Awe djarason 5 di yüni Kòrsou vs Barbados den futbòl rumbo pa Mundial 2026
WILLEMSTAD Djarason 5 di yüni 2024 nos selekshon nashonal lo tin su promé partido di kualifikashon pa Mundial di FIFA kontra Barbados. E partido aki lo tuma lugá mitar di 8 di anochi den Stadion Ergilio Hato. Despues di nos partido di djarason, nos selekshon lo biaha pa Aruba pa topa Aruba dia 8 di yüni 2024 den Centro Deportivo Guillermo Prospero Trinidad pa 8’or di anochi.
Djamars nos selekshon ta tin su último seshon di training ku a kana zetá. Nos hungadónan ta hopi animá i ta mentalmente ku físikamente bon prepará pa saka nos kara mañan. Nos último hungadó Rhu-Endly ‘Cuco’ Martina tambe a yega i nos selekshon ta kompletu pa nos partido di mañan.
Nos lo tin karchinan disponibel na e lokètnan di SDK for di 10’or di mainta te anochi ora di wega. Portanan di stadion ta habri for di mitar di 6 di atardi, pues yega trempan pa evitá stagnashon na porta. Entrada general pa e partido aki ta kosta fl.25 pa adulto miéntras mucha di 6 pa 12 aña i 60+ ta paga fl.15,-. VIP ta kosta fl.125 ku konsumo inkluí.
Nos tremendo ‘fan zone’ lo ta habrí di mitar di 6 di atardi 7:15pm dilanti Stadion Ergilio Hato pa un i tur por gosa promé ku e wega. Por disfrutá di músika di DJ T Tesseling i dal un serbes, un refresko òf un bon plato serka Pomm’s i partisipá pa gana diferente premio pa kortesia di Changes i YDK! Un ambiente tur afó komo antesala di e tremendo partido di nos selekshon nashonal i Barbados!
Tur kos ta kla pa nos selekshon nashonal su promé partido di kualifikashon pa Mundial di FIFA kontra Barbados. Abo so falta ta bin animá i apoyá nos hungadónan durante e partido aki...nos ta topa den stadion mañan!
FFK ta deseá nos selekshon tur klase di éksito!
CUCO I JURGEN A YEGA
Tiki tiki pero sigur nos ta yegando djárason 5 di yüni kaminda nos selekshon nashonal lo enfrentá Barbados durante nos promé partido pa kualifikashon pa Mundial di FIFA.
E partido aki lo tuma lugá den Stadion Ergilio Hato pa mitar di 8 di anochi i portanan ta habri for di mitar di 6 di atardi. Despues di nos partido di djárason, nos selekshon lo biaha pa Aruba pa enfrentá Aruba dia 8 di yüni 2024 den Centro Deportivo Guillermo Prospero Trinidad pa 8’or di anochi.
Gran mayoria di nos selekshon a yega 28 di mei último peró awe nos penúltimo hungadó, Jurgen Locadia a pisa suela di Kòrsou pa djòin nos selekshon i prepará pa nos partido di djárason.
Nos último hungadó Rhu-Endly ‘Cuco’ Martina tambe ta yega pa nos selekshon ta kompletu pa nos próksimo partidonan.
E SELEKSHON TA SUFISIENTE PA BARBADOS I ARUBA
(skibi pa Pepi Sulvaran)
E dos prome kontrinkantenan
Riba papel ‘Pantera Negra’ tin un komienso fásil riba ruta pa mundial 2026. Numbernan 177 Barbados i 193 Aruba no ta esnan mas fuerte riba plataforma mundial. Nos selekshon ku a sak último añanan i awor ta rankia 91 riba mes lista di FIFA, no mester tin problema pa obtené 6 punto. Mester hunga bala si, kòrda e lès di St. Kitts. Ni Barbados ni Aruba no tin hungadó di peso. E úniko futbolista di Barbados ku ta bale la pena menshoná ta Thierry Gale un delantero talentoso di 22 aña di Rapid di Vienna den Bundesliga Oustriako. Pero e ta leshoná for di febrüari 2024 i lo no tei den ‘Ergilio Hato’ dia 5 di yüni. Barbados ta bin di pèrdè ku Santo Domingo 5-0 i 5-2, ku Nicaragua 4-0 i ku Montserrat 4-2. Nan rèkort kontra pais Kòrsou si ta pareu 1 gana 1 tabla i 1 pèrdi. Nos a pèrdè 1-0 ku nan na mart 2016 bou di Kluivert. Aruba ta mas o ménos di mes nivel. Lewis un veterano ku a kuminsá komo delantero den hubenil di entre otro Ajax i AZ i awor ta hunga riba nivel amateur na Ulanda ta un di e mihónan i awor sa hunga defensa. Tambe nan tin algun hubenil di nivel for di Ulanda, di Excelsior Need i Molina, van Kilsdonk di NEC i Perret Gentil di Vitesse. Aruba ta bin di pèrdè 2-0 kontra Santo Domingo.
Kompletu Eredivisie
Di su banda Advocaat por harma un onsena di kual kasi tur tin eksperensia den Eredivisie. Room kiper, Cuco Martina i Gaari komo sentralnan, e halfnan Brenet i Floranus. Dos bolante kontrolado dilanti defensa, Roemeratoe i Leandro Bacuna. Nan dilanti un linea di bolante ofensivo di tres, ku Gorré i Xeverina riba ala i Juninho Bacuna mei mei i un punta di lansa, Janga òf Locadia. Si Cuco no yega na tempu i fit debí na play-off na Ulanda, Leandro sentral i Felida na su lugá den bolante. Locadia for di mart a hunga solamente 36 minüt, pero pa e weganan aki esei no ta mustra un problema.
Sistema di wega
Normal selekshon a kustumbra hunga 4-2-3-1. Tur kos ta depende di e material. Kontra ekipo debil por skohe pa un defensa di tres. Advocaat a purba esei na Turkia i no a bai malu. Den kaso ku e hunga 3-4-3, tantu Gorré komo Severina i Margaritha por ta den wega, paso por tin kuater alero. Esei ta un formashon hopi ofensivo. Meskos ku un 4-4-2 òf 3-5-2 ku Janga i Locadia. Tur variashon por kontra e kontrinkantenan aki.
Duna sanger nobo chèns ku bista riba futuro
E weganan aki ta oportunidat pa mira hoben manera Severina (Partizan) ku tabatin un bon temporada na Serbia i Margaritha (Sabah) ku ta hunga na Azerbijan den akshon. Pero tambe Felida (RKC). Nan ta futuro di e selekshon. Margaritha i Severina por hunga riba ala den atake i Felida komo bolante defensivo. Markelo tambe por haña chèns den defensa pa e por akoplá den e ekipo. Ahinda e ta den Eredivisie i pa CONCACAF sigur tin e nivel. Mester kuminsa rehubenesé na tempu. Cuco (34) i Anita (35) apesar di ta den bon kondishon ahinda, ta basta veterano i no sa kuantu mas nan por wanta e nivel. Tin algun hungado tambe ku ta birando veterano i bayendo di mas pa menos, Janga (32) i Kuwas (31), pero tambe no veterano manera Kastaneer i Locadia. Nan futbòl no ta lokual e tabata mas. E problema ta ku Advocaat i su grupo no a mustra kapas di por atraé hungado nobo di nivel pa nos riba nan mes.
Preguntanan kritiko i konstruktivo
E lista preliminar di 30 a inkluí talento ku por kompetí pa puesto. Martha, Chirino, Souren i Antonisse. Djies algun dia después nan no ta riba e lista definitivo. A puntra nan adelantá si nan lo tei sigur promé traha lista? E status di Martha ta insigur. Ela skohe bèrdat pa nos? Chirino un defensa, ta kresiendo na Spaña. Souren, bolante sentral, ku su 24 aña ta por lo menos di mes nivel ku Roemeratoe i Felida. Jeremy Antonisse ta hunga den Primeira Liga na Portugal. Nan niun no a bin i lo tin motibu, pero tin amateur veterano di nivel 4 na Ulanda den selekshon. Ta hungado profeshonal no por haña? Tin mas pregunta. Kuwas for di desèmber no tin ekipo, Antonisse ta den e divishon máksimo na Portugal. Kiko ta e kriteria pa selekshoná Kuwas riba Antonisse? Nos a ripará ku for di dia e kuerpo tékniko aki a bin, Antonisse no a pone su mes disponibel mas. Esei ta lanta pregunta, paso e miembro di staf, Sinouh, kual relashon a kibra, tabata su eks agente. Por ta koinsidensia, pero ta bon pa sa e motibu. Bin apoya bo selekshon día 5 di yüni den nos kueba di ‘Panter’ na Brievengat. E promé 3 punto mester ta pan den kas. ‘Pantera Negra’ mester di nos riba ruta pa mundial 2026!!!
%20copy.jpg)
