Curacao Super Stars ta gana Pitufos 7 pa 6 den Torneo Kid Boca Chica
WILLEMSTAD- Torneo Kid Boca Chica a start djasabra 5 di aprel na Frank Curiel Ballpark. Bon públiko pa mira e 60+nan den akshon den e Torneo Kid Boca Chica organisá pa Jaws. Djadumingu Curacao Super Stars a gana Pitufos ku skor di 7-6. Djasabra tabatin 4 wega i djadumingu tambe tabatin 4 wega. Den e promé wega djasabra ekipo Jaws a gana Curacao Super Stars ku skor di 1-0. E wega aki a bai un extra inning (8 inning) I den e tie break ei Jaws a logra anotá kareda i ekipo Curacao Super Stars no a nota kareda. Den otro wega di djasabra ekipo Los Amigos a gana Nos Tambe Por den tie break. E wega aki a bai 8 inning i Los Amigos a sali di porta grandi ganando ku skor di 5-3.
RESULTADONAN
Djasabra 5 di aprel
Jaws 1, Curacao Super Stars 0
Los Amigos 5, Nos Tambe Por 3
Pitufos 5, Nos Power 4
Lions 6, Sluggers 3
Djadumingu 6 di aprel
Jaws 5, Nos Power 0
Curacao Super Stars 7, Pitufos 6
Los Amigos 5, Sluggers 0
Lions 5, Nos Tambe Por 3.
Belastingdienst ta gana Keyfin ku skor di 7-0 den Torneo Hope
WILLEMSTAD- Belastingdienst ku bon bateo di Edinho Myer i picheo di Shurentley de Lima ta gana Keyfin/ETR Coolling ku skor di 7-0. Edinho Meyer a bati di 3-3 ku homerun 5 RBI i de Lima a picha wega kompletu i plama 8 hit pa hiba su ekipo Belastingdienst na e viktoria. Den un wega kandela CGA a gana di Aqualectra 1 ku skor di 12-10. Aquelectra tabata invikto promé ku e wega ku rèkòrt di 3 ganá i 0 pèrdí. CGA no tabatin viktoria promé ku e wega di djasabra. Nos tin resultado di algun wega di wikènt.
Brandweer CAP 16, Aqualectra 6;
SDKK Damen 16, VVROP 1;
CGF/FGC 19, SVB Aventa 9.
Teksto pa pòtrèt:
MAS INFORMASHON DI SÒFTBÒ I BEISBÒL
Fanátikonan di Deporte Kòrsou, bontardi. Weganan i moveshon a sigi den kuadro di Torneo Hope 2025 na Van Engelen Ballpark riba djasabra i djadumingu. Bon públiko apesar ku no tabatin animashon musikál bibu djasabra último. Djasabra awor ta Oriri i reinan di Seu lo tei den Torneo Hope na Van Engelen Balllpark. Torneo Kid Boca Chica a start djasabra i a sigi djadumingu na Frank Curiel Ballpark. Wikènt benidero tin e último weganan djasabra i djadumingu tin final entre e dos ekiponan ku a terminá number 1. Ekiponan ku sali number 2 den nan pul lo hunga pa di 3 lugá i lo tin wega amistoso djadumingu. Djaluna tabatin reunion general di Liga 50. Kos tabata basta kayente den e reunion. Kampionato ta programá pa start dia 3 di mei ku partisipashon di 10 ekipo.
* * * * *
Nos no tin niun informashon ainda di Liga 40 pa loke ta kampionato ku ta bai start i tambe di Liga Amstel. E liganan menshoná ta hunga na Van Engelen Ballpark. Basta torneo interesante ta bai tin den luna di mei, entre otro Torneo ABC&S di e hóbennan organisá pa Swift i Terremoto. Na Sint Maarten tin Liga 50 ku ta konta ku partisipashon di ekiponan Marlins i Ban Serio di Kòrsou. Pa loke ta trata Liga 40 riba nivel ABC, einan si nos no tin masha informashon, debí ku ekipo Baranka no ta partisipando mas na e kompetensia menshoná. Na 2024 Baranka a bula afó, debí ku ta traha un skema kaminda ta hunga double header kasi tur dia riba nivel di 40+. Baranka a preferá di keda afó i bula for di Liga 40.
* * * * *
Den wikènt nos tabata na Frank Curiel Ballpark pa mira weganan di Torneo Kid Boca Chica organisá pa Jaws. E promé dos weganan di e torneo 60+ aki a bai extra inning. Den e promé wega Jaws mester a lucha 8 inning pa gana di e ekipo Curacao Super Stars ku skor di 1-0. Ekipo Curacao Super Stars a sali bon e aña aki. E picher Jin Kuan Li, ruman di Leonel Li tabatin 7 inning picha kaminda Jaws no tabatin hit ainda. Ta te den di 8 inning, Jaws a logra konektá hit kontra di Li. Den Tie Break ekipo Jaws a logra gana. Den e di dos wega di e torneo Los Amigos a gana di Nos Tambe Por den Tie Break ku skor di 5-3. Lo Amigos tabata ganá ku skor di 3-1 te den último inning i ekipo Nos tambe Por ta empatá i tabatin base yen ku un out. Den Tie Break Los Amigos ta nota dos kareda i ekipo Nos Tambe Por ta sali out 1, 2, 3 den bòm di e di 8 inning pa terminá e partido. Den e wega number 3 ekipo PItufos a gana di Nos Power i nos ta pendiente pa e skor. Den e último wega Lions ku a presentá ku un tremendo ekipo ku picheo di Elvis Jakobus a gana di Sluggers. Nos ta pendiente pa e resultadonan di e weganan ku a tuma lugá djadumingu.
* * * * *
Djadumingu 6 di aprel den oranan tempran di mainta e ekipo Santa Maria Pirates a sali pa Meksiko pa partisipá na e Baseball Champions League America ku lo tuma lugá na Alfredo Harp Helu Stadium. Santa Maria a sali 8.30’or di mainta ku Avianca rumbo pa Bogota, pa despues sigi pa Meksiko. E delegashon a biaha nèchi bisti tur na pretu rumbo pa e promé eksperensia di un ekipo di Kòrsou den e kompetensia menshonٲ. Fuera di e hungadónan di Santa Maria tin vários refuerso manera entre otro Swindly Lint, Jordan Lucas, Temesh Lourens, Urlich Snijders, Reyhan Fecunda, Prins Scott, Juremi Profar, Andrelton Simmons, Jandido Tromp ets. Vários hungadó ta yega Meksiko for di otro pais, entre otro Aruba, Hulanda i República Dominicana. Kòrsou lo hunga djamars dia 8 di aprel kontra di Kane Country Cougars (USA). Wega number 2 di Santa Maria Pirates lo ta djamars 4’or konttra di Leñadores de las Tunas di Cuba. Tin dos pul di 3 ekipo. Ekiponan ku terminá number 1 lo bai semi-final i lo ta pendiente e ganadó entre number 2 i 3nan den e otro pul den un semi-final. Final lo ta djadumingu 13 di aprel. Santa Maria a pèrdè promé wega 16-14 kontra Cougars di USA. E den wega number 2 nos a perde ku skor di 31-7 kontra Las Tunas di Cuba. Nos ta keda te aki pa awe i te djarason ku Poder di Dios.
