Ban Serio ta kibra invikto di Baranka den Liga 50 i Quality Stars ta gana Santa Maria

Ban Serio ta kibra invikto di Baranka den Liga 50

WILLEMSTAD – Ban Serio a gana Baranka ku skor di 14-8 i asina kibra invikto di ekipo Baranka den Liga 50. E wega a tuma lugá djasabra 6 di yüli den oranan di mainta na Van Engelen Ballpark dilanti un bon públiko apesar di e orario tempran.  Baranka tabata dilanti 8-7 den e wega, pero Ban Serio a bini bèk bon den e wega pa bai ku e viktoria.  Den otro weganan Catpower a blankia Lions 5-0 i Jaws a nòkout Artemisia 12-2 .

Ban Serio 14, Baranka 8
Ban Serio a dal 15 hit i hasi 2 eror. Willem ‘Wim’ Felicia ku ta ‘back in town’ den 50+ tabata e picher ganadó.  Jair Josepha a bati di 3-3 ku homerun i 4RBI. Albert ‘Kompüter’ Pieternella a bati di 3-2 ku un homerun i 4RBI. Byron Kook, Rigobert Cijntje i Winston Kirindongo tambe a bati di 3-2.
Baranka a konektá 8 hit i hasi 3 eror. Kenny Hellement tabata e picher pèrdèdó.  Gregory Reina a bati di 2-2 i Myron Wijman di 1-1.

Catpower 5,  Lions 0
Catpower a konektá 8 hit i kometé 4 eror. Luis ‘Baby’ Alcantara tabata e picher ganadó. Lesley van Kimmenade i Rivelino Moesker a bati di 2-2. Lions a dal 4 hit i hasi 3 eror.   Nelson Jakoba a bati di 2-2. Giovanni Maduro tabata e picher pèrdèdó.

Jaws 12, Artemisia 2
Jaws a bati 11 hit i kometé 1 eror.  Fernando Rosario tabata e picher ganadó. Manuel Rekondie  a bati di 2-2. Artemisia a bati 6 hit i hasi 5 eror. Farley Lard tabata e picher di pèrdèdó i mes a bati di 3-3.

Teksto pa pòtrèt:
Ban Serio a kibra invikto di Baranka ganando 14-8.
Baranka a kai vensí i nan rèkòrt a bira 6-1.
Wim Felicia, back in town pa Ban Serio tabata e picher ganadó.

Quality Stars ta laga Santa Maria Pirates den tereno den Beisbòl Veterano

WILLEMSTAD- Quality Stars ketu bai invikto den Beisbòl Veterano a gana Santa Maria Pirates ku skor di 4-3 djadumingu atardi na Vi Jansen Ballpark. Den extra inning, inning number 8 komo ekipo di kas e batiadó emergente Edword Felix ta konektá hit pa right pa Luisgardo Alvarez nota for di segunda ku e kareda di viktoria. Quality tabata dilanti ku skor di 3-0 te den kabes di e di 6 inning kaminda Santa Maria Pirates a skor 3 kareda pa empatá e wega. E dos ekiponan no a skor den di 7 inning, pero den di 8 inning Quality ta logra e kareda di gana. Rydell Isabella ku a drenta di relevo den di 6 inning a resultá e picher ganadó pa Quality Stars. Evenon Martis ku a tira wega kompletu pa Santa Maria Pirates a resultá e picher pèrdèdó. Den e otro weganan di wikènt, Yesterday a dal Otrabanda 9-0. Santa Rosa Memories a gana Azucar 5-2 i Isla Crackers a derotá Broncos 5-3.

‍

‍

MAS INFORMASHON DI SÒFTB0L I BEISBÒL

‍
Fanátikonan di Deporte Kòrsou bonnochi i felis siman. Nos ta bai drenta un fin di siman kargá ku Sòftbòl, Beisbòl i naturalmente tambe Futbòl. Hopi moveshon i ambiente na establesimentunan Horeca e dianan aki. Na parkenan di Sòftbòl bastante moveshon den wikènt. E liganan ku nos mester kubri a bira 4 bèk. Liga 50, Liga 60, Liga di Nos Tur i Beisbòl Veterano 40+. Naturalmente ta pendiente pa start ku kampionato di 50+ di Beisbòl Veterano ku partisipashon di 6 tim. Pa promé biaha den e 6 kampionatonan di Beisbòl Veterano 50+ tin 6 tim ta partisipá. Tin indikashon ku Beisbòl 50+ lo sigi krese debí ku otro aña tin un ekipo mas na kaminda.

* * * * *

Djabièrnè tabatin un tremendo apertura di Liga di Nos Tur aya ana Frank Curiel Ballpark. E torneo ta dediká na Frank Curiel ku semper a koperá engrande ku Liga di Nos Tur na su parke. Liga di Nos Tur ta e liga femenino ku tabata hala mas fanátiko pa e weganan. Nos a yega di mira final entre Un Kara i Sin Stres na vários okashon karga karga ku fanátiko na Frank Curiel Ballpark. Mas o ménos manera ora tin Little League Pariba kontra Pabou. Of mihó bisa ménos debí ku  e aña aki tabatin kantidat rèkòrt di fanátiko den Frank Curiel Ballpark na momentu ku Pariba a topa Pabou den e di dos wega bálido pa play-off ku tabata riba un djasabra ku a resultá e último wega tambe di e play-off Little League.

* * * * *

Frank Curiel ta keda un dje grandinan di pelota lokal. Un dje mihó entrenadó i konosedó ku Kòrsou a konosé ku a traha Big Leaguernan manera entre otro Jonathan Schoop, Yurendell de Caster (ku a hunga dos wega den Big League). Frank a drenta den Salon di Fama den luna di aprel último huntu ku Kenneth Gijsbertha i algun grandi manera Jozef Martina, Bencho Imperator, Xiomara de Lanoi, Leonise Avastia ets. Tambe dirigentenan manera Rudsel Martina,  Hensley Rondei, Ramiro Hart, Nooi Girigorie ets. Drenta Salon di Fama ta algu grandísimo i ta e honor di mas grandi ku un deportista, dirigente i periodista por risibí. Anto risibí e honor aki na bida dilanti un públiko grandi presente ta tremendísimo. E deportista su nòmber lo keda graba den historia.

* * * * *

Preparashonnan ta sigi pa kampionato di Karibe di Little League ku lo tuma lugá na Kòrsou den Stadion Post 6 di 14 pa 21 di yüli. Flyer a sali kaminda ta anunsiá ku paisnan Aruba, Boneiru, Kòrsou, República Dominicana, Sint Thomas i Sint Maarten lo partisipá na e kampionato aki. Entrada lo ta 5 florin pa adulto i 3 florin pa mucha. Parkermentu lo por tuma lugá riba tereno di PWFC.  Na momentu ku e tereno yena por parker otro kaminda. Naturalmente lo no por parker riba e lugá di parker den Stadion Post 6.  Keda pendiente pa mas informashon den e dianan benidero.

* * * * *

Liga di Nos Tur a start den gran forma djabièrnè na Frank Curiel Ballpark. Ekiponan ganadó di e último añanan ku ta Un Kara i Sin Stres a sali viktorioso den nan promé kompromiso.  Djabièrnè, MC tabata Alexander Macaja i Frank Curiel a risibí su homenahe riba tereno.  Manera ta konosí, e kampionato 2024 ta dediká na Frank Curiel. Ekipo Un Kara ku tremendo picheo i bateo di Isonette Polonius a gana di Join Me ku skor di 11-0. Den e otro partido e ekipo kampion di 2023, Sin Stres tambe a sali ku viktoria. Nan a gana Shining Stars ku skor di 8 pa 1. Super Marie Windster tabata e picher ganadó pa ekipo Sin Stres. E kampionato a sigi djasabra na Frank Curiel Ballpark.

* * * * *

Liga 40 ta start dia 18 di yüli na Van Engelen Ballpark. Nèt e siman ku tin kampionato di Karibe di Little League na Kòrsou. Liga ta pendiente pa hunga djaweps anochi riba tur dos vèlt. Timnan ku lo hunga ta Twister, Cicoza, Swift, Jaws, Baranka i Gamers. Ideal lo ta 7 tim, pero niun tim mas no a mèldu ainda serka direktiva. Baranka ta super kampion di Liga 40 e último añanan. Na aña 2021 ku Swift a ruim op tur ekipo den play-offnan i play-off final ku picheo di Emilio Velarde kaminda niun batiadó no tabata mira e bala ei anochi.  Emilio a tira 12 ponche den e promé wega di e final. A stòp Velarde di picha den 40+. Junior League a sali supkampion na Nicaragua despues ku nos a gana tur wega fásil den e buelta regular. Te djarason ku Poder di Dios.

‍