Challenge djasabra awor na apertura di Torneo Hope 2025
WILLEMSTAD - E aña aki apertura di HOPE 2025 su enfoke ta riba entre otro teambuilding. Esaki ta e rason ku apertura HOPE 2025 ta bai ta un poko diferente. Lo bai tin dos (2) “Challenge” ku e ekiponan ku a inskribí pa e sekshon di COED mester partisipá den dje. E challenge lo ta dirèkt despues di e apertura ofishal. Tur organisashon ku a inskribí ku ekipo COED mester manda por lo ménos 3 representante na apertura i por lo ménos 1 hungadó mester ta femenino.
Por manda diferente hungadó pa partisipá den “Challenge” # 1 i den “Challenge” # 2. No mester ta mesun hungadónan. Eksigensia ta ku tur hungadó ku ta bai partisipá den e 2 “Challenge” nan mester ta riba tereno na momentu di apertura pa por partisipá. Esaki ta nifiká ku un tim por tin 5 representante. Challenge 1 ta trata di korementu di base tantu di koredó maskulino komo koredó femenino. Ekiponan a risibí e reglanan pa loke ta trata e parti aki i e otro challenge ku ta batimentu di hit. Kada ekipo ta apuntá dos (2) hungadó pa bati i un (1) hungadó pa picha: 1 di e hungadónan ku ta bati, mester ta femenino i otro dos hungadonan por ta maskulino.
Nan ta haña huntu 1 minüt pa swing i dal hit.
Ta duna puntuashon a base di e mas hit batí pa e dos hungadónan huntu. Esun tim ku bati mas hit den 1 minüt ta risibí 15 punto, e di dos 14 punto ets ets (dor ku tin 15 tim).
Na final di “Challenge” 1 i “Challenge” 2, e tim ku mas punto a gana e “challenge”. Ganadónan 1, 2 i 3 ta keda anunsiá djasabra mes mas despues i nan ta risibí nan premio e dia di entrega di premio. Ekiponan i fanátiko yega Van Engelen Ballpark djasabra pa mira e challenge aki pa promé biaha den Torneo Hope ku lo bira interesante.
Skema di kampionato Liga 50 Sòftbòl a bai pa ekiponan
WILLEMSTAD – Kampionato di Liga 50 Sòftbòl ta start dia 3 di mei na Van Engelen Ballpark ku partisipashon di 10 ekipo. Ekipo Catpower a keda reforsá ku algun hungadó di Beisbòl Veterano 50+ di Jandoret i tin indikashon ku e kampionato lo bira interesante. Jandoret Raiders reforsá ku vários hungadó di Catpower a bira kampion di Amstel Bright Premier Cup pa loke ta trata Liga 50. Djaluna durante reunion general Catpower ku su dirigentenan nobo tabata presente i a pasa detaye pa kampionato por start. Ekiponan a vota unánimamente pa hunga 13 wega den e buelta regular, ku ta 5 wega ménos ku temporada 2024 i temporadanan anterior. Ultimo wega di promé buelta lo ta dia 26 di yüli i despues lo repartí e ekiponan den Pul A i Pul B. Keda pendiente pa mas detaye di Liga 50.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bonnochi i felis wikènt. Mayan djasabra 15 di mart ta start ku Torneo HOPE 2025 na Van Engelen Ballpark. Djasabra 6’or tin apertura ofishal i e apertura lo ta speshal e aña aki ku diferente kompetensia (challenge) manera entre otro korementeu di base, kaminda lo tin koredónan maskulino i femenino. Lo tin un kompetenisa di batimentu di hit tambe. Interesante i ta bon pa fanátiko- i hungadónan di Hope tei presente pa mira e aktividat úniko aki. Skema ya a bai pa ekiponan i tur detaye ta kla pa start ku Hope 2025.
* * * * *
Sòftbòl Liga 50 a pone su fechanan pa loke ta trata entrega di lista i despues direktiva lo screen e listanan, sigí pa traspaso pa finalmente bini ku e lista definitivo i e kampionato lo start ofishalmente. Kampionato di Liga 50 lo start 3 di mei ku partisipashon di 10 ekipo. E aña aki lo hunga 13 wega enbes di 18 wega. Ekiponan lo enfrentá otro (tur kontra tur) den e promé buelta, ke mèn 9 wega. Despues lo tin un buelta repartí den pul A i Pul B di 4 wega. Segidamente lo tin play-off kaminda 1, 2 i 3 lo pasa dirèkt pa play-off semi-final. Number 4 lo hunga kontra 7 i 5 vs 6. E ganadónan lo topa otro pa saka number 4 manera tabata e kaso den 2024.
* * * * *
Miéntrastantu play-off di Beisbòl Veterano ta poné pa start dia 6 di aprel entre Yesterday number 4 i Quality number 1. E otro semi-final ta number 2 ku ta Santa Maria kontra Isla Crackers ku ta number 3. Santa Rosa Memories a manda un protesta riba e apelashon i nos no a tende mas kiko lo bai pasa. By the way, djarason último a hiba Aquilles ‘Boy Motor’ Cornelia na su último lugá di sosiegu. Ekiponan Jandoret Raiders, Baranka i Royal Scorpions tabata bon representá. Awe, djabièrnè den oranan di mèrdia lo hiba mama di Kenley, Verney i Archie Jansen na su último lugá di sosiegu. E entiero lo ta na Brievengat i bishita di kondolensia lo ta di 12.00 pa 14.40’or. Despues lo tin un Santu Sakrifisio di Misa i lo hiba e defuntu na su último lugá di sosiegu na Santana di Westpunt.
* * * * *
Den luna di aprel lo start ku play-off di e respektivo liganan di Little League. Ta for di Minor te ku Senior ku ta un total di 5 liga. Pa loke ta trata Junior League vários hungadó lo bai hunga otro liga (torneo) den eksterior i Curacao Little League Baseball lo sigi ku su play-off i e hungadónan en kuestion ta keda eksklui for di selekshon. Naturalmente tempu lo mustra ku nan a tuma un bon desishon òf laga. Tur hungadó tin e derechi di hunga e kaminda ku nan ke. Little League ku tei mas ku 50 aña i eksitoso tin su reglanan i ta ei tur hungadó a krese i kue fama. Wikènt benidero tin un delegashon di Sòftbòl Little League di Boneiru ku lo hunga algun wega di fogeo kontra ekiponan di Liga Soraida Juliana. E organisashon The Dreamers lo tei ku 3 ekipo. Divishon Pre Minor i 2 divishon di Little League. Weganan lo tuma lugá den Stadion Post 6, Buena Vista Ballpark i Sabana Ballpark. Ta enkuentronan planiá for di inisio di kampionato Liga Soraida Juliana 2025 ku ta dediká na Chu i Zulma Martis.
* * * * *
Un tiki asina di futbòl. Tantu ekipo Barcelona komo Real Madrid a pasa pe oktavo final di Champions League 2025. Naturalmente hopi diskushon riba tiramentu di pinalti ets. di parti di Atletiko Madrid ku a pèrdè kontra Real Madrid. Durante e tiramentu di pinalti despues ku e seri entre e dos ekiponan a keda empatá a anulá un pinalti di Atletiko Madrid ku tabata krusial. Fanátikonan di Barcelona ta rabiá mes mes ku e desishon di e rèfri i VAR miéntras esnan di Atletiko Madrid mes a keda trankil.
* * * * *
E aña aki algun ekipo di Liga 60 lo keda den moveshon konstant. Ekipo Los Amigos a partisipá na Torneo Amstel Bright i nan lo sigi pa Torneo Pitufos, despues Torneo Lions i finalmente Torneo Jaws. Despues ta sigi pa kampionato di liga. No ta konosí ku Liga 60 lo redusí su weganan pa terminá mas tempran manera Liga 50 unánimamente a disidí di baha e kantidat di weganan di buelta regular ku tabata na 18 pa 13. Nos ta topa na apertura i weganan di Torneo Hope ku ta djasabra. Nos ta keda te aki pa awe i te djaluna ku Poder di Dios.
