Baranka kampion Liga 40 di 2024 i mas informashon di Sòftbòl i Beisbòl
WILLEMSTAD – Baranka ta gana Cicoza ku skor di 13 pa 2 den wega number 2 di e final djamars 3 di desèmber i bira kampion Liga 40 di temporada 2024. Basta bon públiko pa mira e wega number 2 di final ku a tuma lugá na Van Engelen Ballpark. Raylison ‘Sontje’ Gijsbertha ku a picha e dos weganan final kompletu, gana tur dos pa bira MVP di e seri final. Despues di wega tabatin entrega di premio di e eksitoso final di Liga 40. Nos tin detaye di entrega di premio i potrèt.
NUMERITONAN
Baranka a nota 15 kareda, bati 15 hit i hunga sin kometé eror.
Raylison Gijsbertha tabata e picher ganadó. Jair Josepha a bati di 3-3, Luigi Alvarez di 4-3. Ryan Ogenia a bati di 2-2. Jair Josepha, Charles Merite, Eldred Estanista i Dave Kirindongo a dal un homerun.
Cicoza a skor na 3 okashon, bati 6 hit i kometé 2 eror. Jeremy Obispa tabata e picher pèrdèdó. Ryan Imperator a bati di 3-2. Ryan Imperator i Yurendell de Caster a bati un homerun.
Kampion: Baranka.
Supkampion: Cicoza.
Di tres lugá: Gamers.
MVP Final: Raylison Gijsbertha (Baranka).
Kampion temporada regular: Gamers.
Kampion picher: Raylison Gijsbertha (Baranka) 7-1 ERA 2.70.
Fernando Rosario (Gamers) 7-1 ERA 3.35.
Kampion bate: Julius Veeris (Cicoza) 15-22 .682.
Lider di Homerun: Ericson Senior (Baranka) 3 homerun.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia i felis wikènt. Baranka a bira kampion di Liga 40 pa di 3 biaha sigí djamars 3 di desèmber na Van Engelen Ballpark. Baranka tin un dinastía den Liga 40 despues ku nan a bira kampion pa di 3 biaha sigí. 3 biaha kampion sigí ta dinastía. Swift tabata kampion na 2021 i ekipo Crazy Tigers kampion na 2021. Baranka a dal Cicoza ku skor di 15-3 den wega number 2. Cicoza práktikamente por a gana wega number 1. Nan tabata ganá ku skor di 12-3 i einan kosnan a bòltu i keda di bòltu i Baranka a swip Cicoza i bira kampion atrobe. Despues di wega tabatin entrega di premio na Van Engelen Ballpark. Un públiko basta bon tabata presente pa mira wega djamars último.
* * * * *
Despues di a tuma e kopa kampion Baranka i nan fanátikonan i haña un tremendo kuminda di Ada Ramazan ruman di Tico Ramazan, manera ya a bira un tradishon. Cicoza tambe apesar ku nan no a logra bira kampion por mira atras riba un tremendo kampionato logrando supkampion den nan di dos temporada Liga 40. E aña aki Liga 40 a start na komienso di ougùstùs i terminá djamars 3 di desèmber. 6 tim a partisipá den e kampionato. Baranka, Cicoza, Gamers, Swift, Twister i Jaws. Gamers a terminá na promé lugá, Baranka number 2, Cicoza 3 i Swift number 4. Baranka a bai final dirèkt, miéntras Cicoza a saka Swift pa despues gana Gamers den e sitema di page.
* * * * *
Liga 40 lo keda na 6 ekipo den 2025, pero tin espasio pa krese. Segun nos Liga 40 a start den añanan 80 i ta rumbo pa yega 40 aña di eksistensia. Ekiponan ku nos sa for di kabes ku a yega di gana Liga 40 ta Baranka, Happy Stars, Swift, Marlins, Crazy Tigers, Catpower ets. Happy Stars, Catpower, Crazy Tigers, Marlins no tei mas den Liga 40. Hopi di e ekiponan aki tei den Liga 50 si i e hungadónan ku a bira kampion tempu di nan tempu tei ketu bai den Liga 50 i Liga 60.
* * * * *
Nos ta den desèmber i hopi hungadó ke sigi move tòg. Ta di warda un ratu wak kiko ta bai pasa den yanüari. Antes tabatin Torneo Kopa Joy Alberto organisá pa Baranka den luna di yanüari, despues a bini Torneo Survivors The Greats. Pa loke ta 2025 ta Torneo Amstel Bright i Torneo Hope ta sigiur ku lo move den komienso di aña. Amstel Bright Premier Cup ta pinta di bira grandi atrobe. Ta e torneo mas grandi despues di Torneo Hope i ta e torneo ku e organisashon mester partisipá debí ku ta plaka kèsh ta gana na momentu ku bo ekipo bira kampion.
* * * * *
Na 2025 lo tin Torneo ABC&S di Liga 50 i lo ta na Sint Maarten sigur. Pa di promé biaha na Sint Maarten naturalmente ku Liga 50. Mester bisa ku pasashi pa Sint Maarten ta karísimo i ban spera ku e aña aki si e torneo lo bai dor. E torneo ta di 28 di mei pa 4 di yüni. Paketenan di 8 dia i 7 anochi a sali kaba pa loke ta ABC&S 50+ na Sint Maarten. Ekiponan ku a konfirmá nan partisipashon na Sint Maarten ta Marlins i Ban Serio. Parse ku Baranka ta kla pa djòin Liga 50 pa loke ta trata ABC&S debí ku Baranka lo no partisipando na 40+ ABC&S mas. Tene kuenta ku tin Torneo ABC&S di e hóbennan i torneo di Karibe 50/60 ku ta konta ku partisipashon di Pitufos i probablemente Power di Liga 60.
* * * * *
Pa otro siman nos lo kuminsá resumí e kampionnan di 2024 pa loke ta trata Slowpitch. E aña aki ta Liga 40 di Beisból Veterano ta úniko liga ku no a konosé un kampion. Baranka tabata eksitoso ku títulonan den 40+ i 50+ i ta rumbo pa drenta 60+ den 2025. Cicoza a bira kampion di Kopa ABC&S i tabata supkampion den Liga Amstel i despues den Liga 50. Nos ta keda te aki pa awe i te mayan ku Poder di Dios.
