Ban Serio i Baranka ta gana den duelo di 50 kontra 60 i mas resumen 2024
WILLEMSTAD- Ban Serio a gana Jaws ku skor di 10-2 i Baranka a derotá NosTambe Por 3 pa 1 djasabra 14 di dèsember den Frank Curiel Ballpark. Un bon públiko tabata presente na e mini torneo aki ku tabata un fundraising di e ekipo di Santa Maria, Nos Tambe Por. Ban Serio (50+) a dal Jaws (60+) 10 pa 2 den e promé wega di e atardi.
Riley Toppenberg a habri i tira bon pa Jaws, pero no a risibí respaldo di su hungadónan. E wega di Baranka kontra Nos Tambe Por tabata un wega pèrtá, kaminda Baranka riba forsa a nota e 3 karedanan. Un homerun kilométriko pa right center di Edmar Cornelia ku a bai kai den Salvadorweg.
E homerun aki tabata ku un koredó na base. Kenny Hellement picher habridó i ganadó pa Baranka a konektá un homerun solitario pa Baranka. Despues di wega, hungadó, dirigente i públiko presente a keda te den oranan lat di anochi. Pa 2025 lo tin e sera aña aki atrobe organisá pa Nos Tambe Por na Frank Curiel Ballpark.
Resumen 2024
Pitufos Los Prados kampion di Golden Athlete Championship Series.
WILLEMSTAD- Awe nos ta sigi ku resumen 2024 di Sòftbòl Slowpitch. Pa promé biaha tabatin e gran torneo Golden Athlete Championship Series ku partisipashon di ekiponan di Aruba, Kòrsou, Puerto Rico i República Dominicana na Kórsou.
Ekipo Pitufos di Kòrsou a organisá e torneo ku tabatin bon públiko tur 5 fecha. Djadumingu 12 di mei tabata e fecha final di Golden Athlete Championship Series den Stadion Post 6. Den 60+ e ekipo Los Prados a bira kampion ganando di Nos Power den final.
Nos Power tabata ganá ku skor di 4-3 te den último inning, pero ekipo Los Prados ta bòltu skor despues ku promé out a kai pa finalmente gana ku skor di 10 - 5. Den e wega di Liga 50 Pitufos a gana Jaws ku skor di 7 pa 5. Ganadónan i premio individual tabata Juan Rivas di Rep. Dom., Dwight Alexander (Aruba), Edmar Cornelia, Myron Wijman i Fernando Rosario di Kòrsou. Despues di wega tabatin entrega di premio i animashon musikal di Grupo Kompèr.
Den 60+ Los Prados di República Dominicana a títulá kampion.
MAS INFORMASHON DI SÒFTBÒL I BEISBOL
Fanátikonan di Deporte Kòrsou bonochi. Nos a pasa mitar desèmber aki i práktikamente tur aktividat di deporte a wanta un ratu. Djasabra tabatin e tan sperá bataya entre finalistanan di Liga 60 kontra esnan di Liga 50. Ekiponan di Liga 50 respektivamente Ban Serio i Baranka a sali di porta grandi. Ban Serio a gana Jaws ku skor di 10 pa 2 i Baranka a gana di Nos Tambe Por 3-1. Jaws su defensa no a respaldá e bon picheo di Riley Toppenberg. Tremendo ambiente i bon públiko pa mira e dos weganan. Nos a bai hunga e wega final debí ku dimes veteranonan di 60 i 50 tabata un poko kansá i ta den luna di desèmber naturalmente i mihó sosegá e kurpa.
* * * * *
Nos tabata presente na Frank Curiel Ballpark despues di e weganan i nos a topa ku vários hungadó ku ta menshoná den kambio pa loke ta trata 60 i 50+. Gilbert ‘Gibi’ Henrietta a desmentí ku e ta bai sali di Los Amigos i bai Pitufos. Kambio di Wimbert Hato di Jaws pa Pitufos a keda konfirmá. Despues ku kampionato di 60+ a terminá Wimbert mes a konfirmá e notisia ku nos. E situashon di Jaws den 60+ ta keda delikado, pero hopi ta pensa ku e ekipo por bira mihó mirando ku den 2024, 6 hungadó a sali di Nos Tambe Por i bai Los Amigos i Nos Tambe Por a bira e ekipo di aña den 60+ logrando 4 título. 3 torneo grandi i kampionato di 2024.
* * * * *
Norman ‘Nonnie’ De Roon tabata den unifòrm di Ban Serio i a hunga den e wega kontra di Jaws 60+ pa ekipo Ban Serio. Hopi rumor ku Nonnie lo bai Ban Serio bèk den 2025. Den 2024 Nonnie de Roon a pasa di Ban Serio pa Marlins. Ekiponan di 50+ i 60+ no tabatin tur nan estelarnan pa e wega di djasabra último, pero esnan presente a gosa un bòl i por disfrutá tambe di e bar i kushina ku tabata bon surtí. Algun dirigente di Baranka ku a papia ku nos a bisa ku Baranka lo inskribí atrobe pa partisipá den Liga 60. Aña pasá Baranka a manda karta pa drenta Liga 60 i ekipoan a rechasá partisipashon di Baranka bisando ku ta bira muchu ekipo i mester hunga 10’or di mainta tambe.
* * * * *
Michelangelo ‘Galbao’ Boekhoudt a bira kampion picher den Liga 50 i den Liga 60 den 2024. Segun nos ta promé picher ku a bira kampion picher den e dos liganan pareu. Naturalmente ta bai chèk un ke otro den dianan benidero. Galbao Boekoudt a hunga den Ban Serio den Liga 50 i Nos tambe Por den Liga 60. Ban Serio a bira supkampion i Nos Tambe Por kampion. Un dje gran pichernan di 50 i 60 ku a hunga segunda base pa Nos Tambe Por djasabra den Frank Curiel Ballpark.
* * * * *
Awe nos tin resultado i algun pòtrèt despues di wega di 50 kontra 60 na Frank Curiel Ballpark i nos ta sigi ku resumen di e kampionnan i algun detaye kon a bai den 2024 den Sòftbòl Slowpitch i Beisbòl Veterano. Beisbòl Veterano a start ofishalmente dia 19 di mei na Vi Jansen Ballpark. Weganan a start un dia promé ku ta 18 di mei. Liga 50 Sòftbòl dediká na Samuel ‘Bobbel’ Hamson a start dia 18 di di mei na Van Engelen Ballpark. Liga 50 a start despues ku Kopa ABC&S 50+ a tuma lugá na Aruba na Pos Chikitu kaminda Ban Serio a titulá kampion. Na Kòrsou tabatin e Golden Athlete Championsip Series ku nos ta yama Serie del Caribe den Sòftbòl 50/60+ kaminda ekiponan Los Prados (República Dominicana) 60+ i Pitufos (50+) a titulá kampion.
* * * * *
Cicoza a gana Swift 13 pa 7 i bira kampion di Kopa ABC&S. Tabata despues di basta aña ku un ekipo ku no ta Swift a bira kampion di ABC&S di e hóbennan. E kampionato a tuma lugá na Sint Maarten. Liga Van Engelen, e liga ku Swift tabata super kampion, pa despues ku Jaws a bira kampion den 2023 a wanta un ratu den 2024. Liga Amstel si a sigi i a start dia 14 di yüli ku partisipashon di 7 ekipo. Den luna di novèmber ekipo Gamers a bira kampion pa di dos aña sigí. Nos ta keda te aki pa awe i te mayan ku Poder di Dios.
