Bala Brothers Ban Serio i Cicoza ta sigi gana den Amstel Bright Premier Cup i weganan ta sigi e wikènt aki
WILEMSTAD- Amstel Bright Premier Cup a sigi den wikènt ku weganan riba djasabra i djadumingu. Bala Brothers a gana Tune Squad djasabra 11 pa 4 i djadumingu e ekipo a gana The New Radiator 14 pa 9. Den e parti di 50+ Ban Serio a gana Jandoret Raiders 5 pa 3 djasabra i gana Sluggers 15 pa 2 djadumingu.
Ban Serio a sali pèrdè e promé wega kontra Jaws 14 pa 6 na komienso di e torneo i despues no a pèrdè mas. Cicoza a gana Swift ku skor di 15-10 den e kategoría Challenger. Den 40+ ekipo Twister a sorprendé Cicoza ganando ku skor di 12-9. Cicoza ta supkampion di 40+ di temporada pasá i ekipo Twister a sali na di sinku lugá. Amstel Bright Premier Cup ta sigi wikènt benidero na Van Engelen Ballpark.
Awe djaweps tin dos wega i djabièrnè 6 wega, djasabra 16 wega i djadumingu tambe 16 wega. Nos tin e weganan riba e skema den e artikulo.
RESULTADONAN
Twister 12, Cicoza 4
Chonchies 15, New Stars 4 (COED)
Bala Brothers 11, Tune Squad 4 (COED)
Bala Brothers 14, The New Radiator 9 (COED)
SBAB 12, BDC 9
Brandweer 22, CPA/Fraal 2
MCB 16, C Post 1
Jaws 6, Sluggers 0
Ban Serio 5, Jandoret Raiders 3
Ban Serio 15, Sluggers 2
Jaodret Raiders 5, Jaws 1
Cicoza 15, Swift 10
Twister 12, Cicoza 9 (40+).
Jaws 6, Los Amigos 1
Los Amigos 6, Nos Tambe Por 1
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bontardi. Awor e kos ta bai sinta pa loke ta trata temporada di karnaval. Tur aña despues di Festival di Tumba e kos ta bai sinta ku e jump-in nan rumbo pa Marcha, Hubenil i e marchanan final. Nos tin dos siman ainda pa prepará pa Marcha Hubenil. Djasabra i djadumingu nos tabata na Van Engelen Ballpark den kontinuashon di Amstel Bright Premier Cup. Djabièrnè no tabatin wega debí na final di Festival di Tumba. Pabien alsnog na Jefdaney Manuela ku a bira Reina di Tumba. Bon meresí pa e hóben aki ku algun aña ta profilá masha bon mes.
* * * * *
Djasabra ei, den Amstel Bright Premier Cup tabatin wega entre ekipo Cicoza i Swift. Ta trata aki di dos grandi di Kopa ABC&S di e hóbennan. Na 2015 Cicoza a kita e título for di Swift i na 2024 Cicoza a bolbe bira kampion. Aña 2016, 2017, 2018, 2019, 2022, 2023 Swift a bira kampion di Kopa ABC&S. E aña aki Kopa ABC&S di e hóbennan lo tuma lugá na Kòrsou na Van Engelen Ballpark. Ta antisipá un final entre Cicoza i Swift atrobe manera tabata e kaso na 2023 i 2024. En todo kaso bon ambiente na Van Engelen Ballpark den wikènt den Amstel Bright Premier Cup kaminda e veteranonan di 40, 50 i 60 por djòin e hóbennan den ambiente di Soshal/Komersial i tambe COED.
* * * * *
Hopi di e 40 i 50 di algun aña pasá a pasa pa 60. Nos ta kòrda na 2018 Winston ‘Killer Kiri’ Kirindongo a bai hunga pa ekipo Pitufos, siendo e tabata den Ban Serio. Killer Kiri a bati di 3-3 ku 2 homerun i 6 RBI den final kontra di (su èks ekipo e momentunan ei) Ban Serio. Den e promé wega nos ta kòrda ku tabata kontra di Jaws na Buena Vista Ballpark Kiri a dal 3 homerun. En todo kaso despues Kiri a bai riba lista di Pitufos den Torneo Amstel Bright, pa despues mester a move pa Ban Serio bèk. Nos no sa ku Winston Kirindongo lo hunga den Ban Serio 50+ den 2025.
* * * * *
E tempu ei kos tabata kandela entre Pitufos i Ban Serio. Myron Wijman a hunga Torneo Survivors ku Baranka i despues a keda aserká pa Ban Serio pa djòin e ekipo. Myron Wijman no por a hunga den final pa Ban Serio, debí ku e no tabata riba lista di Torneo Amstel Bright durante e torneo. Pitufos a gana pèrtá, pues kaminda Myron por tabata e diferensia. Na 2018 Myron Wijman a hunga pa Jandoret Raiders i tabata klave huntu ku vários otro mas den e viktoria di Jandoret pa bira kampion Torneo Survivors. Esei ta historia kaminda den tempran hungadónan ta skohe pa bai hunga den e ekipo ku nan ta deseá durante torneonan.
* * * * *
Pa loke ta trata Serie Del Caribe, República Dominicana representá pa ekipo Leones del Escogido ku nan manager Albert Pujols a bira kampion di Serie del Caribe 2025. Djabièrnè na momentu ku aki na Kòrsou nos tabata disfrutando di e gran final di Festival di Tumba, Leones de Escogido a gana 1-0 den e gran final kontra Charros de Jalisco di Meksiko. Tremendo partido pa esnan ku gusta e wega di picheo i defensa naturalmente. Charros de Jalisco tabata invikto te ku final, miéntras República Dominicana ku a klasifiká komo number 3 a gana e number 2 ku ta Venezuela 5-4 den semi-final. Den e wega bálido pa di 3 lugá ekipo Indios de Mayaguez di Puerto Rico a gana Venezuela (Cardenales de Lara) 7-4. Bon públiko entre 11 pa 17 mil hende pa wak kasi tur wega. Normalmente ora tin tipo di kompetensia asina aki, ta ora ku ekipo di kas ta hunga so, stadion ta yen.
* * * * *
Vários hungadó di nos Beisbòl Dòbel A ta moviendo den Amstel Bright Premier Cup. No tin masha novedat pa loke ta kambionan. Coco Balentien lo ta na kabes di Royal Scorpions i Mompy van Gurp lo ta su bench coach. Nos a tende na promé instante ku Mompy van Gurp lo ta general manager, pero Coco a konfirmá ku nos ku Mompy lo ta bench coach. Wild Cats a kuminsá firma su hungadónan ku ta agente liber. Nos ta keda te aki pa awe i mayan ku Poder di Dios.
