Curacao Prospect League a selebrá ku Future Stars
WILLEMSTAD – Djasabra 20 di yanüari Curacao Prospect League a selebrá ku e futuro estreanan di Beisbòl. Tabata presente prospektonan ku a kaba di firma i esnan ku ta train serka Cuacao Prospect League pendiente pa firma un kontrakt ku un organisashon di MLB. E evento lugá na Topaz Party Place den presensia di Minister di Enseñansa Siensia Kultura i Deporte, sr. van Heydoorn i minister di Finansas sr. Silvania i dirigentenan di Curacao Prospect League.
Naturalmente tabata presente dirigente máksimo di Curacao Prospect League Yurendell de Caster i su tim di entrenadó, coachnan i famia di e prospektonan. E anochi a kuminsá kaminda MC, Glenn Thomas a yama presentenan bon bini, sigí pa entrada di peloteronan. A sigi bendishon di pastor Welton Esprit.
E grupo di Baile Explotion Dancer a duna un show di baile. Yurendell De Caster a dirigí palabra na presentenan sigi pa spich di Minister di Deporte Van Heydoorn i palabra di peloteronan. Famia de Caster a sorprendé Yurendell ku un plakat i Yurina de Caster a lesa loke tin skibi riba e plakat. Na final di e parti ofishal Yurendell de Caster a entregá un business plan di Curacao Prospect League na Minister di Deporte. Despues di e parti ofishal a sigi un resepshon di 9pm pa 11’or pm.
MAS INFORMASHON DI BEISBÒL I SÒFTBÒL
Fanátikonan di Deporte Kòrsou bondia. Torneo FABB 2024 a terminá djadumingu 21 di yanüari na Van Engelen Ballpark. Montaña Ariba a bira kampion den Minor i Montanja Abou kampion den LittleEkiponan di Aruba a yega i pone stèmpel. Djabièrnè ekipo Rincones di Aruba a sorprendé e ekipo Montanja Abou ganando ku skor di 2-1. Kompetensia fuerte entre Kòrsou i Aruba den kategorianan Minor i Little.
Ban pa Slowpitch. Cicoza ta organisadó di Amstel Bright Premier Cup. Tur detaye ta kla i ekiponan lo haña skema di weganan djaluna òf djamars. Preparashon pa Torneo Amstel Bright Premier Cup 2024 ta den full swing pa ranka sali djasabra 27 yanüari 2024 na Van Engelen Ballpark. Ekiponan mester yena lista di hungadó i manda un ke otro den un formato promé ku djaluna, pa organisadónan por hinka e detayenan pa por skor e weganan via gamechanger ku ta mas fásil pa tur hende por sigi e detayenan di wega, tantu hungadó, dirigente, prensa i fanátiko.
Vários kambio mas na kaminda pa loke ta trata Liga 60 ku último añanan a bira interesante. Ta liganan 50 i 60 ta halando hopi atenshon, debí ku e ‘creme de la creme’ di tempu di Slowpitch a yega edat ei. Manera semper nos ta bai bèk den tempu pa esnan di awor por mira kon tabatin Slowpitch den añanan 80, 90 i despues di añanan 2000. Parkenan kargá ku fanátiko den weganan normal di kampionato i no papia mes di play-off. Tabatin 6 pa 7 liga, Liga Van Engelen, Liga Trai Seru, Liga Amistad, Liga Un i Tur, Liga Koktel, Liga Sabana, Kopa Basora i Liga Domi. Aworaki tin solamente 2 liga di e hóbennan i hopi torneo pa loke ta trata Komersial. Liganan di veterano a krese.
Liga 70 a train ku hungadónan di tim djadumingu na tereno di Muizenberg. E aña aki si e Liga 70 lo drei segun Rudy Brunken. Ekiponan Jaws, Curacao Super Stars i Mon Repos Sluggers tin ekipo sigur. Frank Curiel a anunsiá ku Nos Tambe Por tambe lo tin un ekipo, pero Frank tabatin kebrante di salu i awor ta bèk riba pia i na kas for di djabièrnè último. Nos Tambe Por a train djaweps i e siman aki djamars trainingnan pa tur hungado di 60+ ta start na Frank Curiel Ballpark. Manera tabata e kaso e último añanan tur hungadó 60+ ta bon biní . E 70+nan tambe por yega naturalmente. Trainingnan ta bou di direkshon di Raymond ‘Choncho’ Mari. By the way, nos a mira Tuyu Mari wikènt pasá na Kòrsou. Arthur ‘Tuyu’ Mari, un dje grandinan di tur tempu den Beisbòl i Sòftbòl Fastpitch, welkòm.
Nos ta pendiente pa sa kon a para ku e impase entre ekipo Dream Team/Thrillers i organisadónan di Kopa ABC&S. Thrillers ta hasiendo nan bèst pa yega Sint Maarten pa engrandesé e Kopa ABC&S. Gastunan ta feros i tòg Dream Team/Thrillers ke pa su hungadónan pasa den e eksperensia di Kopa ABC&S fuera di Kòrsou. Gastunan di pasashi i estadía lo bai kai serka di 2000 florin pa e biahe di 6 dia. Yega djarason Sint Maarten i bini bèk Kòrsou djaluna. Ban wak kiko ta bai pasa. Algun dirigente hopi serka a bisa pa Dream Team /Thrillers purba na aserká e organisadónan di Sint Maarten dirèkt.
Bèk den tempu. Ekipo Cicoza organisadó di Torneo Amstel Bright a bira kampion ABC 2015. Ta último biaha ku un ekipo ku no ta Swift a bira kampion di Kopa ABC&S. Despues Swift a bira kampion na 2016, 2017, 2018 i 2019. 2020, 2021 i 2022 no tabatin Kopa ABC&S. Na 2023 Swift a bolbe bira kampion. Cicoza tabata dal den Swift konstantemente den semi-final i kai vensí. Nan a gana Swift den semi-final na Aruba na 2015 i despues pasa pa final. Weganan tabata realmente pèrtá i dramátiko na Aruba e aña ei. Cicoza a gana Swift den un wega super pèrtá 4 pa 2 i despues gana Happy Brothers 10 pa 9 den un wega ku Happy Brothers por a laga Cicoza den tereno. Gewon Kopa ABC&S a bira manera Kopa Antiano di ántes. Hopi di mihónan di Beisbòl ta reforsá ekiponan den Sòftbòl. Nos ta keda te aki. Te mayan ku Poder di Dios.
%20copy.jpg)
