Cicoza ta gana Swift i Los Amigos ta derotá Nos Tambe Por den Amstel Bright Premier Cup
WILLEMSTAD – Cicoza den un wega kandela den e kategoría modified a gana Swift ku skor di 4-3 djadumingu atardi na Van Engelen Ballpark den e último wikènt di buelta regular di Amstel Bright Premier Cup. Bon públiko pa mira e wega aki kaminda tabatin kátedra di picheo modified/fastpitch. E dos ekiponan aki a hunga final di ABC&S 2023 i nan lo topa atrobe na 2024 ku lo tuma lugá na Sint Maarten den luna di mei.
Den otro wega ku a hala atenshon, djasabra mainta ekipo Los Amigos a gana Nos Tambe Por ku skor di 4-3. Los Amigos a lusi ku 5 hungadó nobo pa loke ta 2024 ku ta èks hungadónan di Nos Tambe Por. Nos tin resultado di vários wega ku a tuma lugá den wikènt.
RESULTADONAN
Los Amigos 4, Nos Tambe Por 3 (60+);
Marlins 6, Lions 5 (50+);
Terremoto 11, Cicoza 1 (Modified);
Cicoza 4, Terremoto 3 (Modified);
Swift 7, Estrellas Latinas 0 (Modified);
Jandoret Raiders 17, Lions 3 (50+);
MCB 9, ORCO 1 (COED);
CMC 5, Belasting 4 (COED);
Chonchies 21. New Stars 6;
Quick 60 11, Chonchies 6;
The New Radiator 18, G Warriors 8.
.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia. Bon wega i tremendo ambiente den wikènt na Van Engelen Ballpark den kontinuashon di Amstel Bright Premier Cup. Pa wikènt benidero ta start ku weganan di play-off. E torneo ta programá pa terminá djadumingu 10 di mart. Tene kuenta ku e torneo aki tin premionan kèsh pa ekiponan kampion. Mas ekiponan gasta, mas sèn nan tin chèns di gana den e kompetensia. Pa loke ta trata 60+, e ekipo Los Amigos tin un ekipo serio i djasabra último nan a logra gana di ekipo Nos Tambe Por. E ekipo Los Amigos no a logra klasifiká pa play-off pa loke ta trata kampionato 2023 i ta gran faborito pa yega final.
* * * * *
Los Amigos a presentá ku hungadónan nobo manera Renato Anasagasti, Son Sofia, Shaki Coffie, Dennis Casimiri i pichernan Gilbert Henrietta i Michelangelo ‘Galbao’ Boekhoudt. Tur ta hungadónan nobo den e ekipo i e prome 5 -nan ku nos a menshoná ta bini netamente for di e ekipo Nos Tambe Por. Den otro wega interesante, ekipo Twister a sorprendé Cicoza Legends den kategoria 40+ di Amstel Bright Premier Cup. Ekipo Twister a sali duru notando 9 kareda den e promé dos inning i bai dilanti 9-0. Den Cicoza su último chènsnan nan a logra nota 3 i 5 kareda pa yega na 8 kareda i keda kòrtiku. O. Gerard, segun nos Orlando (Sulca) a gana e wega pa Twister. Orlando tabatin 3 aña sin hunga ku bala duru den Sòftbòl.
* * * * *
E asuntu a bira hopi interesante den e pul di 40. Great pa 40+ sòftbòl ku último añanan a kai bastante na interes di fanátiko. Bombers a gana Twister i trese un tripel empate den e pul aki. Bombers ku tabata parse un super tim pa klasifiká number 1 a tuma masha hopi kareda kontra di ekipo Cicoza Legends dos siman pasá. En todo kaso Bombers a sigurá ku nan lo bai kompetí den Liga 40 su kampionato den 2024.
* * * * *
Biniendo bèk riba Amstel Bright Premier Cup, tabatin un wega kandela ku nos a sigi kompletu na Van Engelen Ballpark djadumingu. Cicoza a gana Swift ku skor di 4 pa 3 den un tremendo partido di modified. Pichernan di modified/fastpitch a duna kátedra pa e públiko presente. Pa Swift a start Emilio Velarde ku a dominá manera a bira un tradishon. Despues di Emilio Velarde Swift a manda Alexander Rodriguez. Cicoza a habri ku Stanley Girigorie i despues a bini e picher Frensel Meyers ku a relevá den gran forma i tabatin un doblete importante tambe komo batiadó. Bon wega mes i hopi di e fanátikonan veterano a puntra dikon no ta start bèk ku Fastpitch ku a konosé tempunan di gloria ku dos kampion di torneonan Panamericano na 1978 i 1985. Ya, ta trata aki di 46 i 39 aña pasá si. Hopi di esnan den e selekshonnan ei ta den nan 80, 70 i 60 aña di edat.
* * * * *
Rumornan ta sigi kayente den Beisbòl Veterano. Nada konkreto pa loke ta trata e traspaso di e dos grandinan di Quality Stars pa Santa Maria. Parse ku Yesterday ta formando un bòm i e dos grandinan ta bayendo pa rèkòrt, kaminda nan a bira kampion ku 3 ekipo diferente. Tin algun hungadó mas ku a bira kampion ku 3 diferente ekipo di Beisbòl Veterano, pero no ta masha hopi. Vários di nan a bira kampion ku 2 ekipo, pero ku 3 ekipo no tin masha. Inskripshon pa Torneo Azucar ta bayendo hopi slow i siman pasá e ekipo a bati alarma puntra kiko ta pasando debí ku ta solamente 2 di e 12 ekiponan di Beisbòl Veterano a inskribí.
%20copy.jpg)
* * * * *
Djaweps awor tin reunion di Torneo Hope 2024. E torneo ta organisá atrobe pa Van Engelen Ballpark Foundation i tin vários kambio pa loke ta trata e inskripshon. Tur ekipo por djoin ku 2 ekipo mas, ke mèn 3 ekipo total. Lo tin seshonnan habrí tambe, esta Soshal Open i COED Open ku no ta mará na empresa. Tin tambe un seshon speshal e aña aki kaminda hende òf mihó bisá hungadónan ku no ta hungando niun liga i no ta konta edat. Si bo ta hunga den liganan, inskribí den beisbòl òf sòftbòl bo no mag di hunga den e liganan menshoná. Nos ta keda te aki pa awe. Te mayan ku Poder di Dios.
