Baranka kontra Ban Serio den wega number 2 di final djasabra 2’or
WILLEMSTAD- Baranka dilanti 1-0 den e seri final lo topa ku Ban Serio den wega number 2 di e seri final djasabra 2’or pm na Van Engelen Ballpark. Baranka mester di un viktoria pa bira kampion atrobe di Sòftbòl Liga 50. Baranka ta kampion 2021 i 2022, miéntras Ban Serio ta kampion di 2023. Ban Serio a bira kampion kontra di Baranka na 2023 i Baranka a gana ekipo nan Pitufos i Jaws respektivamente na 2022 i 2023.
Den e promé wega ku a tuma lugá djasabra siman pasá den un wega emoshonante, ekipo Baranka a gana ku skor di 6-5. Nos tin numeritonan di e promé wega i fanátiko, yega debí ku djasabra awor por ta último wega di Liga 50 di 2024 kombiná ku entrega di premio.
Baranka 6, Ban Serio 5
Baranka a dal 8 hit i hunga sin eror. Kenny Hellement tabata e picher ganadó tirando henter e wega. Fisel Pereira a bati di 3-2. Kenny Helllement di 2-1 ku 2RBI i Josef Everon tambe di 2-1 ku 2 RBI.
Ban Serio a bati 6 hit i hasi 3 eror. Michelangelo Boekhoudt tabata e pícher pèrdèdó. Miro Daal a tira dos inning di relevo. Miro Daal a bati di 1-1 ku un homerun. Luigi Yanez a bati di 2-2 ku 3 RBI.
Seri semifinal di Liga 40 ta empatá i lo hunga wega number 3 djamars
WILLEMSTAD- Seri semifinal di Sòftbòl Liga 40 entre ekiponan Cicoza i Gamers a empatá na 1 djaweps, 21 di novèmber den oranan di anochi na Van Engelen Ballpark. Gamers a gana Cicoza ku skor di 16-10 djaweps pa empatá e seri. Djamars, 19 di novèmber tabata Cicoza ku a gana Gamers ku skor di 8 pa 3. Djamars awor tin e wega desisivo i ganadó di e wega aki lo pasa pa final 40+ kontra Baranka ku tin dos siman ta warda. Nos tin numerito di e dos weganan.
Djaweps 21 di novèmber
Gamers 16, Cicoza 10
Gamers a dal 12 hit i hasi 1 eror. Fernando Rosario tabata e picher ganadó i e mes a bati un homerun. Jair Quant i Kevin Boekhoudt tambe a konektá un homerun. Christiaan Sint Jago a bati di 2-2, Jair Quant di 2-2 i Ryan Imperator a bati di 4-3.
Cicoza a konektá 11 hit i hunga sin eror. Gilbert Henrietta tabata e picher pèrdèdó. Andley Simmons a bati di 2-2. Dave Janga i Rhiëncy Imperator a bati di 4-3. Rodney Riley i Yurendell de Caster a bati un homerun.
Djamars 19 di novèmber
Cicoza 8, Gamers 3
Cicoza a bati 12 hit kometé 3 eror. Jeremy Obispa tabata e picher ganadó i Julius Veeris i Rodney Riley a bati di 4-2. Dayron Puriel di 4-2. Jonathan Pascual di 1-1. Dayron Puriel i Julius Veeris a konektá un homerun.
Gamers a bati 8 hit i hasi 2 eror. Fernando Rosario tabata e picher pèrdèdó i e mes a bati di 3-2. Jair Quant tambe a bati di 3-2.
Semi-final di Beisbol Veterano kanselá
WILLEMSTAD- Nos a risibí e informashon ku e semi-final entre e promé 4 ekiponan di Beisbòl Veterano a keda kanselá debí na un protesta di ekipo Yesterday. Yesterday a perde e protesta pero nan apelá. Quality (1) mester a enfrentá Santa Rosa (4) I Santa Maria (2) lo a topa ku Isla Crackers.
Durante e kampionato regular ekipo Quality Stars a gana Santa Rosa ku skor di 7-1 dia 21 di yüli den buelta number 1 i ku skor di 10 pa 3 den di dos buelta, dia 21 di sèptèmber. Railison Gijsbertha a gana e promé wega pa Quality i Farley Ignacio e wega number 2. Ramses Jamanika estelarísimo di Santa Rosa Memories no a habri e dos weganan pa Santa Rosa kontra di Quality Stars. Pa loke ta e seri Santa Maria vs Isla Crackers, Santa Maria a gana wega number 1 ku skor di 6-2 i Santa Maria a pèrdè e di dos wega 11-5. Evenon Martis a gana wega number 1 i Eldred Estanista a habri wega number 2 pa Santa Maria. Pa Isla Crackers Orsendo Clemensia a gana wega number 2 i pèrdè e wega number 1 pa Isla Crackers.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bondia i felis wikènt. Fin di siman kayente kayente ku hopi play-off semi-final i final den Sòftbòl Slowpitch i Beisbòl Veterano. Nos ta pendiente di resultado di wega di semi-final 40+ entre Cicoza i Gamers. Djamars último Cicoza a gana Gamers ku skor di 8 pa 3. Nos tin e numeritonan di e wega ei despues. Gamers ya den final di Liga Amstel i ta pendiente di semi-final entre Cicoza i Terremoto. E wega di djarason a keda suspendé pa motibu di awaseru i mal estado di tereno. Cicoza a gana dos wega sigi di Terremoto djabièrnè i a klasifiká pa playoff.
* * * * *
Djasabra despues di final di Liga 50 lo tin wega number 2 di e final. Djasabra na Van Engelen Ballpark nos lo por tin un kampion di Liga 50. Baranka ta dilanti 1-0 den e seri i tin chèns di bira kampion pa di 3 biaha den kuater aña. Nan tabata kampion 2021 i 2022. Ban Serio ku a topa ku Baranka a bira kampion aña pasá. Promé wega tabata kandela kaminda ekipo Baranka a gana ku skor di 6 pa 5 komo ekipo di bishita. Baranka lo ta ekipo di kas djasabra. Por spera Kenny Hellement atrobe pa Baranka kontra Michelangelo Galbou Boekhoudt pa Ban Serio.
* * * * *
Parse ku sport.cw lo tei atrobe manera tabata e kaso den wega number 1 di e final Liga 50. Nan tabata por la goma wikènt pasá i a transmití final di 50+ Beisbòl Veterano i Liga 60. Beisbòl Veterano ta start ku play-off semi-final entre Santa Maria Pirates i Isla Crackers i Quality Stars vs Santa Rosa Memories. Ekipo Yesterday a file un protesta riba e último wega ku Santa Rosa Memories a gana. Según informashon ofishal Yesterday a pèrd֞è e protesta i nan tabata pendiente pa apelá. Skema di djasabra 23 di novèmber mester tabata Santa Maria Pirates kontra Isla Crackers 11 ‘or. I pa 2’or ta Quality Stars kontra di Santa Rosa Memories. Djadumingu ta Santa Rosa Memories vs Quality Stars pa 11’or i Santa Maria kontra Isla Crackers pa 2’or.
* * * * *
Bèk den tempu den e liganan ariba menshoná 10 aña pasá. Bombers a hunga kontra ekipo Terremoto i a bira kampion di Liga Amstel e tempu ei na Suvek Ballpark ku awor a bira Van Engelen Ballpark. Den 50+ tabata ekipo Ban Serio ku a gana Flamboyan den final pa bira kampion. E tempu ei Liga 50 tabata hunga na Cirilo Chirino Ballpark. Na 2014 Jandoret Raiders después ku nan a bira kampion a organisá un torneo ‘Sera Aña’ fin di novèmber na Jandoret Ballpark ku a konta ku partisipashon di ekipo Mi Kos di Moises Zimmerman ku a kuminsá prepará pa kampionato 2015. Tabatin Brievengat Boys ku tabata den plan pa drenta Beisbòl Veterano, Quality Stars, Isla Crackers ku nèt a kaba di lanta, Jandoret for Real ekipo di Achie Zimmerman i Yesterday a partisipá na e torneo.
* * * * *
Na komienso di 2025 lo tin Beisbòl Profeshonal na Kòrsou atrobe. Willemstad Cannons, Curacao Goats i Curacao Suns. Ta di dos temporada di Beisbòl Profeshonal kaminda e 3 ekiponan di biaha pasá lo kompetí atrobe, p’asina nos por hunga Serie del Caribe. E Serie del Caribe lo tuma lugá na Meksiko i un ekipo di Hapon tambe lo partisipá. Tabatin indikashon ku Kòrsou lo no partisipá. Aña pasá por a mira hungadónan prospekto manera Mairoshendrick Martinus, Jakey Josepha, Kay-lan Nicatia i otronan.
* * * * *
Pa loke ta trata Beisbòl Dòbel A no masha notisia. Tin rumor ku Risandro Pastor lo move di Wild Cats pa Santa Maria Pirates. En todo kaso ban pa Beisbòl Veteranot. Kandela den wikènt den Beisbòl Semi-final. Ekiponan Quality Stars i Santa Maria Pirates ku a terminá number 1 i 2 respektivamente, ta faborito pa gana e serinan. Quality Stars number 1 a gana di Santa Rosa Memories na dos okashon durante temporada regular. Ekiponan Isla Crackers i Santa Maria a splet durante kampionato. Quality Stars tin solamente dos wega pèrdí ku ta kontra Isla Crackers i Yesterday ku a kai afó. Santa Maria a pèrdè 3 wega. Unu kontra Isla i dos kontra Quality Stars. Isla Crackers ku 4 pèrdí a pèrdè kontra Santa Rosa, Yesterday, Quality Stars i Santa Maria. Ya … Ban spera ku lo sigi dianan 30 di novèmber i 1 di desèmber. E ekiponan ku a bai play-off ta hopi pèrtá riba otro. Nos ta keda te aki pa awe. Te mayan ku Poder di Dios.
