Baranka kontra Nos Tambe Por i Jaws kontra Ban Serio djasabra awor
WILLEMSTAD – Djasabra 14 di desèmber lo tin weganan amistoso na Frank Curiel Ballpark kaminda ekiponan kampion i supkampion di 60 lo topa ku esnan kampion i sup kampion den 50+. Ekipo Nos Tambe Por kampion 60+ lo topa ku Baranka ku ta kampion di 50+. Jaws supkampion di 60+ lo topa ku ekipo Ban Serio (supkampion 50+).
E weganan aki ta alabes fundrasing di ekipo Nos Tambe Por ku tabatin un aña super eksitoso den 2024 i pa yama danki na fanátikonan. Mirando ku no tin mas aktividat pa loke ta trata Slowpitch den 2024, ta spera un bon públiko pa mira e 60+nan midi forsa kontra e 50+. Pa 1’or ekipo Jaws 60+, supkampion di Liga 60+ lo topa ku Ban Serio (50+) supkampion i despues pa 3’or pm ekipo Nos Tambe Por, kampion 60+ kontra ekipo Baranka kampion 50+. Den kurso di siman nos tin mas promoshon i detaye di e weganan aki.
Fransje Lambertina di Jaws pa Lions den 60+
WILLEMSTAD – Fransje Lambertina lo move di Jaws pa Lions den Liga 60 den 2025. Djasabra 7 di desèmber Fransje Lambertina tabata den e wega amistoso ku Lions 60+ a hunga kontra un ekipo 60+ di Aruba. Naturalmente hungadó i dirigentenan di Nos Tambe Por, ekipo kampion di Liga 60 tabata presente na Frank Curiel Ballpark i a mira Fransje den akshon. Nos no a drenta den kontakto ku Fransje Lambertina i Lions ainda, pero por asumí ku Fransje tin bon kontakto ku vários hungadó den Lions. Fransje sigur ta un dje mihó batiadónan di Liga 60 ku tin un tremendo spit i ainda ta move den Liga 50 ku ekipo Jaws.
Den 50+ Fransje Lambertina ta manager i den 60+ e tabata un di hungadónan prinsipal durante último añanan. Fransje a bira kampion ku Jaws na 2022 i 2023 i ta for di 2021 ta den akshon den e ekipo 60+. Manera nos a antisipá vários hungadó di Jaws no a keda kontentu den fase final di e kampionato i nos a skibi ku vários lo move pa otro ekipo kaminda nan tin mas chèns di hunga. Wimbert Hato pilá di Jaws 60+ i manager kampion na 2022 a move pa Pitufos. Einan Wimbert lo bira manager di e ekipo ku e tabata forma parti di dje pa hopi aña. Hungadónan manera Raimy Pastor, Tyron de Palm ta menshoná pa move. Rudsel Poulina, manager di 2023 i 2024 a baha komo manager. Keda pendiente pa mas informashon di Liga 60.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bondia. Den desèmber aki i ta luna di resumen Deporte Kòrsou kaminda nos lo resumí kon e liganan a bai den 2024 i naturalmente e kampionnan di e aña aki. Ekipo Nos Tambe Por despues di un tremendo aña den 2024 tin un dia di Sòftbòl Veterano Maskulino, un fundraising yama danki na fanátikonan ku a apoyá e ekipo sin fin den 2024. Djasabra 14 di desèmber lo tin weganan na Frank Curiel Ballpark entre grandinan di Sòftbòl den 2024. Ekipo Nos Tambe Por, Jaws, Baranka i Ban Serio lo mira akshon. Ban Serio i Baranka lo kompetí ku nan ekiponan di 50+ kontra di ekiponan 60+ manera Nos Tambe Por i Jaws. Bar i kushina lo ta bon surtí naturalmente.
* * * * *
Djasabra pa 1’or ekipo Jaws 60+, supkampion di Liga 60+ lo topa ku Ban Serio (50+) supkampion i despues pa 3’or pm ekipo Nos Tambe Por, kampion 60+ ku ekipo Baranka. Baranka naturalmente ta kampion di 50+ i Ban Serio supkampion di 50+. Djaluna ekipo Nos Tambe Por super eksitoso den 60+ den 2024 lo bai tin un Santu Sakrifisio di Misa pa despues reuní i kaba di organisá e evento di djasabra awor. Pa 5’or lo tin e wega final entre e ganadónan. Nos Tambe Por a sali den 2024 hopi suak kaminda nan a kaba di pèrdè 6 hungadó den un tiru. Nos Tambe Por a pèrdè den semi-final kontra Jaws den Amstel Bright Premier Cup. Wega ku Nos Tambe Por tabata ganá pa 6 kareda te den nan último chèns.
* * * * *
Despues Nos Tambe Por a bai e sigiente torneo ku tabata Torneo Jaws i Nos tambe Por a bira kampion ganando Pitufos den final pèrtá i bira kampion Torneo Kid Boca Chica organisá pa Jaws den luna di aprel. Despues Nos tambe Por a partisipá den Torneo Lions i bolbe bira kampion, den e kaso aki ganando di Jaws den final ku skor di 8-4. Esei tabata na komienso di mei. Den e promé wikènt di òktober Nos Tambe Por a move pa Boneiru pa e Torneo ABC&S master 60+ i bira kampion. Hulanda tambe a partisipá den e torneo aki. Nos Tambe Por a gana e ekipo di Boneiru Stars den final ku skor di 5-0. Un aña nunka bisto den 60+ pa un ekipo ganando 3 di e 4 torneonan ku nan a partisipá i koroná obra ku kampion di Liga.
* * * * *
Pa loke ta trata Beisbòl Veterano 40+ nada konkreto ainda i tur fanátiko i hungadó ta pendiente kiko ta bai pasa. Jandoret Raiders a bira kampion di 50+ i ta pendiente pa risibí nan kopa komo kampion. Otro aña manera nos a bisa ta spera 2 ekipo mas den 50+ i Liga 40 probablemente lo bira un ekipo ménos. Nos ta pensa ku e ekipo Flamingos lo no bini bék, debí ku vários hungadó ku a duna palabra na Flamingos na komienso di temporada i despues a bai otro ekipo. Hopi hungadó di e ekipo ta hunga den e torneonan ku partisipashon di Latinonan den wikènt i no ta disponibel. Hopi kos lo bai kambia den Beisbòl Veterano den 2025 i lo revisá e reglanan i no ta konosí kiko ta bai pasa na Vi Jansen Ballpark. Parse ku tin un komishon di apelashon i desishon lo kai pronto, esei ta loke nos a tende den kaya.
* * * * *
Ekiponan ta serando aña manera ya a bira un tradishon. Tene kuenta ku hungadó i dirigente a yega di bai foi tim debí ku e organisashon òf ekipo no a sera aña. Inkreibel kon hende a para bira òf ta pensa. Hungadónan ke sera aña, pero ora nan tende di kontribushon nan ta bula pipa. Seramentu di aña tur hungadó mester kontribui ku algu i si spònser duna algu ta bon biní. En todo kaso nos tei pa kubri e seramentu di aña i naturalmente nos no por bai tur. Ora nos bai unu i sin logra bai e otro tambe bo ta tende yen kos.
* * * * *
Pronto nos lo kuminsá ku e resumen tan sperá, p’asina timnan por broma kiko nan a logra den 2024. Awe den e kolumna nos a para hopi ketu na Nos Tambe Por ku lo tin un fundrasining djasabra awor i ku a logra un aña simplemente espetakular. Keda pendiente pa detaye di e weganan di djasabra awor na Frank Curiel Ballpark. Nos ta keda te aki pa awe i te mayan ku Poder di Dios.
