Baranka lo no drenta Liga 60 den 2025
WILLEMSTAD- Mayoria di ekiponan di Liga 60 a vota kontra pa Baranka drenta Liga 60 den 2025. Djarason 12 di febrüari 2025 tabatin un reunion general di Liga 60 kaminda ekiponan por a vota p’asina Baranka por drenta Liga 60. Temporada 2024 tambe Baranka a purba drenta liga i ekiponan a vota kontra. Ku 3 voto na fabor i 5 kontra ekiponan a rechasá entrada di Baranka den Liga 60 djarason último.
Ekiponan ku a vota kontra tabatin hopi argumento manera entre otro mester hunga mas wega, lo mester hunga 4 wega pa dia enbes di 3 wega pa dia, tokante barwacht ets. En todo kaso hopi argumento dikon no por tuma mas ekipo den Liga 60. Presidente di Liga 60 Urvin Martina tin un proposishon riba mesa kaminda ekiponan por studia esaki durante un aña. Probablemente na 2026 por aseptá esaki pa Baranka por purba drenta atrobe kaminda liga lo drei ku 9 ekipo. Naturalmente Baranka no a keda muchu kontentu ku e votashon.
Segun nan meta di e liga na komienso tabata pa mas tantu 60+ dibertí i hunga bala pa sigi move na edat di penshun. Ta yega un kaminda ku mester tuma mas ekipo debí ku na añanan 80, 90 i 2000 tabatin asina tantu hungadó ku a redundá den hopi liga pa tur e hungadónan menshoná por a sigi move. No ta eksluí e posibilidat ku si sigi ninga tim ku otro liganan di 60+ lo lanta.
Playoff Amstel Bright Premier Cup ta sigi awe
WILLEMSTAD- E super popular torneo, Amstel Bright Premier Cup ta sigi awe ku 16 wega na Van Engelen Ballpark. 2 di e weganan aki ta playoff i mayan playoff ta sigi den e diferente kategorianan. Djasabra, esta awe 16 wega di playoff inkluyendo playoff semifinal entre ekiponan di 60+ den oranan di mainta. Djadumingu no tin wega debí na Marcha Hubenil. Naturalmente bar i kushina ta bon surti. Amstel Bright Premier Cup 2025, organisá pa sóftból klup Cicoza ta den gran forma i den rekta final. Ekiponan luchando pa yega final rumbo pa e premio grandi di 1000 florin.
Vários kambio den Sòftbòl Liga 50 den 2025
WILLEMSTAD – Liga 50 di sòftbòl ku tradishonalmente ta hunga riba djasabra di mainta pa atardi na Van Engelen Ballpark lo tin vários kambio den 2025. Na promé lugá ekipo Jandoret Raiders lo djòin Catpower den 2025 i ta vários hungadó ku tabata militá den Jandoret den sòftbòl den pasado i último añanan den Beisbòl Veterano lo bini bèk ku e tim na momentu ku e ‘joint venture’ tuma lugá ofishalmente.
Ta papia di hungadónan manera Jeffrey Martina, Gregory Zimmerman, Raylon Capella, Sherdon Rombley ,Mayron Martinus i vários otro hungadó ku tin hopi aña den e ekipo Jandoret Raiders. Un ekipo ku lo pèrdè hopi hungadó ta Pitufos ku lo pèrdè Roderick Zimmerman, Sor Moesquit, Sakoetoe, Juburney ‘Mando’ Davelaar, Ericson ‘Fefe’ Windster i otronan. E ekipo kampion Baranka probablemente lo pèrdè dos grandi ku lo move pa otro ekipo. Ban Serio ‘E Dodgersnan di Liga 50’ ta rabiá den buskeda di super star atrobe. Nan tin Roque Zimmerman riba nan lista kaba, i nan ta pendiente di dos pa tres grandi mas pa arma un bòm den Liga 50. Vários kambio mas na kaminda pero keda pendiente, subi bo wepsait pa mas informashon.
MAS INFORMASHON DI SÒFTBÒL I BEISBÒL
Lesadónan di Deporte Kòrsou bondia i felis wikènt. Fin di siman ku hopi wega di Amstel Bright Premier Cup na Van Engelen Ballpark. Awe, djasabra 22 di febrüari tin un kantidat di wega entre otro wega entre Ban Serio i Sluggers den 50+, wega krusial pa wak si Ban Serio ta terminá number 1 óf ta Jaws ta terminá number 1. Jandoret ya a sigurá e di 3 lugá i Sluggers ta na di 4 lugá. Si Sluggers gana Ban Serio, Jaws lo pasa pa promé lugá. Ban Serio ta mustra sólido den e kategoria aki ku solamente un derota, wega ku nan a pèrdè kontra Jaws den e promé wega di e kategoria aki den Amstel Bright Premier Cup. Djasabra tin play-off di 60+ tambe den oranan di mainta.
• * * * * * *
*
Hopi komentario mes di e manera ku ekiponan a tene Baranka afó den e votashon pa drenta Liga 60. Baranka mester keda trankil i purba tur aña atrobe òf trata na djòin ku un otro ekipo. Mas aña Baranka keda fó, mas fuerte nan lo drenta Liga 60. Den algun aña Gregory Reina i otronan lo kumpli 60+. Hungadónan manera Sendley Reina, Richenel Reina, Urvin Martina, Marlon Paz, Inac Jonis, Elvin Regina, Michael Regina ya a kumpli 60 aña òf lo kumpli 60 aña den 2025. Te yega un kaminda ku mester tuma mas ekipo òf lo mester laga algun hungadó di 60+ keda afo sin por hunga den nan edat. E interes di hunga Slowpitch entre e hungadónan aki tabata grandi den aña 80,90 i 2000 bin ariba.
• * * * * *
Nos peloteronan di MLB a raportá kaba na kampamentunan di Major League Baseball i ta spera un bon temporada atrobe di nan. Hopi fanátiko pendiente pa mira Atlanta Braves ku yunan di Kòrsou Ozzie Albies i Jurickson Profar den alineashon. E Rubiano Chadwick Tromp lo bai hasi lo máksimo pa e bira kècher number 2 di e ekipo di Atlanta Braves i asina nos tin 2 yu di Kòrsou i un Rubiano den e ekipo den Major League. Cedanne Rafaela ta ku Boston Red Sox i Kenley Jansen a kaba di firma un kontrakt di Los Angeles Angels pa un aña.4 yu di Kòrsou i probablemente dos Rubiano den MLB. Bogaerts di San Diego Padres lo bai bèk shortstop i ta spera ku elo bati 20 homerun i empuhá 90 kareda ku un average riba .290 atrobe.
• * * * * * *
Mester bisa ku average haltu di bateo den MLB praktikamente no ta konta mas, ta homerun mester bati i empuhá kareda. WAR (Wins Above Replacement), DRS (Defensive Runs Saved) ets. ta konta. Nos a risibí un estadistika ku na 2005, 30 tim a bati riba .250 kolektivo i na 2006 meskos. Na 2021, 5 tim a bati pa averahe kolektivo .250 óf mas i na 2024 esei a bira 6. Ta bon pa nos hungadónan ku ta firma profeshonal den Beisbòl i ta hungando den Liga Menor bati pa average normal i no bai kopia e batimentu di homerun i bateo di .220 manera ta pasa den MLB. Si e pelotero bati pa average abou mes komo hungadó bo mester bati hopi homerun. Defensa i spit ta keda tòg hopi importante pa mantené bo mes den Grandes Ligas.
• * * * * *
Ayera nos artikulo tin moveshonnan di Liga 50 di Sòftbòl i tin hopi mas na kaminda. Liga 50 ku pa hopi aña ta halando hopi fanátiko lo bira mas interesante den 2025. Hopi hungadó di 40+ ku ta hunga antes djamars i djaweps anochi i aña pasá solamente riba djaweps ta birando 50 i e kompetensia ta bira fuertísimo. Hopi ku a kumpli 60+ mester pensa na move pa Frank Curiel Ballpark den nan liga i yuda den 50+ komo batiadó emergente òf yena na momentu ku e tim no sera 9 òf 10 hungadó. Den Liga 60 e aña aki i parse pa semper niun hungadó di 59 no por hunga mas den e liga. Pa loke ta trata e Dutch Caribbean 60+ ku e aña aki lo tuma lugá na Aruba 59+ no por hunga. Solamente 60 i mas ariba. Bèk pa Amstel Bright Premier Cup, tene kuenta ku djadumingu no tin wega. Awe i mayan ta kandela tin aya na Van Engelen Ballaprk den Amstel Bright Premier Cup organisá pa Cicoza. Nos ta keda te aki pa awe, te djaluna ku Poder di Dios.
