Ban Serio ta laga Marlins den tereno i Jaws ta blackout Pitufos
WILLEMSTAD- Ban Serio riba hit di Albert ‘Komputer’ Pieternella a gana Marlins den tereno ku skor di 14-13 djasabra den Liga 50 na Van Engelen Ballpark. Ekipo Marlins tabatin 13 wega sigí ganá promé ku pèrdè kontra di Ban Serio djasabra último. Ekipo Ban Serio tin 5 wega ganá sigí despues ku nan a pèrdè kontra Jaws den luna di ougùstùs. Den otro wega Jaws a dal Pitufos durísimo ku skor di 20 pa 2.
Liga 40 ta yegando na final di kampionato regular. Mayoría ekipo tin 17 wega hungá i falta un wega mas pa terminá e buelta regular. Standing te ku djasabra último ta Marlins 14-3, Jaws 12-4, Ban Serio 11-5, Pitufos 10-6, Baranka 10-7, Flamboyan/Gamers 9-8, Sluggers 6-10, Artemisia 5-11, Catpower 4-12 i Lions 1-16.
RESULTADONAN Liga 50
Ban Serio 14, Marlins 13
Ban Serio tabatin 16 hit ku 2 eror. Ramon Cabrera a gana. Luigi Yanez a bai di 1-1. Erling. Gosepa, Sherdon Rombley, Kelvin Winklaar, Ramon Cabrera, Willy van Thijs ku Rigobert Cijntje, tur a bai di 2-1. Jair Josepha a bai di 2-2, Geronimo Daflaar a bai di 3-3 i Ludwig Pieters di 4-3. Sherdon Rombley ku Jair Josepha, ámbos a konektá 1 homerun. Pa Marlins 12 hit ku 3 eror. Gregory Martijn a pèrdè. Randolph ‘Johnny’ Balentina a bai di 1-1. Dwight Alexander, Irving Sambo ku Amarildo Coffie, tur a bai di 2-1. Mairon Martinus i Eddy Obispo, ámbos a bai di 3-2 i Rignald Martina a ba di 3-3.
Jaws 20, Pitufos 2
Jaws a dal 19 hit i kometé 2 eror. Fernando Rosario tabata picher ganadó. Carlos Madera a bai di 2-1. Joel Angelista, Tyron de Palm i Roderick Bernadina tur a bai di 2-2. C. Maduro ku Lesley Fer, ámbos di 3-2. Fernando Rosario a bai di 4-2 i Anthony Leonora di 4-3. Joel Angelista ku Fernando Rosario, ámbos a konektá 1 homerun. Pitufos tabatin 7 hit ku 2 eror. Sedney Lourens a resultá pèrdèdó. Jurwin Duggan i Robertson Josefa, ámbos di 1-1. Roderick Zimmerman ku Sedney Lourens , tur 2 a bai di 2-1.
Flamboyan/Gamers 15, Lions 3
Flamboyan Gamers a dal 14 hit i hasi 1 eror. Eithel Brunken tabata e picher ganadó. Jair Quant a bati di 2-2. Eithel Brunken tambe a bati di 2-2.
Lions a bati 8 hit i kometé 3 eror. Juan Trinidad tabata e picher pèrdèdó. Eugene de Palm a bati di 3-3.
Artemisia 13, Catpower 6
Artemisia a bati 19 hit i a kometé 1 eror. Raymy Cicilia tabata e picher ganadó. Elvis Balentina a bati di 2-2. Clifford Marshal di 3-3.
Catpower a konektá 9 hit i a komete 1 eror. Oscar Brunken tabata e picher pèrdèdó. Lesley van Kimmenade a bati di 2-2. Rudsel Schmidt di 3-2.
Jaws ta sorprendé Gamers den Liga 40
WILLEMSTAD- Jaws a gana Gamers ku skor di 6 pa 3 den kontinuashon di Liga 40 djaweps 3 di òktober na Van Engelen Ballpark. Ta promé viktoria di Jaws ku ta den sótano. Jaws tabatin rèkòrt di 0 ganá i 7 pèrdí promé ku e wega i awor tin 1-7. Gamers tabatin 6-1 number 1 riba e standing i awor tin 6-2. Gamers a keda na promé lugá. Den e sigiente wega Swift a gana Twister pa defolt. Mayan djaweps no tin wega programá den Liga 40. Standing up to date ta Gamers 6-2, Baranka 5-2, Swift 5-3, Cicoza 4-3, Twister 2-6 i Jaws 1-7.
RESULTADONAN
Jaws 6, Gamers 3
Jaws tabatin 6 hit ku 2 eror. Axel Gomez a gana. Sendy Marceli ku Nelis Elizabeth, ámbos a bai di 1-1. Emrit Volk a bai di 3-2. Gamers a dal 7 hit i nan a hasi 4 eror. Rudney Garmers a pèrdè. Byron Kook ku Christiaan Sint Jago a bai di 2-1, Ryan Samuel di 2-2 i Reugene Martis a bai di 3-3, inkluyendo 1 homerun.
E di 2 wega di dia entre Swift i Twisters no por a kontinuá, debí ku ekipo Twisters no por a sera 9 hungadó. Swift a gana Twisters pa defolt ku skor di 7-0.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bon dia. Na Boneiru tabatin apertura di e tradishonal Regatta djadumingu den presensia di vários ekipo 60+ di Kòrsou ku a kompetí den e Dutch Caribbean Tournament Master 60+. E torneo a konta ku partisipashon di ekiponan di Aruba, Boneiru, Kòrsou i Hulanda. Tremendo ambiente tabatin for di djabièrnè te ku djadumingu aya na Jossy Boekhoudt Ballpark, ántes Parke La Sonrisa. Ekipo Nos Tambe Por a bira kampion ganando ekipo Bonaire Stars ku skor di 5-0 den e fecha final.
• * * * * * *
60+ nan a hunga algun wega anochi loke no ta pasa fásil. Nan a move bon mes i aki aya algun flai den profundo di outfield tabata kai. Ekiponan Koala Bears di Hulanda, Los Amigos, Sluggers, Bonaire Stars ets a move den oranan di anochi na Jossy Boekhoudt Ballpark. Awe nos ta dediká gran parti di e kolumna aki na e torneo 60+ aki ku ta kresiendo formal i fanátiko ta bin mira e weganan ay ana Boneiru. Poko poko pero sigur hopi Yu di Kòrsou, Rubiano i esnan bibá na Hulanda ku tabata yegando pa Regatta a bini e parke pa wak e weganan wikènt pasá.
• * * * * *
E torneo tabata dediká na Yubi Valentijn, Edichi Agostien i Simon ‘Moonchi’ Quant. Djabièrnè anochi tabatin apertura ofishal kaminda a honra esnan ariba menshoná. Nan a risibí plakat serka e organisadónan ku ta ekipo Bonaire Stars enkabesá pa sra. Lenny Abrahamsz. Yubi Valentijn tabata un tremendo outfielder ku segun nos a hunga den selekshonnan di Antia ántes. Edichi Agostien sigur a hunga den selekshon di Antia. Simon Quant tabata un tremendo picher ku a nase na Aruba i bai biba Boneiru na edat hóben. Durante diskurso ela menshoná pichernan ku a yudé manera entre otro Romoldo Martes i Glenn Felida.
• * * * * **
4 ekipo di Kòrsou, unu di Hulanda, unu di Aruba i Boneiru den 60+ ta basta tim tòg. Mester hasi menshon speshal di Kòrsou ku a move ku 4 tim ku tabata bastante pa un torneo den eksterior. Tabata e di tres edishon di e torneo ku tei pa keda i ta kresiendo formal. Na Boneiru ta ekipo Bonaire Stars ta organisá e torneo i na Kòrsou ta ekipo Los Amigos. Pa loke ta trata e weganan di djabièrnè ekipo Lions a sorprendé Nos Tambe Por ganando ku skor di 4 pa 1. Ludwig Mathilda a konektá homerun bula waya den e wega ei. Despues di e wega ei, Nos Tambe Por a gana 4 wega sigi pa bira kampion.
• * * * * *
Den wega number 2 Nos Tambe Por di Kòrsou a gana Hulanda ku skor di 10-0. Hulanda tabata falta dos hungadó klave i Nos Tambe Por a probechá. Den e wega di djabièrnè anochi Hulanda a gana di Boomerang di Aruba ku skor di 12-11. Aruba tabata ganá 9-1 den e wega, pero Hulanda e bini bèk bon pa bòltu e skor. Aruba e menasá formal den último inning pero Hulanda a terminá e wega ku un tremendo hugada di dòbel play na tersera riba un tiru di senterfield. Ekipo Los Amigos ku a bini bon reforsá a pèrdè ineksplikabel kontra di Bonaire Stars djabièrnè pa despues pèrde 3 wega sigí i terminá ku rèkòrt di 0-4.
• * * * * *
By the way, Jossy Boekhoudt Ballpark ta tremendo ku yerba artifisial i remarkabel ta ku e waya den outfield ta trahá di un material ku ta protehá e outfielder, ku hopi biaha ta kore dal den fèns ora ta kue e balanan te den profundo kanti waya. Komo outfielder bo ta kore dal den fèns i leshoná bo kurpa. E dugout tambe ta tremendísimo ku espasio i hopi lugá pa pone tas i warda material.
• * * * * *
Laga nos ban pa moveshonnan ku tabatin na Kòrsou. No tabatin Beisbòl Veterano wikènt pasá. No tabatin Liga 60 tampoko. Den Liga 50 kosnan ta bastante pèrtá entre ekiponan 2,3 i 4. E aña aki 7 ekipo ta klasifiká i ekipo Sluggers tampoko no ta sigur di su di 7 lugá manera tabata pinta. Artemisia tin chèns di klasifiká komo number 7. Marlins a sigurá promé lugá for di siman pasá ku nan a gana Jaws. Djasabra ei tabatin dos wega kandela ku ta Jaws vs Pitufos i Marlins – Ban Serio. Ban Serio a gana Marlins 14-13. Jaws a dal Pitufos 20 pa 2 e otro dos weganan a terminá Artemisia 13, Catpower i Flamboyan 15, Lions 3. Nos ta keda te aki pa awe i te mayan ku Poder di Dios.
