá hunga regular, Markelo i Carolina, kendenan tur ta òf a hunga riba nivel mas haltu, ta mustra muchu pa nan dos. Lachman ya ta bai hasi 34 e aña aki i no por ta den tapara pa Mundial, además e no a mustra masha interés lastu tempu. Mester kuminsá duna nos selekshon ku lo ta riba ruta pa Mundial 2026 ‘body’ for di aworaki. ‘Gold Cup’ na Merka lo ta e ideal promé paso.
TA TEMPU PA TRANSFORMA SELEKSHON. NO POR SIGUI RIBA RUMBO BIEUW.
Algun dia pasá, ma skirbi ku nos selekshon di Futbol tin futuro, paso asina mi ta miré, pero kier agregá aserka ku esei ta solamente si nos hasi kos korekto. Ami semper a bisa ku Remko Bicentini sigur ta un bon hende, pero tin duda ku e tin lokual mester pa hiba nos e sigiente nivel. Esaki no ta paso nos a pèrdè e dos weganan kontra Canada i Argentina, pasobra e promé wega nos no a hunga malu i e di dos ta kontra e kampion Mundial i e mihó hungadó di tur tempu. Komo opservadó krítiko, nos no por gaña nos mes, ni lo no gaña niun hende. Nos tin un generashon nobo di hungadó hóben di nivel ku tin futuro den Futbòl.
Kon ta hasi splika lo sigiente. Lagami pone bon kla ku un Leandro Bacuna salú i den forma ta un di nos mihó hungadónan. Realidat si ta, ku for di yüli 2022 te ku desèmber 2022 e no a hunga bala i e aña aki ku Watford riba di dos nivel Ingles no ta regular i a hunga solamente dos wega kompletu. Esei no sin mas ta un problema, pero ta bon kla si ku además ela hunga leshoná. Tur hende ku a wak e weganan ku tinu sa ku no ta e Leandro di kustumber. E promé gol kontra Canada, un Leandro manera kustumber lo a korta e bala fásil, wak e video. Na mitar wega mester a sake kontra Canada, pero ta subi vèlt kontra Argentina, un wega amistoso ku pia mara i hunga kasi hinter wega leshoná. Kon por bende algu asina ku e hóbennan ku tambe ta hunga riba nivel máksimo i ta nobo den selekshon. Kaminda Leandro a hunga, Godfried Roemeratoe i Kevin Felida ‘fit’, tur dos bolantenan prometedor, lo a hunga sigur mas mihó. Tur hungadó mester a wak i sa ku Leandro ta leshoná. Nos a bin ku diferente talento nobo, mester wak tipo di kos asina aki bon. Den pasado ela kosta nos hungadó kaba. Pakiko no a duna Roemeratoe, Felida, Severina, Markelo i Antonisse, maske ta mitar wega den e wega sin nifikashon kontra Argentina, pa nan haña smak pa sigui bin? Si Leandro kier a hunga kontra Argentina mes, duné 10 pa 15 minüt i spar e pa e leshon no bira pio.
Nos ta bai haña un sorteo faborabel 14 di aprel pa ‘Kopa di Oro’ ku ta start na yüni. Nos a wòrdu klasifiká den e play-off den e grupo di 6 ekipo mas haltu rankiá. Esei ke mèn ku den e promé buelta nos lo topa un di e seisnan mas abow rankiá den e 12 nan ku lo lucha pa último tres kupo pa ‘Kopa di Oro’. E úniko pais den e seisnan aki ku lo por duna nos poko dolor di kabes ta Guadeloupe. Si e bin ku hungadónan na Fransia, e sobranan, St. Kitts, St. Lucia, Grenada, Puerto Rico òf Sint Maarten riba papel ta awa limpi. Después di esei nos lo topa Guiana Franses ku meskos ku nos a sali último den nan grupo di Liga A den kuadro di Liga di Nashon. Nan tambe, ku nos material, nos mester por. Si tin kos pa drecha pa yüni mester kuminsá awor. Nos tin mas ku 7 hungadó importante ku lo no por yega Mundial pa motibu di edat. Cuco Martina, Anita, Lachman, Leandro Bacuna, Kuwas, Janga i van den Hurk. Room ta e eksepshon pasobra kipernan hopi bes por bai te banda di 40 aña i Elroy ta un atleta disipliná. Nan tur lo ta alrededor di 35 aña òf mas na 2026. Nan por yuda nos sigur, un dos pa tres aña mas. Ta pesei for di awor mester kuminsá duna e generashon nobo oportunidat pa integrá den selekshon.
Futbòl ta wega di konhunto, kustumbrá ku otro riba tereno ta esensial, pero e organisashon rondo di e selekshon tambe mester ta transparente, konsekwente i kla pa e hungadónan i basá riba disiplina. Mester konsentrá riba resultado i no por sigui hasi kos pa komplasé bow di e kapa di ambiente, paso no ta fiesta nos ta bai, esaki ta tòpspòrt i tampoko por komplasé ku hungadó pasobra nan tin nòmber. E maneho mester ta kla i komprendibel pa tur hungadó si no bo ta bai hañabo ku grupo den grupo.
Otro kos tambe. Mester tene Konferensha di Prensa maske ta kòrtiku después di tur wega internashonal, pa Prensa por hasi pregunta i informá nos pueblo. Esei ta usual i normal den Futbòl internashonal. Nos ta spera ku tur e talentonan lo sigui bin i ku hasta nos lo logra di atraé mas. Pa e lastu aki ta nesesario pa hungadónan sinti ku ta bale la pena pa hunga pa nos i nan no mester sinti e diferensia ku nan ekiponan profeshonal, kaminda si ta regla di tòpspòrt so ta konta. E mihónan mester ta den selekshon. Pesei nos ta spera ku e biaha aki si lo inkluí entre otro Jearl Margaritha i Daijiro Chirino i ku Nigel Thomas lo duna nos prioridat, paso na yüni kampionato na Portugal lo a kaba.
SELEKSHON TIN FUTURO, PERO MESTER KABA KU KOMPLASEMENTU
Si nos tira un bista riba e lista aktual di nos selekshon, no por ninga ku tin futuro adén.
Aparte di Sherel Floranus i Giovanni Troupée ku ya ta profeshonalnan riba nivel, tin mas hóben talentoso den nos elenko nashonal ku tin futuro. Esnan mas destaká ta Godfried Roemeratoe (Hapoel Tel Aviv), Kevin Felida (RKC), Roshon van Eijma (Top Oss), Justin Ogenia (FC Eindhoven), Natangelo Markelo (Excelsior), Xander Severina (ADO) i Jeremy Antonisse (FC Emmen).
Roemeratoe (23) ta hunga na Israel i ta un bolante defensivo ku a militá den selekshon U-17 i U-20 di Ulanda. Ela hunga tantu pa FC Twente komo Willem II den Eredivisie kaminda ela akumulá 66 wega. E ta bon rekuperadó di bala i ta guli hopi kilometer. E lastu aki ta konta pa Felida (23) tambe. Felida tabata un sensashon den Keukendivisie ku FC Den Bosch, riba di dos nivel Ulandes. E tambe ta un bolante defensivo ku ta sera hopi buraku mei mei tereno i tin bon téknika. E aña aki ela bai Eredivisie ku RKC, pero pa su di malu e onsena básiko ta draai manera nunka i komo ekipo ku tiki invershon, a posishoná su mes pafo di e zona di peliger. Pesei e no a haña hopi oportunidat, pero ta serka di fòrsa un puesto mei mei di tereno, kaminda Anita tambe ta hunga. van Eijma (24) ta un defensor sentral ku poko poko pero sigur a krese den Keukendivisie Ulandes. Promé ku Roda JC i awor komo kompañero di ekipo di Jearl Margaritha den Top Oss, kaminda e ta estelar. Si mester e por hunga defensa riba ala robes tambe.
Justin Ogenia (24) tambe ta kanando un trayekto stap pa stap i por hunga diferente puesto, den bolante i ámbos banda riba ala. E por hasta hunga defensa lateral. E ta multi funshonal i sa haña pida regular den su ekipo. Markelo (24) ta un defensor riba ala ámbos banda, pero por hunga sentral tambe i den bolante. Ela hunga pa selekshon hubenil di Ulanda U-18 te ku U-21. Ku 17 aña ela bai Everton na Inglatera i a hunga den hubenil. E tin 26 wega hungá den Eredivisie ku FC Twente i Excelsior.
Severina (21) tin un bon kampaña e aña aki. E ta un hungadó di riba ala i lastu tempu sa hunga riba banda drechi pa e drenta i tira ku su pia robes. E tin un bon pase i un bon tiru den pia. Antonisse (20) ku a lanta for di chiki den PSV, e aña aki a hasi e traspaso pa Eredivisie ku FC Emmen, kaminda e ta hunga riba tur dos banda den atake. E tin un bon téknika individual i ta saka hungadó fásil. Su puesto preferí ta riba ala robes kaminda e por drenta i tira ku su pia drechi. Tin un hóben mas ku ta kompletamente inkomprendibel ku ela kai afó. Probablemente esun mas talentoso den tur.
Jearl Margaritha (22) di Top Oss. Un alero rápido ku ta un di e goliadónan den Keukendivisie. Un futbòlista ku ta hunga pa gol i ku ta difísil pa dèk. Jearl ta e goliadó di Top Oss. E mester ta sintá ta kibra su kabes na kas aworaki, kon bin ela kai afó, kaminda tin hungadó ku ta hunga nivelnan bow di dje, ku si a wòrdu selektá.
Otro mas ku no tabatin mag di kai afó pa hungadó di ménos kategoría, ta un talento di 21 aña Daijiro Chirino, ku a gana un puesto den bolante ku PEC Zwolle, e líder den Keukendivisie Ulandes. E por hunga tambe komo defensa sentral òf defensa riba ala drechi. No por komplasé hungadó pa simpatía i pone talento ku ta hunga muchu mas haltu den sala di espera. No tin splikashon si ta tòp spòrt nos ke praktiká. Bo mester ta hunga riba un sierto nivel mínimo pabo ta den selekshon di Kòrsou ku ke pretendé di yega Mundial, lokual no ta imposibel, si nos profeshonalisá i purba hasi tur kos padén i pafó di e selekshon, dirigi riba solamente resultado, kaminda no por tin lugá pa simpatía i komplasementu.
