Aqualectra Brandweer SDKK MCB ya ta den final di Torneo Hope 2025
Ta pendiente di resultado di ekiponan COED i Soshal Femenino.
Semi-final i Final Torneo Hope ku Grik i One Flavas
WILLEMSTAD – Djasabra i djadumingu ta e último fechanan di Torneo Hope 2025. Djasabra tin 8 wega di semi-final, miéntras djadumingu tin final den 5 kategoria. Aqualectra Brandweer SDKK MCB ya ta den final di Torneo Hope 2025. Ta pendiente di resultado di ekiponan COED i Soshal Femenino. Djasabra entre 6 i 9 ta Agrupashon Musikal Grik i djadumingu ta One Flavas di 6 pa 9. Nos resultado di algun wega i kema di e weganan di wikènt awor.
Djasabra 26 di aprel
10.30 Brandweer 14 , SOAB (Soshal) 5
12.00 SDKK/GGZ 8, —CRU (40+) 3
13.30 Aqualectra 8 – MCB (40+) 9
15.00 Aqualectra 1 – 9 Belastingdienst (Soshal) 3
16.30 CITCO – ORCO (COED)
18.00 SBAB - -MCB (COED)
19.30 SBAB – CITCO (Fem.)
21.00 CMC/ADC/MNO – Onderwijs/HS Import (Fem.)
Djadumingu 27 di aprel
12.00 Final 40+ SDKK/GGZ - MCB
13.45 The Living Legends – Fridays (final Open)
15.30 Final COED
17.15 Final Brandweer/CAP – Aqualectra
19.00 Final Femenino
Torneo Quality Stars ku partisipashon di 6 ekipo
WILLEMSTAD- Torneo Quality Stars ta start djasabra ku partisipashon di 6 ekipo na Vi Jansen Ballpark. Lo tin wega djasabra i djadumingu entre ekiponan di Beisbòl Veterano 40+. Djasabra tin dos wega i djadumingu tambe tin dos wega. Djasabra 26 di aprel 11.30: Broncos – Quality Stars, 14.30 Yesterday – Santa Maria. Djadumingu 27 di aprel 11.30: Quality Stars – Marlins, 14.30 Azucar – Yesterday.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bondia i felis wikènt. Felis Dia di Rei awe i mayan tambe. Fin di siman karga ku aktividat deportivo, soshal i kultural. Pa loke ta e eventonan ku nos ta skibi, Torneo Hope 2025 lo tin weganan semi-final djasabra i final djadumingu. Djasabra ta Grik i djadumingu ta One Flavas. Hope 2025 tabata super eksitoso i práktikamente tabata yen tur dia espeshalmente e último 3 wikèntnan aki kaminda grandinan a kuminsá topa otro. Torneo di Beisbòl Veterano organisá pa Quality Stars ta start djasabra i sigi djadumingu. Torneo Lions tambe ta start mesun fecha i ta sigi djadumingu i despues djweps ku ta Dia di Obrero.
* * * * *
Nos a risibí vários informashon pa loke ta trata Kopa ABC&S di e hóbennan ku lo tuma lugá na Kòrsou di 28 di mei pa 1 di yüni. 4 ekipo di Aruba, 3 di Boneiru, 3 di Kòrsou, 4 di Sint Maarten i 1 di Sint Eustatius lo kompetí den e ABC&S ku ta organisá pa ekiponan Terremoto i Swift. Ta trata di e di 39 kopa ABC ku ta keda organisá. Nos amigu Chai Curie huntu ku Ronnie Gomez a start ku e kopa ABC. E promé kopa ABC tabata na Kòrsou na aña 1984, kaminda ekipo Terremoto a bira kampion i despues di einan Terremoto ekipo ku a start ku e Kopa ABC&S bou di direkshon di Chai Curie nunka mas a logra gana un Kopa ABC.
* * * * *
Un tempu e fuerte ekipo di Astros di Aruba a gana Kopa ABC 6 aña sigí entre 1989 pa 1994. Swift no a logra empatá e rèkòrt ei. Nan a gana Kopa ABC na 2016, 2017, 2018, 2019 i 2023. 2023 e kampionato a tuma lugá na Kòrsou kaminda Swift a gana ekipo Cicoza den final ku Van Engelen Balllpark de bote en bote. Swift no a logra kibra e rèkòrt di Astros ku riba e añanan menshoná a gana 6 Kopa ABC sigí. Na 2024 ekipo Cicoza a tuma revancha ganando Swift den final na Sint Maarten. Einan Andrelton Simmons a pone pelíkula den short ku hugadanan senshonal den e wega final. Remarkabel ta ku Sint Eustatius tambe lo tei ku un ekipo di e ekipo ABC&S . Ekipo Thunders lo representá Sint Eustatius.
* * * * *
Torneo Lions ta start mayan na Frank Curiel Ballpark i nos tabatin e skema den e edishon di djarason. Ekiponan di 50+ i 60+ ta kompetí den e torneo aki ku lo terminá dia 4 di mei na Frank Curiel Ballpark. Na mesun momentu lo tin Torneo Quality Stars na Vi Jansen Ballpark i nos tin e skema huntu ku un artíkulo. Tin rumor ku ekiponan di Beisbòl Veterano no ke terminá e kampionato di 2024. Parse ku Isla Crackers a hala atras, pero niun hende no por a konfirmá e notisia ei serka nos. Un hungadó di ekipo Isla a bisa ku e no a tende nada i lo bai train normal ku e ekipo.
* * * * *
Tin indikashon ku tin hende, dirigente ku ke pa e play-off di 2024 ku mester tuma lugá den luna di mei aki keda suspendé. Nos no ta mira un motibu pa suspendé e play-off i tin chèns hasta ku por terminá e play-off den dos siman si ekiponan swip tantu den semi-final komo den final. E tim ku no ke bini ta pèrdè pa defolt i e otronan ta hunga e play-off, p’asina terminá e kampionato di 2024. Si e kampionato no terminá lo ta promé biaha den hopi aña ku no tin un kampion.
* * * * *
Den temporada di COVID 2020 i 2021 kampionato a sigi normal kaminda ekipo Quality a bira kampion na 2020 i despues Santa Maria Pirates na 2021. Nos ta keda pendiente di e desaroyonan. Wikènt benidero nos lo ta na Van Engelen Ballpark, Vi Jansen Ballpark i Frank Curiel Ballpark pa sigi desaroyo di e weganan pa nos tin detaye e siman benidero. Miéntras tantu basta kambio den Beisbòl Dòbel A pa loke ta trata reglanan, espeshalmente asuntu di estranhero kaminda ekiponan por usa un picher estranhero den nos Beisbòl Dòbel A. Hungadónan ku tin pasport Hulandes no mester partisipá na ekis kantdat di wega pa por hunga kampionato. Nos ta keda te aki pa awe i te mayan ku Poder di Dios.
