Baranka a gana 2 wega i klasifiká number 4 den Liga 50
WILLEMSTAD- Baranka a gana Flamboyan/Gamers 7 pa 5 djasabra i despues derotá Sluggers 19 pa 6 djadumingu i klasifiká komo number 4 di Liga 50. E aña aki ekiponan number 4 te ku 7 a hunga wild card. Djasabra Sluggers (7) a gana Pitufos (4), 9 pa 8 despues Baranka (5) a gana Flamboyan (6). Djasabra awor play-off ta start ku Marlins (1) kontra di Baranka number 4 pa 12’or di mèrdia. Despues ta sigi Ban Serio vs Jaws pa 2’or. Djadumingu ta Jaws vs Ban Serio pa 12’or i despues pa 2’or ta Marlins kontra Baranka. Si tin empate weganan lo tuma lugá djasabra 9 di novèmber 12’or of 2’or, dependé kua seri empatá. Keda pendiente pa mas detaye.
Marlins lo topa ku Baranka djasabra 12’or pm na Van Engelen Ballpark.
Jaws ta pasa pa final i Nos Tambe Por lo topa ku Lions den 60+
WILLEMSTAD – Play-off Liga 60 a start djadumingu na Frank Curiel Ballpark. Den un wega kayente ekipo Jaws a gana di Nos Tambe Por ku skor di 5-4 den e wega di play-off page system entre number 1 i 2. Ku e viktoria aki Jaws a pasa dirèkt pa final di 2024 atrobe, miéntras Nos Tambe Por lo bai hunga kontra Lions. Lions ku tremendo picheo di Gregory Martijn a gana di Pitufos ku skor di 4-0. Lions a klasifiká number 4 i Pitufos a terminá number 3. Bon públiko pa mira e weganan na Frank Curiel Ballpark djadumingu. Djadumingu awor 2’or Nos Tambe Por lo topa ku Lions na Frank Curiel Ballpark.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon diai felis wikènt. Wikènt pasa kayente ku weganan di play-off den Liga 50 i Liga 60 di Sòftbòl. Pa loke ta trata Beisbòl Veterano, Jandoret Raiders i Broncos ta pendiente pa terminá e wega ku a keda empatá. E wega lo sigi djadumingu 3 di novèmber pa 10.30 am na Vi Jansen Ballpark. E wega a keda empatá djasabra 19 di òktober na 7 kareda. Den kaso ku Jandoret gana e wega mester wak kareda kontra entre e dos ekiponan. Den kaso ku Broncos gana nan lo klasifiká komo number 6 den Beisbòl Veterano 2024. Djasabra último Quality Stars ku ta number 1 riba stading a gana di Otrabanda ku skor di 1-0, lagando Otrabanda den tereno den di 7 inning (tie break).
* * * * *
Den otro wega Jandoret Raiders a gana di Otrabanda ku skor di 11-5 den 40+. Jandoret mester a gana e wega ei pa keda ku chèns di klasifiká pa play-off. Beisbòl Veterano a sigi ayera ku 1 wega di Liga 50 i dos wega di Liga 40. Jandoret a gana Otrabanda den Liga 50.
Sat Rosa mester a lucha pa gana Azucar 5-4 i Isla Crackers a derota Yesterday 7-6. Djasabra 2 di novèmber lo tin e último wega di buelta regular i dia 3 di novèmber kontinuashon di e wega entre Jandoret Raiders i Broncos. Play-off lo bira interesante, pero mester atmití ku fanatikada na Beisbòl Veterano a kai drástikamente durante e último añanan. Tin indikashon ku Liga 50 lo haña 2 ekipo mas. Liga 50 di Beisbòl lo tabatin 6 ekipo den 2024, pero a resultá ku ta solamente 4 ekipo, Jandoret, Santa Rosa, Otrabanda i Energy.
* * * * *
Liga 50 a sigi djasabra i den e promé wega ekipo Sluggers a zona un kampanaso riba Pitufos ganando ku skor di 9-8. Sluggers tabata dilanti durante henter e wega i Pitufos ta bini bon bèk den e wega pa empatá e wega na 8 den bòm di e di 6 inning. Den kabes di e di 9 inning Sluggers ta nota un kareda despues di out i ekipo Pitufos ta sali out 1, 2 ,3 den último inning. Axel Gomez a tira wega kompletu i resultá e picher ganadó. Sluggers mester a sigi djadumingu kontra Baranka ku a gana Flamboyan Gamers 7 pa 5. Baanka a pasa fásil riba Sluggers i klasifiká komo number 4. Flamboyan tabata dilanti den wega un ratu so den kabes di e di 4 inning, pero Baranka ta skor 6 kareda pa bòltu e wega ganando 7 pa 5.
* * * * *
Gamers a bira kampion di temporada regular di Liga Amstel. Ekipo Gamers a gana Terremoto ku skor di 14-11 djasabra último i terminá na promé lugá. Resultadonan di djasabra 26 di òktober ta
Terrepower vs Sugar 7-0 i ta parse ku e wega no a sigi, ke mèn stail di defolt Terrepower a gana. Den e otro wega Thrillers a zona X-Treme duru ganando ku skor di 26-7. Nos ta pendiente pa mas detaye di Liga Amstel ku ta rumbo pa play-off.
* * * * *
Nos ta pendiente di desaroyonan di Liga 40 tambe ku ta den fase final. Hopi kandela den fin di òktober aki rumbo pa novèmber den e respektivo liganan. Djadumingu awor un delegashon grandi di Los Amigos ku varios sòfbòlista veterano lo sali pa Medellin ku ta birando un gran destinashon pa Sòftbòlistanan. Varios ekipo 60+ a kuminsá mobilisá pa hunga Dutch Caribbean Tournament na Aruba na komienso di òktober 2025. Nos ta keda te aki pa awe i te mayan ku Poder di Dios.
