Baranka ta swip Swift i bira kampion Liga 40
WILLEMSTAD- Baranka a gana Swift ku skor di 12 pa 8 i ta ripití komo kampion di Liga 40. Baranka tabata kampion di temporada 2022. Baranka a terminá 2023 invikto ganando tur wega di buelta regular i tur wega di playoff. E promé wega di e seri final aki a terminá ku skor di 2 pa 1. Railison ‘Sontje’ Gijsbertha ku a picha tur wega di playoff i tur wega pa Baranka den 2023, a bira MVP di e seri final. Despues di wega tabatin entrega di premio di tim i premionan individual. Swift a risibí e premio di supkampion i Cicoza di tres luga.





Kampion: Baranka
Supkampion:Swift
Di tres luga: Cicoza
MVP seri final: Railison Gijsbertha (Baranka)
Kampion bate: Eldred Estanista (Baranka)
Kampion picher: Railison Gijsbertha (Baranka)
Lider di homerun: Merieldo Trinidad (Baranka)











Petro Amigos bèk na Kòrsou despues di eksitoso biahe pa Medellin
WILLEMSTAD- Ekipo Petro Amigos tabata di 7 di novèmber pa 15 di novèmber na Medellin pa partisipá pa un torneo grandi 60+. E ekipo ku tabata konsistí di hungadónan di Nos Tambe Por, Jaws, Los Amigos i Lions a hunga 4 wega i gana 1. Resultadonan tabata Petro Amigos 10, Fundepa de Cartagena 9. Despues tabata Petro Amigos 5, Veteranos de Sincelejo 12. Petro Amigos 3, Amigos de Cordona 7. 16 ekipo a partisipá den e torneo. E ekipo Fundepa de Cartagena a gana Amigos de Cordona den final pa bira kampion. Hefe di delegashon tabata Jerson Beaumont. E hungadónan ta bèk na Kòrsou pa pronto hunga play-off ku nan ekipo di 60+.









Ekipo Otrabanda tabata na República Dominicana
WILLEMSTAD- Ekipo Otrabanda den Beisbòl Veterano tabata na República Dominicana i ta bèk na Kòrsou. Nan a hunga Sòftbòl i Beisbòl na Boca Chica i Santo Domingo respektivamente. Tabatin dos enkuentro amistoso. E organisashon di Beisbòl Veterano aki a risibí algun plakat i rekonosimentu di partisipashon. E ekipo a gana un wega i pèrdè e otro. Otrabanda lo sigi na Kòrsou den e kompetensia di 50+ di Beisbòl Veterano 2023 huntu ku ekiponan Yesterday, Sigi Hunga i Jandoret. Otrabanda ta e ekipo di mas aña aktivo den Beisbòl Veterano i tin timnan tantu den 40+ komo den 50+ di BEVEKO.





MAS INFORMASHON DI SÒFTBÒL I BEISBÒL
Fanátikonan di Deporte Kòrsou bon dia i bon siman. Pabien (alsnog) na Pichingolo ku otro título den Sòftbòl Femenino Fastpitch nivel Dòbel A. Djasabra 10 di novèmber Pichingolo a gana e ekipo Santa Rosa Angels fásil ku skor di 5 pa 0 i bira kampion dilanti un públiko grandísimo na Sabana Ballpark. Santa Rosa por mira atras riba un gran temporada despues ku nan a pèrdè algun piesa klave na komienso di temporada.



* * * * *
Despues di wega tabatin entrega di premionan pa ekipo i hungadónan. Julise Coffie ku a gana tur e tres weganan di final I tabatin tremendo bateo i defensa den e seri final bira MVP. Un tremendo temporada pa Pichingolo ku a bira kampion pa di tantísimo biaha. Un tremendo organisashon fundá na 1973 i ku a kumpli 50 aniversario e aña aki i tabatin un gran selebrashon ku pueblo di Kòrsou na Buena Vista den luna di mei .



• * * * * * *
Riba mesun fecha, esta djasabra Jandoret Raiders a enfrentá Legends di Hulanda i gana ku skor di 5 pa 1. E wega amistoso entre Jandoret Raiders i Legends di Hulanda a tuma lugá djasabra 10.30 i tabatin transmishon bibu di sport.cw. Papito Stewart èks estrea picher di selekshon di Kòrsou i Santa Rosa Indians a tira pa e ekipo Legends di Hulanda. Edmar ‘Boy Motor Jr. Cornelia tabata e picher di Jandoret Raiders ku a tira dos inning di blankeo. Un gran wega amistoso i despues di wega hungadٕónan a keda huntu na bar di Vi Jansen Ballpark. Minister di Ekonomia Ruisandro Cijntje tambe a pasa un ratu i a manda un trit pa e ekipo Jandoret Raiders i pa Legends di Hulanda ku a keda kombersá ameno.



* * * * *
Ekipo Petro Amigos ku tabata Medellin despues ku nan a gana e promé wega a pèrdè tres sigí i no a logra klasifiká pa play-off den e torneo ku nan a partisipá. Nan a lucha bon, pero mayoría wega a bòltu den e último parti. Otrabanda Veterano ta na República Dominicana i a hunga dos wega. Varios hungadó ku tin nan fakansi planiá a move pa eksterior i nan ekipo ta den play-off aki na Kòrsou. Mientras tantu, Petro Amigos i Otrabanda Veterano ta na Kòrsou i nos tin relato di nan biahe.



* * * * *
Djaweps 16 di novèmber Baranka a bira kampion di 40+ ganando di Swift ku skor di 12-8. Wega number 1 di e seri tabata kandela kaminda ekipo Baranka a gana ku skor di apénas 2-1 den un wega di Slowpitch. Baranka tabata faborito pa bira kampion di Liga 40 atrobe i nan a logra. Baranka ta kampion di 2022, Swift tabata kampion na 2021 i na 2019 tabata e ekipo Crazy Tigers ku a stòp di partisipá den kampionato. Djasabra 18 di novèmber den Beisbòl Veterano, Quality a dal Jandoret 10-0 i i Santa Rosa a gana Isla Crackers 4-1. Weganan ta sigi djadumingu na vi jansen Balpark. Pa 11’or am Santa Rosa lo topa ku Isla Crackers atrobe i despues pa 2.30 pm Jandoret lo hugna kontra Quality Stars.



Ban bèk pa e ekipo super kampion di historia di deporte aki na Kòrsou. Pichingolo a bira kampion pa di 41 biaha i 4 biaha sigí. Ta di 48 kampionato ku Pichingolo ta partisipá den Dòbel A Femenino den nan historia i nan a gana 41. Nan no a gana e título na 7 okashon. Santa Rosa a kita e titulo na tres okashon for di Pichingolo, ekipo Cardenales, Blue Angels i Soto a gana Pichingolo na un okashon den final. Pichingolo tin 48 kampionato sigí den un final i ta rumbo pa otro rèkòrt ku ta 50 biaha sigí den final. Den tur e añanan ei un final no a keda hungá ku tabata un final entre Soto i Pichingolo. Pichingolo 48 biaha kampion, 6 biaha supkampion i un biaha no tabatin final. Nos ta keda te aki pa awe i te mayan ku Poder di Dios.


