Ban Serio vs Baranka den gran final di 50+ djasabra
WILLEMSTAD- Djasabra awor final Liga 50 di 2024 ta start na Van Engelen Ballpark entre ekiponan Ban Serio i Baranka. Ta di dos aña sigí ku e ekiponan menshoná ta topa den final. Na 2023 Ban Serio a pasa fásil riba Baranka i a swip e seri final. E picher estelar di Baranka, Kenny Hellement no tabata presente na 2023 i hopi ta pensa ku Kenny su presensia e aña aki lo hasi e diferensia. E gran final mester a start siman pasá, pero debí na entiero di miembro di Liga 50/Pitufos, Boy Constancia (QEPD) a manda e final djasabra 16 di novèmber. Ta trata di un serí mihó di 3 manera ta e kaso semper den Liga di Sòftbòl 50+.
Durante kampionato regular Ban Serio a gana Baranka na dos okashon i na tur dos okashon Kenny Hellement tabata e picher pèrdèdó. Michelangelo ‘Galbao’ Boekhoudt di Ban Serio a gana e wega den di dos buelta i Wim Felicia a gana e wega den promé buelta entre e dos ekiponan. Baranka den e parti final di temporada a buska hungadónan manera Ramiro Balentina i Ramsey Koeyers. Tambe e hungadó Shendy Cras a kuminsá bini wega den e parti final di kampionato. Ban Serio a terminá na di 3 lugá den e buelta regular i Baranka na di 5 i despues a gana dos wega di wild card pa despues eliminá ekipo Marlins den e seri 1 vs 4. Ban Serio a swip Jaws ku a terminá number 2. Pa 12’or tin e wega bálido pa di 3 lugá entre Marlins i Jaws. (Weganan lo keda transmiti pa Sport.cw.).
Play-off di Liga Amstel di djabièrnè anochi kanselá
WILLEMSTAD – Play-off Liga Amstel ta sigi awe, djarason 13 di novèmber 2024 i despues djabièrnè 15 di novèmber 2024 a keda kanselá. Tur dos dia Van Engelen Ballpark tabata den mal estado. Den e promé weganan di play-off ekipo Gamers a gana Cicoza 8 pa 4 i Terremoto a gana Thrillers 9-8 djabièrnè 8 di novèmber. Weganan di djasabra siman pasá a keda suspendé pa motibu di mal estado di tereno. Ke men pa di 3 fecha sigi ku weganan ta keda kanselá. Tin indikashon ku e skema di djasabra siman pasa lo sigi djabara 16 di november. Number 1 a terminá Gamers, number 2 Cicoza, number 3 Terremoto i number 4 Thrillers. Si un seri splet lo hunga e wega ei djabièrnè anochi 8’or pm. Dependé kon e serinan hunga lo determiná si ta hunga otro siman djabièrnè i djasabra pa terminá e kampionato mas pronto posibel i lo trata pa terminá e kampionato den novèmber aki.
Teksto pa pòtrèt:
1. Cicoza a kai vensí kontra Gamers djabièrne i nan lo topa atrobe djarason 9.30 pm.
2. Terremoto vs Thrillers djarason 7.30 pm. Terremoto a gana e promé wega.
Play-off Beisbòl Veterano ta start djasabra awor na Vi Jansen Ballpark
WILLEMSTAD- Play-off Beisbòl Veterano ta start djasabra awor na Vi Jansen Ballpark. E wikènt aki lo tin weganan di wild card pa despues sigi otro wikènt ku weganan di semi-final. Broncos ku a terminá number 6 lo topa ku Yesterday djasabra 2’or. Ganadó di e wega ei lo topa ku Santa Rosa Memories (number 4) djadumingu 2’or pm. Ekiponan ku a terminá number 1, 2, 3 respektivamente Quality Stars, Santa Maria Pirates i Isla Crackers lo drenta akshon wikènt 22 i 23 di novèmber na momentu ku ekipo number 4 bira konosí. Djadumingu 11’or am tin wega final Liga 50 entre Jandoret Raiders i Santa Rosa Memories.
Santa Rosa Memories pendiente pa hunga wild card djadumingu 2’or pm
RESULTADONAN
Broncos 8, Jandoret 7 Broncos a dal 12 hit i hasi 3 eror. Byron Kook tabata e picher ganadó. Byron Kook a bati di 3-3 i Jairo Burnet a bati di 2-2, Calvin Winklaar di 2-2, Jarl Henriquez di 3-2 i Sherton Saturnino di 1-1.
Jandoret a konektá 10 hit i hunga sin kometé eror. Renato Anasagasti tabata e picher pèrdèdó. Sherdon Rombley a bati di 3-3, Erling Gosepa di 2-2. Jeffrey Martina di 1-1 i Earl Virginia di 3-2. Myron Wijman a bati di 2-1 ku un homerun.
LIGA 50 (PLAYOFF)
Jandoret Raiders 12, Otrabanda 1 Jandoret Raiders a bati 10 hit i hasi 1 eror. Clifton Ijziek tabata e picher ganadó. Earl Virginia i Chervin Maduro a bati di 2-2. Fayselic Nocento, Maikel Melfor i Myron Wijman a bati di 1-1. Sherdon Rombley a konektá un homerun. Otrabanda a konektá 5 hit i kometé 1 eror. Edison Clemencia tabata e picher pèrdèdó. Xaviero Avastia a bati di 2-2, Sherwin Nicia di 1-1.
Santa Rosa Royals 12, Volcano Energy 4 Santa Rosa a bati 14 hit i a hasi 2 eror. Edmond ‘Momon’ Martina tabata e picher ganadó. Farley Girigorie a bati di 4-3. Cedric Antonia, Jair Quant i Momon Martina a bati di 4-2. Volcano Energy a bati 8 hit i kometé 4 eror. Ramon Cabrera tabata e picher pèrdèdó i e mes a bati di 2-1. Alexander Martina a bati di 3-2 i Miguel Velasquez di 4-2.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bondia. E dianan aki nos ta kargá ku play-off den Sòftbòl Slowpitch i Beisbòl Veterano. Nos tin play-off Liga 40 riba djamars i djaweps, play-off di Liga Amstel riba djarason, djabièrnè i djasabra. Play-off final di Liga 50 djasabra awor entre Ban Serio i Baranka, djasabra play-off 5 vs 6 di Beisbòl Veterano. Djadumingu play-off final Liga 50 di Beisbòl Veterano entre Jandoret Raiders i Santa Rosa. Djadumingu wega ganadó di 5 vs 6 kontra 4 di Beisbòl Veterano i djadumingu 2’or tin play-off final di Liga 60 Sòftbòl na Frank Curiel Ballpark entre ekiponan Nos Tambe Por i Jaws. Nos Tambe Por a gana djadumingu ku skor di 7 pa 2 dilanti un bon públiko na Frank Curiel Ballpark.
* * * * *
Nos tin numeritonan di e promé wega di final entre Nos Tambe Por i Jaws. Nos Tambe Por a nota 7 kareda, dal 12 hit i hasi 3 eror. Michelangelo ‘Galbao’ Boekhoudt tabata e picher ganadó. Hendrik ‘Payo’ Gabriel a bati di 4-3, Percey Schoop i Norwin Moesquit di 3-2. Sherwin Belioso tambe a bati di 3-2. Jaws a bati 6 hit i nan a kometé 3 eror. Anthony Pieter tabata e picher pèrdèdó. Marvin ‘Pin’ Wijman a bati di 2-1. Giovanni ‘Vanchi’ Toppenberg a bati di 1-1. Lesley Fer a konektá un homerun. Jaws a sinti falta di Raimy Pastor i Tyron de Palm ku tabata den eksterior. Nos Tambe Por a start wega sin Emile Haswell, Winston Kirindongo, Jurgen Lichtenberg i Nelly Jakoba. Nelly Jakoba tambe tabata keiru na Colombia ku ekipo Viajeros. Kirindongo i Lichtenberg a drenta wega despues. Ta spera tur dos ekipo kompletu pa djadumingu awor na Frank Curiel Ballpark.
* * * * *
Ekipo Vajeros a biaha djadumingu 3 di novèmber pa Medellin Colombia pa partisipá na un torneo 60+. E ekipo a gana e promé wega pa despues pèrdè wega number 2. Segidamente e ekipo Viajeros ku varios hungadó di Los Amigos i otro hungadónan di 60+ a gana dos wega sigí pa terminá ku rèkòrt di 3-1. Di un manera òf otro e ekipo no a klasifiká pa e play-off. E ekipo Bogota a bira kampion. E ekipo ta regresá djarason p’asina e 60+ nan ku ta den play-off final por train pa duna un bon espektákulo djadumingu awor.
* * * * *
Beisbol Veterano ta start ku play-off e wikènt benidero i nos a risibí tambe e sifranan individual final pa loke ta e kampionato regular. Den picheo pichernan ku ta dominá ta Xaviero Avastia, Farley Ignacio i Ramses Jamanika ku ta number 1, di 2 i 3 den ERA. Ta sigi e veteranísmo Amador Nita i Evenon Martis. Nos ta para ketu un ratu na e ERA ku naturalmente ta e parti mas importante di picheo. Xaviero Avastia (Quality Stars 1.32) , Farley Ignacio (Quality Stars, 1.54) i Ramses Jamanika (Santa Rosa Memories, 2.07), ku ta number 1, di 2 i di 3 den ERA. Ta sigi e veteranísmo Amador Nita i Evanon Martis di Santa Maria Pirates ku a terminá ku un ERA di respektivamente 2.36 i 2.80. Amador Nita ta e picher ku mas edat ku ta dominando bon den 40+. Segun nos Amador Nita tin 57 aña i ta pichando den gran forma ketu bai.
* * * * *
Den bateo Myson Cathalina di Yesterday a sali lider ku un average di .625, ta sigi Byron Kook di Broncos ku .583. Rodrick Zimmerman (Santa Maria) ku un average di .578, Rodney Michel di Quality Stars tambe ku average di .578 i Roderick Eustatia (Isla) ku tin .565. Signald Paz di Santa Rosa i Merieldo Trinidad di Quality ta lider di homerun ku 2 homerun konektá. Vários batiadó tabatin un homerun. Den kurso di dianan nos lo elaborá mas riba e sifranan.
* * * * *
Djaweps mester tabatin wega di Liga 40 entre Cicoza i Swift na Van Engelen Ballpark. Cicoza a gana ku skor di 18-12 i lo bai topa ku Gamers den e semi-final. Baranka ku a swip ekipo Gamers ta den final for di djaweps siman pasá pendiente e ganadó di semi-final. Tene kuenta ku play-off di Liga Amstel ta sigi ku weganan entre Gamers i Cicoza i Terremoto vs Thrillers. Gamers a gana Cicoza 8 pa 4 i Terremoto a gana Thrillers 9-8 djabièrnè 8 di novèmber. Nos ta keda te aki pa awe. Te mayan ku Poder di Dios.
