Bombers ta bèk i den gran forma den Liga Amstel

WILLEMSTAD- Bombers a bini bèk den Liga Amstel despues di un aña afo. Bombers a sali dal e ekipo Gamers feros ku skor di 15-4 djasabra na Van Engelen Ballpark. E wega a terminá riba homerun di Julius Veeris ku a seya e nòkout i laga Gamers den tereno. Kenny Hellement ku ta yegando 50 aña a tira 6 ponche riba e batiadónan di Gamers. Den e otro wega X-Treme a zona Terremaster 17-10. Hopi fanátiko na Van Engelen Ballpark pa mira e kombinashon di Liga 50 riba vèlt A i Liga Amstel riba tereno B.

Kenny Hellment na primera i Gibi Hendrik na bate. Kenny a debuta ku 6 ponche tirá den Liga Amstel.

Bombers 15, Gamers 4

Bombers a dal 16 hit i hasi 2 eror.  Kenny Hellement a gana tirando 6 ponche. Randy Kirindongo a bati di 2-2 ku un homerun. Julius Veeris a bati di 4-2 ku homerun. Kenny Hellement a konektá di 2-2 ku 3 empuha.
Gamers a dal 9 hit i kometé 1 eror. E Venesolano Emilio Velarde a pèrdè. Rafael Jozefa jr. a bati di 3-2

Julius Veeris ta yega home plate i Bombers ta selebrá viktoria. Nan a laga ekipo Gamers den tereno.

X-Treme 17, Terremaster 10

X-Treme a dal 20 hit i hasi 3 eror. Jose Obispa a gana i bati di 3-3. Jose Obispa a bati un homerun tambe i Raycheron Mihel a bati di 2-2. Ryam Emers, Dayron Matrona i Fitzgerald Girigorie a bati di 4-3.
Terremaster a dal 10 hit i hasi 1 eror. Sevard ‘Chollie’ Seferina a pèrdè.  Darrrel Laken a bati di 3-3 ku dos homerun i 4 kareda empuha.

Veteranonan di Gamers den dugout
Randy Kirindongo ta keda saluda pa su ruman Dave despues di a konektá un homerun.