Biografia di Zulma Martis – Martinez na ken e kampionato di Little League Softball 2025 ta dediká
WILLEMSTAD- Tres siman pasá a start ku kampionato di Curacao Little League Sòftbòl, Liga Soraida Juliana 2025. E kampionato ta dediká na dos grandi di Sòftbòl Little League i Sòftbol Femenino Fastpitch, ku ta sra. Zulma Martis-Martinez i su kasa Chu Martis. Awe nos tin biografia di Zulma Martis. Den kurso di dianan nos tin e biografia/karera deportivo di Chu Martis.
Zulma Martis- Martinez
Zulma Anaclara Martis- Martinez a nasé na Kòrsou dia 1 di ougùstùs 1967 bou di e signo Leo. Zulma ta konosí pa mayoría di hende i espeshalmente nos muchanan di sòftbòl komo Tanchi” Zu”. Tanchi “Zu” ta félis kasá ku sr. Edward “Chu” Martis mas ku 40 piko aña. Tanchi “Zu” a kuminsá ku e deporte sòftbòl na un edat hopi hóben na aña 1984. Su promé ekipo tabata The Birds i ela hunga 4 aña ku e ekipo aki.
Na 1987 Tanchi “Zu”no a para ketu i a sigi un kurso di entrenadó i reglanan básiko di sòftbòl ku éksito dor di e konosido Fichi Fleming.
Tanchi “Zu” su posishon ku ela hunga den sòftbòl tabata primera base. Na aña 1988 Tanchi “Zu”a pasa pa hunga ku Hell Angels. 1989 Tanchi “Zu” ku su kasá “Chu “ a disidí ku nan ta bai lanta nan mes tim ku nan a bendishoná ku e bunita nòmber Sta. Rosa Angels ku te awe ta afiliá na C.S.B. Den e promé aña e tim di Sta. Rosa Angels ku mayoría mucha di bario di Sta. Rosa a bai hunga kampionato sin unifòrm i a titulá supkampion Hubenil.
E tempo ei bo por a hunga ku t–shirt di mes koló i skibi e number ku steft den lomba. Tabata masha dushi rekuerdo pa e organisashon di Sta. Rosa Angels. Despues di algun aña aktivo ku su tim Tanchi “ Zu” a stòp ku práktika i a dediká su tempu mas ku atministrashon di su tim i sigui kurso di skorer. Komo delegado di selekshon “Tanchi Zu” tabata super aktivo.
1997: ku U- 17 di CSB na Yaracuy, Venezuela;
1998: ku U-17 di CSB na Medellin, Colombia;
1999: ku Wega di Reino na Phillisburg, St. Maarten;
1999. ku U-17 di CSB na Caracas, Venezuela.
2000: ku U-19 di CSB Bahamas, aña ku selekshon a kue medaya di oro!!!
E aña aki Tanchi “Zu” a haña e nòmber ofisial di Tanchi “Zu” dor di su muchanan i te ku awe tur hende grandi ta yame Tanchi “Zu” ku hopi rèspèt .
2000: ku Tanchi “Zu “a sali tambe dirigente administrativo deportivo di aña.
2001 Tanchi “Zu” a forma parti di e promé direktiva di Curacao Little League Sòftbòl Soraida Juliana huntu ku Srs. Cecil Garcia, Ralph Pereira, Jeffrey Martina, Kenneth Desbarida i den felis memoria Sr. Victor Elhage.
2002: Tanchi “Zu” a sali komo un di e promé delegado di e promé selekshon di Little di CLLS pa Maunabo, Puerto Rico. Tanchi “Zu” ta sigui komo delegado na aña
2003:ku selekshon Junior di CLLS na Oranjestad, Aruba.
2004: ku selekshon di Senior League na Maunabo Puerto.Rico.
2005: ku selekshon di Senior League na Maunabo , Puerto Rico.
2007: ku selekshon di Big League na Maunabo, Puerto Rico.
2008: ku selekshon di Big League na Vialba, Puerto Rico.
2009: ku selekshon di Junior League na Yanuaco. Puerto Rico.
2010: ku selekshon di Little League. na Maunabo, Puerto Rico.
2011: ku selekshon di Little League. na Maunabo, Puerto Rico.
Tanchi “Zu” a fungí na aña 2008 i 2009 tambe komo direktora di kampionato di CLLS .
Tanchi “Zu” tabata multifunshonal, Tanchi “Zu” tabata skor mayoría wega organisá dor di CLLS, tin dia foi 10’or di mainta te ku 4’or di atardi, para tambe komo “Player Agent” (PR) na diferente tereno durante kampionato di CLLS . Ta pesei direktiva di Curacao Little League Sòftbòl a tuma e desishon unánimamente pa dediká e kampionato 2025 na un gran Señora Zulma Tanchi “Zu” Martis – Martinez.
* * * * *
MAS INFORMASHON DI SÒFTBÒL I BEISBÒL
Baranka 60+ a manda karta kaba pa drenta Liga 60 di Sòftbòl. Tin 8 ekipo i sigur 4 a bisa ku nan lo vota pa Baranka drenta, ke mèn Baranka ta mitar adén debí ku ekiponan ta 8, pero kòrda ta dia di voto ta konta. Na momentu ku Baranka drenta ekiponan lo bira 9 i mester hasi ahuste i hunga ménos wega pa aña òf kuminsá for di 10’or di mainta. Ta bon pa ekiponan trese proposishon na direktiva i pone segurensianan riba papel pa un mihó Liga 60 den 2025. Mester apuntá si ku 2024 tabata tremendo i ekiponan lo bai haña nan reseta promé ku start kampionato 2025.
* * * * *
Nos a mira picheo di sòftbòl velos djasabra dos siman pasa na Van Engelen Ballpark den Amstel Bright Premier Cup. Na 2016 a organisá un homenahe pa Marakucho Hellburg i a papia hopi di picheo Fastpitch. Algun aña despues tabatin klínika di picheo Fastpitch. Na 2016 tabatin miembronan di selekshon 1978 i 1985 ku a bira kampion di Fastpitch Maskulino di Centro Americano i Del Caribe na Colombia. Hopi ku no ta huntu ku nos mas tabata presente, entre otro Julio Marakucho Hellburg, Andre Chance, Clovis Lodewijs, Sherald Obispo. Tambe tabata presente hungadónan manera Mirto Martina, Jozef Martina, Eddie Sloop, Son Sofia, Bencho Imperator, Wendell Libiana, Gerald Obispo, Naai Hooi ets.
* * * * *
Basta moveshon di kambio den Liga 50 i e ekipo ku ta mas aktivo ta Ban Serio ku ta tras di algun grandi, entre otro Roderick Zimmerman. Un fuente di Pitufos, eks ekipo di Zimmerman, a bisa nos ku Roderick a firma kaba ku ekipo Ban Serio i e ekipo di Jerry Booi ta tras di un grandi mas ku ta estrea den Beisbòl Veterano. Naturalmente Jandoret Raiders ku a djòin Catpower den 50+ lo tin su hungadónan di Beisbòl 50 den su filanan. Vários di nan lo tei i algun lo keda den e ekipo ku nan a hunga den 2024 i último añanan na Van Engelen Ballpark. Nos a tende ku Renato Anasagasti lo sali di Ban Serio i lo pasa pa ekipo Artemisia den Liga 50. Liga 50 lo bai tin algun miembro nobo den e direktiva.
* * * * *
Ban pa Beisbòl Veterano. Pronto siman lo tin un desishon pa loke ta e protesta di Yesterday vs Santa Rosa. Yesterday a protestá, pèrdè protesta pa despues apelá. E apelashon a tarda ku a pone ku direktiva a para e play-off pa sigi den 2025 aki. Masha hopi kambio mes den Liga 40 den 2025, hopi hungadó nobo. Esnan fuerte manera Quality Stars, Santa Maria Pirates i Isla Crackers lo bira mas fuerte, miéntras esnan ku no ta fuerte lo pèrdè algun hungadó klave. Presidente Gilbert Denisia ta luchando ku e maneho di BEVEKO i vários miembro di e direktiva no ta masha aktivo.
* * * * *
Play-off di Little League entre Pariba, Pabou i Willemstad lo tuma lugá den Stadion Post 6. Ultimo añanan e play-off tabata den Frank Curiel Ballpark. Tene kuenta ku tantu kampionato di Karibe den Little League i Intermediate lo tuma lugá na Kòrsou den 2025. Lo tin e kampionatonan regional di Minor, Junior i Senior den eksterior. Kampionato di Curacao Little League Sòftbòl, Liga Soraida Juliana a sigi den wikènt na Buena Vista Ballpark. E kampionato dediká na Chu i Zulma Martis, dirigentenan inkansabel di Santa Rosa, a start tres siman pasá na Buena Vista Ballpark. Nos ta keda te aki pa awe i te mayan ku Poder di Dios.
