Andres Hoyer, hòmber grandi di Futbòl di Victoy Boys a fayesé djaluna 26 di aprel. Un dje grandinan di Futbòl i di deporte ku na edat grandi ainda tabata bishitá deporte na Kòrsou.
Na 2002 Deporte Kòrsou a honra Andres Hoyer ku un entrevista. Federashon di Futbòl Veterano di Kòrsou e aña ei a dediká e kampionato aki na Sr. Andres Hoyer, un di e fundadónan di e ekipo Victory Boys ku tin más ku 70 aña di eksistensia.
ANDRES
Dominico Andres Hoyer a nase na Kòrsou 30 di novèmber 1930 i ta biba na Noord Santa Rosa 72. Dominico, mihó konosí komo Andres ta kompañá aktualmente ku sra. Paulina. Kasá di sr. Andres a fayesé. Andres su mayornan ta Bernardo Felipe Hoyer i Modesta Hoyer. Tur dos a fayesé. Andres a splika Revista Deportivo Kòrsou ku nan tabata 6 ruman.
Andres: “Ami ku un ruman di mi tabata hasi deporte. Mi tin eh eh... mi tin 10 yu. Mi yu Jubi, Miro Valerius i defuntu mi yu Churney Hoyer tabata hunga Futbòl”.
KOMIENSO
Andres: “Mi tabata hunga Futbòl for di tempu mi tabata bai skol. Mi a kuminsá hunga Futbòl mas o ménos ku mi 16 aña. Mi a hunga ku tim di skol hopi. Mi a lanta Victory Boys mesun tempu, ke mèn tempu ku mi tabatin 16 aña. Ami ku un par di tio ku primunan a lanta e ekipo. Mi tio tabata yama Elias Brunken, mi sua Hector Marceli, Ergo Marceli, Jan Aniceta, Venancio Gerard ets., ta nos a lanta e ekipo.
E aña ku Victory Boys a keda lantá ta 1949 mas o ménos. Nos a kumpli 50 aña algun aña pasá. Na aña 1952 nos a haña statüt. Mi a hunga Beisbòl den Cement Caribe tambe serka Tio Daou”.
VICTORY BOYS
“Victory Boys a keda lantá bou di palu. CSR (Centro Santa Rosa) di un pader (pader Nesens) a kibra, debí ku tur mucha mester a bai dienst. E ora ei nos a tuma e inisiativa, debi ku e tereno ta pará bashí, pa laga nos ban hunga Futbòl.
E mes tereno ku ta tereno di Victory Boys aworaki. E ora ei nos a disidí pa lanta un tim i kuminsá skòp bala. Nos no a yama e tim Victory Boys mesora, nos no tabatin nòmber. Nos tabata studia hopi kon nos bin nan un bon nòmber. Nos kera yamé Victoria Boys. Nos a pensa i bisa, hepa, un tim ku yama Victoria Boys mester keda gana ketu bai. E ora ei nos a skohe Victory Boys i kuminsá.
Nos tabata hunga parotin, despues a yega na 1950 i nos a bai Boneiru ku avion. Ayanan nos a hunga tres wega, gana dos i tabla unu.
Na momentu ku nos a bini Kòrsou nos a disidí ku nos ta bai bònt. Nos ta bai hunga ofishalmente, nos presidente Nisio Brunken a ninga redondamente pa nos bai bònt. Ela para riba ku nos ta bai pèrdè mahos ets. i e la bandoná e klup.
Ricardo Aniceta a bira presidente e ora ei. Nos a bai bònt mas o ménos aña 1951 / 1952 i hunga den C-klas. Promé wega nos a topa ku Asiento, un tim masha duru mes di Makamba nan. Nan tabata hunga riba tereno di Asiento dilanti di Shell. Nos a sorprendé tur hende ganando e tim aki ku skor di 4-2. Nos a hunga masha bon mes, pero nos a faya den e parti final i keda e aña ei den C-klas.
E siguiente aña si nos a klasifiká pa B-klas. Tabatin kaminda bònt a eksigí statüt i si bo no tin statuto bo no por hunga mas den bònt.
E ora ei nos a kore purá purá i nos a bai serka Caril Morkos i Freddy Rafaela di e ekipo di Jongbloed. Nos a fia nan statüt i hunga bou di Jongbloed. Nos a hunga un aña bou di nòmber di Jongbloed.
E sigiente aña nos a aserká Ricardo Elhage i Carlos Dip ku a regla statüt pa nos. Nos a haña e statutonan na 1952. Nos a bolbe bèk ku e nòmber Victory Boys.
Nos a bai A-klas i na aña 1972 nos a bai Hoofdklasse.
Mi a hunga semper den Victory Boys i mi a trein un biaha den selekshon. Mi a hunga tur puesto den Victory Boys. Kòrda ta kiper mi tabata dia mi a kuminsá hunga. Despues ku mi a haña un breuk, mi no a hunga kiper mas. Mi a bai hunga tur posishon e ora ei”, Andres Hoyer pila di Victory Boys ta konta Deporte Kòrsou.
HOOFDKLASSE
Andres Hoyer: “Na 1972 nos a subi pa bai Hoofdklasse i mi tabata entrenadó. Nos tabatin Max Phelipa den gol, Nochi Phelipa, Win Phelipa, Anibel Marceli, Virgilio Gerard, Neto Bernabela, Eithel Brunken, Siegfried Brunken i Humphrey ‘Bartje’ Koots, Humphrey Lucia i Churney Hoyer a bini despues. Churney a bini despues ku e tim tabata ariba.
Mi mes tabata traha na Hubert Salas, mi a traha 31 aña einan.
Victory Boys a sali supkampion i bai Concacaf ku bon resultado. Segun mi nos a bira kampion di Antias. Nunka nos no a bira kampion di Kòrsou den Hoofdklasse. Nos a yega hopi leu, pero Sithoc a gana nos pa pinalti.
Victory Boys a yega di baha bèk pa segunda divishon pa despues subi bek mesora. Un mener di skol tabata na kabes di e tim e tempu ei, pero e tim a subi mesora bèk pa promé divishon i keda einan pa basta tempu. Nos tin mas ku 20 aña sigur stret den Hoofdklasse.”
MI TEMPU
“Hungadónan ku mi tabata hopi bon ku nan tempu di mi tempu, tabata Enchi Jansen, Mordy Meulens, Edgar Meulens, Shon I Daal, Shon Ma Gomez, Gein Giribaldi, Orilio Hato, Eddie Vlinder, Shon Mi Krips, Ibi Jansen, Ga Bernadina ets.Un delantero ku mi tabata na mi dolor di kabes tabata un gai Doran ku tabata dal bo skein for djaleu. Nunka mi no a gana un premio individual, ma hunga kontra mas hungadó bon manera Natiti Martis, Shon Cheche Da Costa Gomez”, Domincio Andres Hoyer ta konta su tempunan bon.
ALGUN KOS HISTORIKO
Andres “Algun kos grandi ku mi ta kòrda ta un un gai ku yama Julio Iltes di Victory Boys ku tabata hinka 23 gol òf mas pa temporada den klase B i C.
Victory Boys tabatin un kiper Apolina ku tabata un portero espektakular. E mener aki tabatin un wowo so, pero tabata masha bon mes. Aworaki lástimamente e ta siegu. “
Andres a kòrda tambe den e wega kontra Barber pa bini ariba ku e goliadó di Victory Boys e tempu ei, Manito Tromp tabata manda e kiper di Barber ku tur sorto di bala. E kiper tabata kue tur. Direktor tékniko Andres Hoyer a hasi un kambio manda Norwin Phelipa riba linksbuiten ku a lora un bala ku Nochi Phelipa a kop manda gol pa asina Victory Boys subi pa Hoofdklasse. Tabata falta 5 minüt pa e wega terminá. Barber tabata dilanti 1-0, si Barber lo a gana nan lo a subi pa Hoofdklasse.
Andres Hoyer: “Otro kos di menshoná ta dia Victory Boys mester a hunga último wega kontra Sithoc pa disidí ken ta bai abou. Victory Boys a gana i Sithoc mester a bai abou, pero a lanta Fedeprof e aña sigiente i Sithoc a keda ariba.”
OTRO KOSNAN
“Mi hòbi fuera di Futbòl tabata bai wak kareda di kabai. Mi kolo preferí ta krèm i shinishi. Pa loke ta kuminda mi no ta distingí, e kuminda mester ta basta bon. E por ta funchi ku kalmèki mi ta kome pasobra ta kuminda e ta. Pa mi ta e kosnan ei ta kuminda. Ami ta kome funchi ku funchi mes gewon. Mi outo preferí tabata un Chevrolet Van. Churney Hoyer ku Bartje Koots nan aki tabata yam’é ‘Katreintje’. Ora mi drumi tempran Churney ku Bartje tabata kue e Katreintje bai kuné. Ku e Van ei mi tabata hala tur mucha bai tereno kuné”, Andres ta splika den un entrevista basta largu.
BON EKSPERENSIA
Andres: “Mi tin hopi bon eksperensia. Si mi sinti ku kos ta bira malu m’a bai. Mi bon eksperensia tambe ta pa bisa hende ora nan ta hasi un kos malu i nan tende i kos drecha. E kosnan ei ta bon eksperensia pa mi. Un eksperensia straño tambe ta un biaha, hopi tempu pasá ku nos mester a hunga bala riba stadion di Rif i mi tabata kapitan. Nos muchanan tur biaha ta bini lat. Wega ta kuminsá mitar di tres i nos no por kuminsá hunga bala, pasobra no tin niun hungadó. Awaseru a bira basha formal, formal mes i wega a para sin nos tabatin hungadó. Si awa no a kai sigur nos lo a pèrdè pa defolt. E otro bon eksperensia tabata ku e promé aña ku mi a bira DT e ekipo a sali kampion i subi pa Hoofdklasse. Despues di einan mi a stòp di hunga.
Bo no por hunga Futbòl i para DT pareu, por ta den otro deporte, pero den Futbòl ta difísil. Otro kos ta ku ora bo ta hungadó i tékniko. Si bo bisa un hungadó un kos ku ela hasi fout òf un hugada malu, bo mes tampoko no por hasi e fout ei. E ta bisabo ku bo ta mandami hasi’é, anto bo mes ta hasi kos robes pa drechi.”
MAL EKSPERENSIA
“Manera bo sa semper mayoria hungadó di nos tabata di Santa Rosa. Tabatin un gai ku a hunga malu i mi a saka e gai for di wega. E mucha hòmber a rabia mes. E wega ei tabata na stadion di Rif. E mucha hòmber a kita unifòrm riba vèlt kue su tas i bai. E wega tabata djadumingu i djamars nos a bai reunión. Mi a bisa e presidente ku nos no por sigui ku e gai ònbeskòp nan aki den tim. Kasi henter tim tabata di akuerdo ku e mucha ònbeskòp i nan a bisa ku nan tur lo bai si tuma medida kontra e mucha.
E presidente un mener Cannister e kuminsá bèk bisa ku mester keda ku e mucha i lag’é hunga. Ami a keda para ariba ku mester tuma medida i tur mucha, tur hungadó a disidí ku nan no ta hunga mas. Nan a bai anto djadumingu mester hunga e siguiente wega. Nos a laganan bai i mi a bai den Scharloo buska 11 hungadó i nos a hunga e siguiente wega. Di mes nos a haña un kuater mas ku por lora pa por si akaso.
Despues e mucha di Santa Rosanan a bini bèk, pasobra e muchanan di Scharloo nan a bai lanta un tim di Fleur de Marie.
Tur e hungadónan di Santa Rosa ku tabata malkontentu a bai Markita. Masha poko di nan a bin bèk Santa Rosa. Despues otro muchanan di Santa Rosa mes a bini bèk”, Andres ta konta su mal eksperensia.
AWORAKI
Andres: “Aworaki mi ta move banda di Futbòl Veterano. Mi ta presidente di Victory Boys Veterano. Un tempu mi a move den Santa Rosa Nabco tambe di Sòftbòl Fastpitch. Mi a keda 10 aña komo presidente di Nabco.
Eithel Mari tabata manager ku hungadónan manera su rumannan Colo Mari, Tuyu Mari i otro hungadónan manera Milto Martina, Toto Beaumont, Lipo Elhage, Che i Romoldo Martis.
Mi ta presidente aworaki di Victory Boys Veterano. Nunka mi tabata presidente di Victory Boys mes, semper mi tabata tesorero.”
KONTENTU
Andres Hoyer a bisa Deporte Kòrsou ku e ta hopi kontentu ku direktiva di Federashon di Futbòl Veterano di Kòrsou a dun’é honor dor di dediká e kampionato di e aña aki na su persona.
Andres: “Si, mi ta hopi kontentu, nunka mi no a traha den deporte pa haña nada bèk. Pero mi tin ku bisa ku e kos a kai di sorpresa pa mi i mi ta apresi’é un mundu. Mi ta kontentu tambe ku bo revista a bin entrevistá mi.”
MENSAHE
“Loke mi por bisa awor aki ta ku mi ta gosa esnan ku ta traha den Veterano. Nan ta traha ku alma i kuerpo, nan ta traha bon. Mi ke pa nan sigui traha asina ei sin mira nada personal. Si bo ta haña danki ta inesperá e kos ta bin. Pa loke ta e deportistanan, respetá rèfri, respetá bon direktiva i respetá otro hungadó. I duna tur ku tin den e deporte. Bosnan lo bira un bon hungadó sigur”, Andres Hoyer ta terminá.
