Wikènt final Amstel Bright Premier Cup ku animashon di Sweet Things i Dolce Band

Wikènt final Amstel Bright Premier Cup
Bombers ta nòkout Jaws i klasifiká pa final 40+

WILLEMSTAD- Amstel Bright Premier Cup ku ta den wikènt final a sigi djaweps ku 6 wega na Van Engelen Ballpark. Pa awe djasabra lo tin vários wega di semi-final i final. Djadumingu tin 6 wega final i djasabra tin 3 wega final. Ke mèn, 9 wega di final e wikènt aki ku ekiponan ku chèns di gana 1000 florin kèsh. Awe, djasabra tin animashon Sweet Things di Irving Jano i crew i mayan ta Dolce lo tei  pa animá. Den wega  djaweps anochi entre Bombers i Jaws, ekipo Bombers a nòkout Jaws fásil ganando 13-3.
SOAB a gana GGZ/Total Cleaning ku skor di 9 pa 5.  FireBoys a dal Renegados 13 pa 9. Pa loke ta e weganan riba tereno B, EWT a gana KPC 11-4, MCB a gana pèrtá di Building Depot/Curoil 8 pa 7. Fridays Baby Truck a derotá Tog Nos Tei 12-10. Ekiponan Building Depot, Selikor a haña wild card den Soshal Corporate. Bala Brothers i The New Radiator a risibí wild card den Soshal Open.

Teksto pa pòtrèt:
Bombers den final di 40+ awe 2.45 pm.

Swift den final Modified djasabra 5’or pm kontra di Bright Stars.

Hopi wega den e kategoria Soshal riba vèlt B awe na Van Engelen Ballpark.

MCB un tempu hopi popular den Sòftbol Soshal a gana Building Depot i lo ta den akshon awe.

Selikor a kai den wild card i lo sigi den kompetensia awe.

Bala Brothers a keda na bida den Soshal Open pa medio di wild card.

Fanátikonan di Deporte Kòrsou bon dia i felis wikènt. Djaweps i djabièrnè a sigi ku play-off ku weganan di kategoria COED Corporate, Liga 40 i Soshal Open. Soshal Corporate riba vèlt B. Awe nos tin un update kon ta bayendo ku e weganan.. Djasabra durante dia tin animashon di Mini Band Sweet Things ku Irving Jano na kabes i djadumingu ta agrupashon Dolce na Van Engelen Ballpark den e último wikènt di Amstel Bright Premier Cup. DJ Raynies Faries tambe tei pa anima.
* * * * *
Ekiponan ku te ainda no a pèrdè niun wega ta Cicoza den e kategoria Modified Open ku 3 ganá i 0 pèrdí den buelta regular. Den e kategoria ei tin Terremoto, Swift i Bright Stars. Remarkabel ku Swift tin rèkòrt di 1 ganá i 2 pèrdí den buelta regular.   Den Soshal Corporate ekipo EWT/MCD/DIGICEL, SBAB  ta invikto den buelta regular.  Bala Brothers, Chonchies, The Dominators, The New Radiator, Corendon /SGR i SOAB  ta ekiponan ku te ainda ta invikto i no a pèrdè niun wega ainda den buelta regular. Kompetensia ta fuertísimo, pero awor ta konta, debí ku den mayoria wega ta dal saka.
* * * * *
Liga 50 tin reunion djaluna 10 di mart na sede di SSK aya na Nieuwe Haven. Ekipo Catpower a reforsá formal den 2025 i ekiponan ta bon balansá. Vários ekipo mas a reforsá i tin vários kambio na kaminda.  Tabatin kambionan tambe ku a wanta debí na lèkmentu foi temporan. Hungadónan manera Emeric Agatha i Ramsey Koeyers tabata riba kaminda pa Ban Serio, pero un ke otro a keda wantá. Ramsey Koeyers tabata menshoná rumbo pa Pitufos tambe, pero e hungadó a konfirmá serka nos durante karnaval ku e ta bai keda ku ekipo Baranka. Baranka tambe a sali brabu despues ku nan a pèrdè dos hungadó klave. Liga 50 kayente den 2025 i durante reunion lo bai atendé asuntu di skema nobo, esta e sistema nobo di hunga kampionato òf ta keda hunga 18 wega durante kampionato regular manera tabata e kaso último añanan.
* * * * *
Danki pa e reakshonnan ku nos a risibí di e karnavalista deportistanan ku a pasa serka nos i saka pòtrèt. Hopi ku ta bai henter karnaval i kabes yen ku poko beter den kurpa no ta logra saka un pòtrèt durante marcha. Pesei tin algun ku ta saka pòrtrèt foi na kas òf promé ku marcha sali pa por tin un pòtrèt. Of mester bisti e paña i e disfras kompletu pa saka pòtrètnan di nobo.  En todo kaso nos a pasa hopi dushi kantu di kaya manera ta e kaso sigur mas ku 22 aña. Pa hopi tempu nos a traha den e marcha tambe. Temporada di karnaval semper ta inolvidable kaminda grandi i chiki ta gosa un bòl. Niun mandatorio òf gobernante no ta mishi ku karnaval mes pa nan no pèrdè popularidat. Ta un fiesta di pueblo ku hopi hende, mas ku mitar di e poblashon di un manera òf otro ta envolvi.
* * * * *
Djaweps tabatin reunion di Torneo Hope 2025 ku a tuma lugá na SDK.  E organisadónan ku ta FDDK i The Greatest a bai gera ku ekiponan di Soshal Open. Pero a pone reglanan serio pa loke ta trata e timnan aki.  Ultimo tempu tin algun asuntu ku no ta kanando muchu bon, pero riba konseho di algun veterano den organisashon di torneonan soshal a mantené e ekiponan aki den Hope. Hopi interes mes den Torneo Hope atrobe. Por spera banda di 80 ekipo ku a inskribí pa e prestigioso torneo aki ku a bini ku algun regla mas skèrpi pa kos por kana nèchi. Tene kuenta ku The Greatest a kana sam sam ku Torneo Hope sigur sigur e último 10 añanan. Parse ku tin menos ekipo den e kategoria Soshal Open e biaha aki.
* * * * *
Ekiponan Santa Rosa Memories i Yesterday ta pendiente pa e karta di apelashon. Parse ku lo bin mobilisashon di ekiponan pa pone preshon pa tin un desishon. Tin un torneo organisá pa Quality Stars na kaminda despues ku e play-off terminá. Ta trata aki di un torneo warm-up kaminda mayoria ekipo di Beisbòl Veterano 40 lo partisipá. No ta konosí ku ekiponan 50+ tambe lo ta parti di e torneo. Moises Zimmerman a anunsiá ku e tin un ekipo nobo den Liga 50. Moises Zimmerman ta fundadó di ekiponan Mi Kos i Sigi Hunga. Parse ku karta a sali djabièrnè i Yesterday a gana den apelashon.
Djaluna ta hiba e gran sòftbòlista Shadira Pietersz na su último lugá di sosiegu. Bishita di kondolensia ta di 1’or pa 3’or na El Tributo  pa despues sigui pa Santana di Santa Maria.
Boy Motor Tata, Erquiles Cornelia a fayesé djaweps 6 di mart. Nos ta keda te aki pa awe. Te mayan ku Poder di Dios.

‍