Wikènt final di Torneo Hope ku grupo Grik i One
WILLEMSTAD- Torneo Hope 2025 lo ta den gran forma e wikènt aki ku animashon di Grupo Grik djasabra i One djadumingu. Djasabra tin weganan semi-final i djadumingu tin final. Djasabra último tabatin algun wega kandela den e kategoria Soshal Maskulino kaminda ekiponan Aqualectra, Brandweer i SOAB a klasifika pa semi-final. Ta pendiente pa e mihó pèrdèdó den e kategoria aki. Lo tin semi-final i final den e kategorianan 40+, COED, Soshal Femenino è wikent aki. Den kurso di siman nos tin mas detaye di último wikènt Torneo Hope 2025.
WILLEMSTAD – Djasabra 26 di aprel lo start ku un torneo di Beisbòl Veterano organisá pa ekipo Quality Stars. E torneo lo tuma lugá na Vi Jansen Ballpark i ta konta ku partisipashon di 6 tim di Beisbòl Veterano. E gran torneo lo terminá djadummingu 4 di mei ku wega pa di 3 lugá pa 11.30 i wega final pa 14.30. Ekiponan ku ta partisipá ta Quality Stars, Broncos, Yesterday, Santa Maria, Azucar i Yesterday. Tur ekipo por reforsá ku 2 hungadó ku tin 38 aña òf mas ariba. Lo tin un ‘fundraising grill’ miéntras bar i kushina lo ta bon surtí. E torneo ta pone nos rekordá hungadónan di ántes manera Rudsel Poulina, Wenny Jakoba, Mirto Martina, Jozef Martina, Bencho Imperator, Nelson Gutierrez, Ushley Kirindongo, Kenneth Gijsbertha, Frank Curiel i Antonio Keller.
Ekipo Un Kara pa Aruba di 23 pa 28 di aprel pa Torneo 30+
WILLEMSTAD – Di 23 pa 28 di aprel ekipo di Sòftbòl Femenino Veterano, Un Kara lo ta na Aruba pa partisipá den un torneo ABC+ . E torneo ta organisá pa Sweet Devils i ta konta ku partisipashon di ekiponan di Isla ABC. Canada tambe mester a partisipá, pero nan a kanselá na último ora.
Un Kara ta un ekipo super popular den islanan ABC i tin hopi título di Liga di Nos Tur i títulonan riba nivel di Dutch Caribbean. Ekipo Un kara lo reforsá ku Lucy Hooi i Rachel Koeyers di Hulanda i Janitza Betrian di Kòrsou (Sin Strès). Gerald Martina ta general manager i alabes manager di e super eksitoso ekipo aki. Nos ta pendiente pa mas informashon.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bondia i felis siman. Djasabra último tabatin algun wega kandela den fase final di Torneo Hope 2025. Faboritonan grandi manera Aqualectra i Brandweer a gana nan kontrinkantenan relatívamente fásil. Aqualectra 1 a dal SVB/Aventa 14-4, Brandweer/CAP a gana Belastingdienst ku skor di 9 pa 4. Norvaniel Aniceta a destaká pa Aqualectra ku dos homerun i Hensly Martha tabata tremendo pa Brandweer bayendo di 3-2 ku homerun i 5 kareda empuhá. Den e otro weganan di e kategoria Soshal Maskulino, SOAB gana di Banco di Caribe/ Ennia 13-7. Tabatin vários wega di buelta pèrdèdó tambe den e kategoria aki.
· * * * * *
CGA a gana di Selikor ku skor di 4 pa 1. VVRP a derotá Jansen De Jong 7 pa 5. FDDK a gana Keyfin 4-2. Pa loke ta e kategoria COED, SBAB a gana CMC/ADC 10 pa 2. MCB a gana SOAB 9 pa 5. CITCO a gana di ORCO/SSC 5 pa 4. CGF a derotá GGZ/De Dames 7 pa 6. Keyfin a dal RBC /JM Guru 8 pa 5. Wikènt benidero ta e ultimo dianan di kompetensia di Torneo Hope 2025. Den kurso di siman nos tin detaye i skema kon ta bai sigi. Bon públiko djasabra atrobe ku aktuashon di e agrupashon musikal ritmiko Hoben na Timon. Den Torneo Hope 2025 tabatin fecha sin banda ku a hala masha hopi fanátiko na Van Engelen Ballpark.
* * * * *
Fin din siman benidero ta start ku Torneo Quality Stars ku ta konta ku partisipashon di 6 ekipo di Beisbòl Veterano. Den un artíkulo riba e página aki nos tin detaye di e torneo aki. 3 di e 4 ekiponan ku ta den e play-off lo partisipá na e torneo aki. Ekiponan Santa Maria, Quality Stars i Yesterday ta den e torneo. Tin indikashon ku ekiponan no ta masha interesá den hunga play-off di 2024 awor aki den 2025. Informashonnan ku nos a risibí no ta ofishal i nos ta bai chèk ku presidente di BVEKO kua ekipo a kanselá nan partisipashon. Torneo Lions tambe ta start e wikènt aki i ta konta ku partisipashon di ekiponan 50+ i 60+. Nos tabatin detaye siman pasá di e torneo Lions ku pa promé biaha tin partisipashon di ekiponan di 50+ tambe den e torneo aki. E ekiponan ku partisipá ta haña un wikènt di wega promé ku start ku kampionato di 50+ na Van Engelen Ballpark. Weganan di Torneo Lions ta na Frank Curiel Ballpark.
* * * * *
Ekipo Un Kara dirigí pa Gerald Mathilda ta rumbo pa Aruba pa partisipá den un torneo Dutch Caribbean. E ekipo lo move dia 23 di aprel. Saludo pa Pepi Martis alias “Jug Norris” un dje grandinan di Sòftbòl Slowpitch tempu di su tempu i último añanan ku ekipo Un Kara. Pepi Martis huntu Gerald Mathilda i Jadira Pieterzs (QEPD) a funda e eksitoso ekipo Un Kara ku tin vários título di Liga di Nos Tur i algun título di Sòftbòl Slowpitch Veterano Femenino riba nivel di Reino. Saludo pa eks gobernadó Freddy Refunjiol na Aruba i pronto nos ta spera mas informashon di Sòftbòl 50+ for di Aruba.
* * * * *
Preparashon pa Liga 50 ta sigi e siman aki, tur traspaso mester ta kla i listanan definitivo mester ta den. Hopi espektativa pa ekipo Catpower/ Jandoret Raiders ku naturalmente lo bini fuerte mirando resultado di e dos torneonan ku tabatin, esta Amstel Bright Premier Cup i despues Torneo Boy Constancia organisá pa Pitufos. Jandoret Raiders a gana e dos torneonan ei i lo sigi den Torneo Lions e wikènt aki den kategoria 50+. Direktiva di Liga 50 ta enkabesá pa Gilbert Keller ku ta bai pa su di dos aña komo presidente. Keller a bisa durante un reunion general ku despues di e periodo aki e lo hala atras pa traha lugá pa un otro presidente.
* * * * *
Norwin Sor’ Moesquit den pitu a pasa di Catpower pa ekipo Baranka den 50. Tin algun kambio mas, entre otro Baby Alcantara ku a bai Marlins. Roque Zimmerman ku a hunga Amstel Bright Premier Cup ku ekipo Ban Serio a bai bèk Pitufos. Ekipo Pitufos tin un tremendo 1-2 batiadó slengu ku ta Roque Zimmerman i Quincy Kook. Nos ta keda te aki pa awe i te mayan ku Poder di Dios.
.
