Apertura Torneo FABB na Sam Bunting Ballpark dediká na Roland Hooi
WILLEMSTAD- Djabièrnè 6 di yanüari tabatin apertura di Torneo FABB na Sam Bunting. Ekiponan ku un desfile a drenta tereno riba ritmo di brasband . Seguidamente Ernst Meyer motor tras di e torneo pa 24 piku aña kaba hiba palabra. Marshall ‘Chiki’ Osepa a huramentá e hungadónan siguí pa homenahe na Roland ‘Gengoe’ Hooi. MC, Glenn Thomas a pasa riba CV di e baluarte menshoná.
Despues a sigi orashon di Pastor Eugene Heybrecht. Representante di Minister di Deporte, sr. Errol Bisshop a dirigi palabra pa despues lansa promé bala, miéntras Darryl Rosheuvel di Hill Ros Casino tabata e kètcher i Gengoe Hooi e batiadó. Despues ekiponan a baha for di tereno, saludá e públiko presente i e baluartenan. Despues di apertura ofishal e ekipo Montanja Ariba a enfrenta Montanja Abou den kategoria Little League. Varios organisashon di Beisbòl Little League tabata presente na e apertura ku a tuma lugá dilanti un públiko grandi.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bondia. Hopi interes di ekiponan pa partisipá den Torneo Survivors/The Greatest. Torneo ku ta start djasabra 21 di yanüari i terminá djadumingu 12 di febrüari. E torneo ta start riba tereno di Post 6 i Buena Vista pa terminá na Van Engelen Ballpark. Ta solamente riba e promé wikènt lo hunga na Post 6 i Buena Vista. Nos ta pendiente di skèdjel di e organisadónan. Varios ekipo di COED a mustra interes pa partisipá na e torneo. E kategoría aki no tabata den e plan di e organisadónan, pero si ekiponan yega 4 òf mas, lo hinka e kategoría aki tambe adén. Parse ku ya tin 3 organisashon ku a mustra interes.
* * * * *
Nada ainda di kambionan na kaminda pa loke ta trata Beisbòl Dòbel A. E dianan aki ta partisipashon na Seri del Caribe ta dominá. E seri aki lo tuma lugá na Caracas di 2 pa 10 febrüari ku partisipashon rekòrt di 8 pais. FEBEKO ta moviendo den gran forma pa yega na un ekipo ku por kompetí kontra grandinan manera Venezuela, República Dominicana, Meksiko, Cuba, Colombia ets. Colombia a bai masha dilanti mes den Beisbòl. Colombia ta number 11 riba ranking di World Baseball & Softball Confederation. E promé 10nan ta Hapon, Chinese Taipei, USA, Korea, Meksiko, Venezuela, Hulanda, Cuba, República Dominicana i Austria. Despues di Colombia ta sigi Panama, Puerto Rico i Canada. Kòrsou ta number 33. Mientras tantu lista di e promé 14 hungadonan di Selekhson di Reino ku ta partisipa na Wolrd Baseball Classic a sali. Ta trata di e prome 14-nan di e lista provishonal di 50 di WBC.
Nos Big Leaguernan su nòmber ta aparesá. Riba potret algun estrea di 2017.
* * * * *
Ata e nòmbernan aki 1.Kenley Jansen, 2. Xander Bogaerts, 3. Jonathan Schoop, 4. Chadwick Tromp,5. Didi Gregorius, 6. Jurickson Profar, 7. Andrelton Simmons, 8. Coco Balentien, 9. Richie Jordan Palacios, 10. Joshua Palacios,11. Shairon Martis,12. Lars Huijer, 13. Ceddanne Rafaela, 14. Pedro Strop. Manager: Hensley Meulens Bench coach:Andruw Jones Pitching coach:Bert Blijleven Hitting coach: Tjerk Smeets Bullpen coach: Mike Harkey Ass hitting:Sharnol Adriana Firstbase : Eugene Kingsale Thirdbase: Ben Thijssen QC: Evert Jan 't hoen.
Awe nos ta duna un pida relato di Sedney ‘Jacky’ Jakoba. Jacky Jakoba a nase na Kòrsou 25 di sèptèmber 1961 i a fayesé 17 di desèmber 2022 na edat di 61 aña. Jacky ta ruman di Wenny, Rignald ‘Plies’, Arnold ‘Gimbo’ , i Roy Jakoba i su primunan ta Ludwig, Richi, Nelly Jakoba i Fied Jakoba. Wenny Jakoba na 1969 a bira kampion bate ku averahe riba .400. Jacky a lanta den bario di Santa Maria ku ta e kapital di Beisbòl na Kòrsou. Jacky a hunga den ekiponan Ritz, Malta Amstel, Winston i a laga marka atras den 1970, meskos ku otro ekiponan di Little League di Santa Maria i algun hungadó. Nos tabata bai wega na Stadion di Rif i mira Jacky ta konektá homerunnan feros ku apénas 17 aña den e ekipo Santa Maria Pirates.
* * * * *
Jacky a kambia di ekipo Santa Maria Pirates i bai den ekipo Alpha Zelbo na 1982 i bira kampion. Jacky a hunga 24 partido i hunga primera, segunda, shortstop, leftfield i rightfield. Jacky a bati .439 i konektá 5 homerun, 6 doblete i empuhá 22 kareda i anotá 27 kareda. Ela poncha na solamente 10 okashon ku ta un averahe di 1 ponche den kada 8 turno ku ta un tremendo averahe pa un persona ku un super poder. E aña ei Jacky tabata lider ku 9 base robá, lagando lidernan manera Eithel de Caster i Alvaro Ascencion su tras den e ekipo Alpha Zelbo. Nos lo sigi tiki tiki riba e historia di Jacky Jakoba den Alpha Zelbo kompilá pa Kenneth Gijsbertha. A dera Jacky dia 31 di desèmber na Hulanda.
* * * * *
Kosnan ta kayente den Liga 60+ di Sòftbòl di Kòrsou. No ta verwagt asina tantu kambio den Liga 60, pero ta asina mes. E ekipo kampion Jaws a anunsiá un direktiva nobo, pero diripiente tin un exodus den e ekipo. Hungadónan grandi a bisa ku nan lo bai otro tim den 2023, segun informashon di fuentenan fededigno ku nos tin. No tin muchu detaye dikon e hungadónan ta bai, pero e fuente a bisa ku e ambiente den tim a bira poko straño. No ta parse, debí ku tabata reina un tremendo union den e tim den e final kontra Nos Tambe Por, kaminda e ekipo a bira kampion.
* * * * *
Nos a bai bèk den tempu 5 aña pasá riba e asuntu di 50+. Beisbòl Liga 50 a move basta bon den 2017, pero mester remarká ku por mihó si. Den final e asuntu a drecha un tiki ku wega kayente entre Jandoret Raiders i Yesterday, dos ekipo 50+ di bario Jandoret. Raiders a gana Yesterday 4 pa 2 i bira kampion den un tremendo partido dilanti un bon públiko. E wega a tuma lugá un siman despues ku e kampionato di 40+ a terminá.
* * * * *
Pa 2018 mester a bai wak kiko ta bai pasa ku e kampionato di 50+ ku no a drei masha bon durante temporada regular. A resultá bèrdat ku den 2018 no tabatin kampionato. Kosnan ta pinta straño tòg pa loke ta 2023 den Liga 50 di Beisbòl Veterano. Nos ta keda te aki pa awe.
