Biografia Chu Martis na ken kampionato di Curacao Little League Sòftbòl 2025 ta dediká
WILLEMSTAD- Kampionato di Curacao Little League Sòftbòl 2025 ta dediká na Chu Martis i su kasa Zulma Martis-Martinez. Chu Martis ta eks presidente di Curacao Softball Bond (CSB) i tin un karera largu den Sòftbòl di Kòrsou tantu di Little League Sòftbòl komo Sòftbòl di adulto. Djarason nos a publiká e karera di Zulma Martis i awe nos tin e karera di Chu Martis.
Edward Chu Martis
E bida den Sòftbòl di chu Martis a kuminsá tempu ku tabata tin weganan di Sòftbòl ta tuma lugá den bario, spesífikamente riba vèlt di Casa Grandi. Einan tabata mira espesialmente weganan di Stimulans. Stimulans tabata un liga ku dirigentenan di ántes a lanta pa stimulá e hóbennan ku no tabata haña hopi “ playing time” e chèns di hunga i desaroyá. Huntu ku e hóbennan aki e nobatonan di tur edat tambe por a hunga. Manera hopi kos na Kòrsou e Federashon di Sòfbòl di e tempu ei, despues ku e Liga Stimulans a pèrkurá pa hopi talento nobo den Sòftbòl, a kuminsá molestiá e Liga Stimulans. E dirigentenan di Liga Stimulans a disidí di stòp ku e Liga i duna CSB e oportunidat di lanta Liga Hubenil. CSB a organisá un temporada na aña 1987 algu ku nan a yama Introdukshon di Liga Hubenil, pero esaki a keda te einan.
Sta Rosa Angels
Ora ku tabata wak e weganan di Stimulans a drenta e idea serka Chu Martis di lanta un ekipo( By the way, Zulma tambe a hunga den Stimulans ). Chu a bai kurso di umpire pa dominá reglanan. Tambe a bai kurso huntu ku Zulma ku Sedreko a organisá pa entrenadó. A buska algun material i a aserká algun prima ku algun mucha mas i a kuminsá. Pero den e temporada aki e frei di Chu Martis ku ta Zulma Martinez tambe tabata hunga Sòftbòl. A kuminsá yuda Zulma su ekipo i laga e idea di lanta un ekipo para i a trese e muchanan pa hunga den e ekipo di The Birds. Despues di tempu e muchanan no tabata masha kontentu i a disidí di bai sigui ku e idea di lanta ekipo. A komprondé ku na Sedreko lo por haña material di deporte. Ora ku a bai Sedreko a pidi Chu Martis pa yena un formulario. Riba e formulario mester a pone nòmber di e organisashon. Na e momentunan ei nunka no a pensa riba nòmber. Chu a hañ’e den pura ta pensa algu pa yena. Anto dor ku ta train na Sta Rosa a disidí di pone Sta Rosa Angels riba e formulario. Asina a yega na e nòmber Sta Rosa Angels. Den e temporada ku CSB no a hasi nada mas i mirando ku no tabatin nada mas pa hóbennan siña Sòftbòl, Chu Martis a tuma e inisiativa di aserká grandinan den deporte pa kuminsá ku un Liga hubenil di Sòftbòl. A aserká èks dirigentenan di Liga Stimulans, pero nan a keda disgustá pa e trato ku a haña serka CSB i no ke hasi nada mas. E úniko ku si ke a sigui tabata Juancho Josefina. Tambe Chu Martis a aserka Frank Curiel, Tonchi Martina . E promé reunion a tuma lugá na Don Nicho Hurtado kaminda e desaroyo pa e Sòftbòl a ser poné den marcha.
E liga Hubenil a krese di 4 organisashon inisial te ku 20 ekipo, kaminda a parti e ekiponan den 6 ekipo di Hubenil fuerte, 10 ménos fuerte i 12 ekipo pa nobatonan. E desaroyo di Hubenil a bin haña su “downfall” na momentu ku Chu Martis a sali for di CSB na aña 2003 kaminda e presidente nobo diCSB no por a keda mantené e ritmo i Hubenil a muri. Ta bon pa menshoná ku den e temporada ku Hubenil tabata den su gloria, Chu ku Zulma na 1998 a wòrdu aserká pa Carmelita Hayes di Aruba pa kuminsá ku e Sòftbòl Little League. Nos reuní na Aruba i traha riba e plannan. Pero mirando e hopi trabou ku tabatin e tempu ei ku e Hubenil a “stel-uit” e introdukshon di Little League Sòftbòl. Kier mèn Sòfbòl Little Por a kuminsá na Kòrsou promé ku tempu ku Cecil Garcia a tuma e inisiativa pa esaki na 2002.
Den CSB
Durante ku e hubenil tabata briando i ku CSB a inkluí Hubenil den su reglamentu den añanan 90, Chu Martis a drenta direktiva di CSB na 1995 te ku 2003 i regresá di 2016 te ku 2024 …… Di 2020 pa 2024 Chu a fungi komo presidente di CSB.
Durante di temporada ku tabata atendé ku kampionato di CSB, Chu Martis tabata e promé persona ku a kuminsá ku skoring digital for di un kòmpiuter, pero dor ku den e tempu ei no tabata tin hopi hende ta dominá kòmpiuter, Chu Martis mes tabata skor e weganan i ora ku no tabata na tereno skor wega bèk den e kòmpiuter. Despues ku a sali di direktiva di CSB ta te aña 2017 a bolbe introdusí skoring digital pa CSB.
Den e temporada despues di 2003 Chu a keda konsentrá riba su ekipo Sta Rosa Angels ku a desaroyái bira kampion di Kòrsou ku krioyo so na aña 2015 , 2017 i 2018, e úniko ku a logra gana di e gran ekipo mas ku 1 bia pa bira kampion. Ántes tabata masha komun ku un dirigente ta kore buska i baha e muchanan na kas. Esaki ta pone ku fuera di e dos ora di training, bo tin mínimo un ora di buska i hiba kas ta bini aserka. Anto e víktima prinsipal ta bira e medio di transporte. Aki algun di nan aki: Toyota Carina Station Wagen, Lada Samara, Bus VolksWagen, Toyota Starlet, Pickup Nissan, Volvo 240 Diesel,Toyota Pickup Dòbel kabina Nissan, Pickup Dòbel Kabina Toyota, Pickup 1000 Toyota, Mitsubishi Celeste , Hyundai Accent, Toyota Carina , Renualt Sandero ets. ets.
Aktividatnan internashonal
Chu a bai diferente selekshon komo coach, hefe di delegashon, umpire i manager. 1995 Chu tabata coach di selekshon. 1997 Chu a bai komo hefe di delegashon Venezuela. 1999 Hefe de Delegashon Pan Amerikano na Winnipeg Canada 2000. Chu tabata Manager na Wega Reinu Hulanda.
2001 Chu tabata Manager Pan Amerikano Hubenil na Hermosillo Méhiko.
2003 Hefe delegashon Wega Reinu na Aruba.
2003 Manager Junior League na Aruba.
2004 Manager Junior na Puerto Rico.
2005 Coach Senior na Puerto Rico.
2009 umpire na Puerto Rico.
2011 Big League.
2013 komo delegado little.
2017 Chu a asistí na Kongreso Mundial ku a tuma lugá na Botswana.
2019 Chu a asistí na Kongreso ku a tuma kugá na Baranquilla.
2021 Chu a asistí na Kongreso ku a tuma lugá na Panama.
2022 Chu a asistí na Kongreso Mundial ku a tuma lugá na Taiwan.
2023 Chu a asistí na Kongreso ku a tuma lugá na Virgen Islands.
2023 Chu a asistí na Kongreso ku a tuma lugá na Perú.
2024 Chu a asistí na Kongreso ku a tuma lugá na Baranquilla.
Teksto pa potret
Chu Martis i su kasa Zulma Martis-Martinez, na apertura di kampionato di Liga Soraida Juliana.
Chu Martina na ken e kampioanto ta dedika huntu ku invitadonan dia di apertura di kampionato di Curacao Little League Sòftbòl 2025.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bondia i felis wikènt. Nos ta den e gara di temproada di karnaval. Sosegá e kurpa òf mester a tuma liber pa por tuma parti na tur e eventonan. Tene kuenta ku despues di e jump innan e kurpa lo ta kansá di alkohòl òf kansansio di e último dianan. Bai poko poko den tráfiko, forma grupo bai e eventonan i laga un hende responsabel stür na momentu di bai kas. Un biaha mas, ban poko poko pa no mester lamentá despues.
* * * * *
Amstel Bright Premier Cup ta sigi mayan ku vários wega na Van Engelen Ballpark. Weganan di 60 òf 50 i 40 den oranan di mainta i despues Challenger i e weganan di Soshal Corporate i Soshal Open. Ta spera bon públiko atrobe manera ta e kaso di tur wikènt den Amstel Bright Premier Cup. E veteranonan di 50 i 60 por sinta tránkil mira e wega di e hóbennan ku ta move den Soshal. Cicoza organisadó di e Amstel Bright Premier Cup ta den gran forma ku nan dos ekiponan. Nan ta partisipá den Modified i den Liga 40. Wikènt di 14,15 i 16 ta kargá ku wega pa despues wanta un ratu e djadumingu di Marcha Hubenil. E siman di Gran Marcha no tin wega i e gran final di e torneo lo ta dia 9 di mart.
* * * * *
Serie del Caribe tabata eksitoso pa fanátiko aya na Meksiko. Ekipo Hapon a desapuntá kontra fuertenan manera Meksiko, Venezuela, República Dominicana i Puerto Rico. Hapon no a logra gana un wega. Meksiko a terminá e buelta regular 4-0, Venezuela 2-2, República Dominicana 2-2 i Hapon 0-4. Serie de Las Americas tambe tabata tremendo ku mas partisipashon, pero ku ménos fanátiko. Na momentu ku Nicaragua ku tabata e ekipo organisadó tabata den akshon, e stadion a yena. Serie de Las Americas tabata partisipashon di 6 ekipo Latino. Panama, Nicaragua, Kòrsou, Cuba, Colombia i Argentina. Panama a bira kampion despues ku nan a sorprendé ekipo Kòrsou i despues gana e fuerte ekipo di Nicaragua tambe.
* * * * *
Moveshonnan a sigi den Beisbòl Dòbel A. Royal Scorpions ekipo supkampion a move sin fin i a trese Coco Balentien komo manager. Coco Balentien a bini ku su primu Quinsly Balentien di Groot Kwartier Stars. Quinsly Balentien tabata brabu mes den play-off kontra di Santa Rosa Indians i kontra Royal Scorpions. Rumannan Basilia, Givaine ‘Chucho’ Basilia i su ruman Gedryon Basilio a pasa pa Wild Cats. Chucho ta infielder i utility player i Gedryon ta picher. Por spera mas moveshon di Royal Scorpions pa nan bai pa e título ku nan a pèrdè den 2024. Parse ku Mompy van Gurp ku tabata manager di Royal Scorpions for di 2018 lo bira general manager. Raywendley van Gurp parse ku lo stòp ku Beisbòl Dòbel A. Nos ta keda ta aki pa awe i te djaluna ku Poder di Dios.
