Ban restrukturá i reforsá, Advocaat i amigunan mester keda?
WILLEMSTAD - E siman aki nos a risibí mas análisis di Pepi Sulvaran pa loke ta trata no selekshon di Futbòl di Kòrsou. Pepi Sulvaran ta eks direktor tékniko di futbòldi Kòrsou i eksperto ku gran konosementu riba futbòl internashonal. Konstantemente Pepi ta analisá i manda komunikado pa prensa lokal epseshalmente ku análisis di nos selekshon di futbòl.
Desishon importante
FFK ta para dilanti un desishon krusial. Mester sigui ku Dick Advocaat i su grupo awor ku e kontrato ta kabando? Den futbòl tur fanátiko tin derechi riba nan opinión. Na mi opinión nos no ta bai yega lew ku e grupo aki. E gran filósofo Bertrand Russel a bisa ku ora bo ta studia òf analisá, hasi bo mes solamente e pregunta kiko e echonan ta i kua bèrdat ta wòrdu sostené pa nan. No laga bo mes wòrdu desvía, pa lokual abo ke kere, of algu ku abo ta kere ku lo ta bon si e wòrdu kere. Wak solamente e echonan. Esei nos ta hasi.
Nuin hungadó
Dia a trese Advocaat ku a invita amigunan bin kune, a ‘blind’ tur hende ku nos ta bai haña hungadó di peso. Advocaat ku ya no tabata aktivo, no a trese ni un hungadó di nivel haltu. Ni unu. Brenet ku a ninga pa bin paso e tabata soña ku ‘Oranje’, después ku ela hañe ku problema ku hustisia i no por haña ekipo mas na Ulanda a skoge nos komo su di dos opshon.
Nos ta kontentu si ku ela bin paso e ta tremendo hungadó. Comenencia a bini pa amor pa su famia, spesifikamente su abuelo kende e ta stima hopi. E ta hungadó ku por karga e selekshon pa hopi aña manera Leandro a bin ta hasi. Ke men den e aspekto aki, Advocaat i su grupo ku ta manda mensage invitá hungadó, su produkshon ta sero. Si nos haña hungadó pa 2025 ta apesar di Advocaat i paso nan ke hunga torneo grandi manera ‘Kopa di Oro’ i no pa Advocaat .
Prestashon di mas malu den historia
Nunka den historia nos no a presta mes malu ku bow di Advocaat. ‘Pantera Negra’ na puesto 90 riba ranking di FIFA a pèrdè punto ku St Lucia (164) i Grenada (175) i mester gradisi San Martin ku no ta ni riba ranking di FIFA ku nan a gana St. Lucia i yuda nos. Nos a klasifiká mas malu den Liga B. Santo Domingo (142) ku ta muchu mas abou ku nos den un grupo ku kontrinkante mes malu ku esunnan di nos, Bermuda (167), Dominica (183) i Antigua (156) a gana tur 6 wega i a klasifiká ku 18 punto ku 27 gol na favor i 4 kontra. Meskos Haiti a hasi ku 18 punto i 29 gol na favor i 5 kontra. Mientras nos mester a warda te lastu dia pa por klasifiká.
Futbòl ta hungadó
Tempu Advocaat tabata tin poko éksito ku Ulanda na Mundial ‘94 ta danki na hungadó manera Frank de Boer, Rijkaard, Ronald Koeman, Wouters, Overmars, Bergkamp, Winter. Ulanda a yega kwartfinal pa wòrdu elimina pa Brazil ku Glenn, Lilo, Empie i ami den stadion na Dallas.
Su di dos bon tempu tambe e tabatin bon hungadó, na Eurokopa 2004, ku van der Sar, Reiziger, Stam, Davids, Kluivert, van Nistelrooij, Sneijder, de Boer, Overmars, Robben, Seedorf. Ulanda a yega semi-final. Sin ke bisa ku Advocaat ta mal entrenado, pero kosnan mester wòrdu poné den konteksto i su tempu a pasa día bieuw i e no ta bisa hungadó hoben apsolutamente nada.
Spònsernan
Aparentemente tin menasa ku si Advocaat bai spònsernan ta hala atrás. Ban serio, ku Advocaat i spònser nos a resultá den un situashon ku San Martin ku 30 mil habitante i 10 team di futbòl so, mester a skapa nos. Nunka por ku ta spònser ta disidi den FFK.
No tin yu di Kòrsou?
Dikon nos ta permití buska un dòkter penshonadó, retirá na Spaña pa bira dòkter di nos selekshon. Pakiko no pone unu lokal pa hinka mas di nos den nos selekshon. Nos tin yen mediko ku afinidat pa deporte i ku ta mas hoben. Si ta nos selekshon, dikon nos tin un relashonista publiko ku no ta papia ni nos lenga ni Spaño ku ta e lenga dominante di mayoria país ku awor nos lo bai topa den CONCACAF. Si su Ingles ta mes malu ku Ten Hag i van Gaal, e no ta papia Ingles tampoko. Nos ta yen yu di tera ku ta dominá tur e tres lenganan ei. Of nos a apunta relashonista publiko pa Ulanda? Asina nos mes no ta bai dilanti. Además nos a komprondé ku e ‘ekstranheronan’ aki si ta gana bòshi sèn, mientras e yunan di tera ku ta yuda, ta traha riba kompensashon masha chiki.
Komishon temporal interino i demisionario
E komishon aki, ku no ta masha kla pakiko nan tey, no mag tuma desishon ku ta mara doño di kos ku ta e klupnan pa hopi tempu. Esei ta konta pa un eventual kontratamentu di entrenadó nashonal tambe. Keda lew, no ta bosnan kos. Mester reforsá ku hungadó. Esei ta otro kapitulo.
