Torneo Hope ku Oriri djasabra i Gran final Torneo Kid Boca Chica djadumingu awor
Torne Hope ta sigi den wikènt ku vários wega i Grupo Oriri djasabra
WILLEMSTAD – Torneo Hope 2025 ta sigi den wikènt ku 28 wega riba tereno A i B djasabra i djadumingu na Van Engelen Ballpark. Djasabra di 6 pm pa 9 pm tin Grupo Oriri ku a hasi estrago den Kantadó Mayó atrobe ku nan kantantenan Ajdatay Denisia i Jefdaney Manuela. Nos ta den rekta final di Torneo Hope 2025 ku lo terminá fin di aprel. Den kolumna nos tin mas detaye i komentario di Torneo Hope.
Gran final Torneo Kid Boca Chica djadumingu awor
WILLEMSTAD – Djadumingu awor lo tin e gran final di Torneo Kid Boca Chica den Frank Curiel Ballpark. Pa 3’or di atardi e dos mihó ekiponan di nan pul lo topa otro den e gran final. Djasabra awor tin 4 wega i ainda no tin desishon kua ekipo lo bai hunga final djadumingu atardi. Posishon i rèkòrt di e ekiponan ta lo sigiente. Pul A, Jaws 2-0, Pitufos 1-1, Curacao Super Stars 1-1, Nos Power 0-2. Pul B Los Amigos 2-0, Lions 2-0, Nos Tambe Por 0-2, Sluggers 0-2. Weganan di djasabra 12 di aprel ta, 10.00 Jaws – Pitufos, 12.00 Los Amigos - Lions, 14.00 Nos Tambe Por – Sluggers, 16.00 Nos Power – Curacao Super Stars.
Rising Phoenix ta gana Mas Goso pèrtá den The Diamond Stars League
WILLEMSTAD- Rising Phoenix invikto den e liga di Sòftbòl Femenino Veterano, The Diamond Stars League a gana Mas Goso ku skor di 5 pa 2 wikènt pasá. Rising Phoenix ta kampion di e liga menshoná di kampionato 2024. Den e otro weganan Treasure New Era a dal Mas Goso 21-5, Rising Phoenix a gana The Fighters den otro wega 4-1 i Nos Goso a gana The Fighters 9-4. Weganan di wikènt benidero ta djabièrnè 11 d aprel pa 8’or ta Treasure vs The Fighters, 9.45 pm ta Nos Goso – Rising Phoenix. Djasabra 12 di aprel 8’or Nos Goso – Treasure i 9.45 The Fighters – Kas Goso. Standing, Rising Phoenix ta sigi invikto e temporada aki ku rèkòrt di 6 ganá i 0 pèrdí. Treasure New Era ta na di dos lugá ku 4-1, Nos Goso 3-2, Mas Goso 1-5 i The Fighters ta 0-6.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bondia i felis wikènt. Djaluna benidero tin un reunion general di Liga 50 pa trata e tópiko arbitrahe pa 2025. Awe nos tin resultadonan di Diamond Stars League ku tin wega tur djabièrnè i djasabra na Sam Bunting Ballpark. Ta trata di e liga di Sòftbòl Femenino Veterano (35+) ku tin 4 aña di eksistensia. Nos Goso tabata kampion di e promé dos kampionatonan na 2022 i 2023, miéntras ekipo Rising Phoenix a bira kampion temporada 2024. Ekipo Rising Phoenix ta sigi invikto e temporada aki ku rèkòrt di 6 ganá i 0 pèrdí. Treasure New Era ta na di dos lugá ku 4-1, Nos Goso 3-2, Mas Goso 1-5 i The Fighters ta 0-6. Djabièrnè 11 di aprel Rising Phoenix a bolbe gana di Nos Goso atrobe. E wega a terminá
* * * * *
Santa Maria Pirates a pèrdè ku skor di 31-7 djarason atardi den wega kontra Leñadores de Las Tunas di Cuba. Un skor feros i nos ta mira e diferensia den picheo entre nos i e ekipo Las Tunas. E promé wega ku nos a pèrdè kontra Cougars, nos tabatin bon chèns di gana e wega, pero den e dos último inningnan nos a tuma 8 kareda pa asina keda kòrtiku. Den Cougars nos a mira pichernan ku tabata tira 95 pa 97 mia pa ora. Nos tambe tin dos pa 3 picher ku ta yega 92 i 93 mia. Djarason nos a mira e picher Djenor Mogen di Kòrsou tira algun bala di 92 i 93 mia. Ya na Kòrsou ta hunga 7 inning i ora nos bai afó ta 9 inning. Hopi komentario i reklamo riba medionan soshal aki na Kòrsou riba aktuashon di ekipo Santa Maria den e kompetensia aki ku ta Baseball Champions League America ku ta tumando lugá na Mexico City den Alfredo Harp Helú Stadium. Naturalmente nos ta keda den kompetensia sin gana niun wega ainda, ke chèns di bira kampion, pero e kaminda ta bira largu. Mester gana e wega di 2 kontra 3, pa despues bai topa e number 1 pa despues bai final. Ke mèn mester gana 3 wega sigí pa por bira kampion. By the way djabièrnè 11 di aprel nos a gana Tigres di Chinandega ku skor di 19-11 i lo topa ku Diablos Rojos di Meksiko den semifinal djasaabra 12 di aprel pa 7.30 pm.
* * * * *
Torneo Hope 2025 ta bayendo pa su di 5 siman i tin weganan riba djasabra i djadumingu na Van Engelen Ballpark riba terenonan A i B. Un total di 28 wega e wikènt aki i ya ta konosí ku ta Oriri lo basha piesa entre 6 pa 9 na Van Engelen Ballpark. Pa loke ta trata e standing, ekiponan FDDK, Brandweer/CAP i SBAB ta invikto den e kategoría Soshal. CMC/ADC i ORCO/SSC ta invikto den COED. Den e kategoría 40+, SDKK/GGZ ta e úniko ekipo invikto, i den Soshal Femenino ku tin solamente 4 ekipo, ekipo Onderwijs/HS Import ta invikto. Saludo pa nos amigunan di Cicoza ku a organisá e Amstel Bright Premier Cup 2025. Ekiponan ku a bira kampion, a gana kopa grandi di Amstel Bright, nan a gana 1000 florin, ekiponan a risibí premio individual i kada ekipo kampion lo risibí 20 kamiseta, ke mèn unifòrm pa nan ekipo.
* * * * *
Tremendo Honours Night organisá pa FDOK djadumingu último den WTC. Un Sòftbòlista mas ku ta Grada Gosepa ku tabata tremendísimo tempu di su tempu i un dje sòftbòlistanan ku a bira kampion na anja 1976 den e kampionato Centro Americano. Nos mester bai chèk ku Sòftbòlista Maskulino a drenta Salon di Fama komo hungadó di Sòftbòl. Mester tene kuenta ku Sòftbòl Maskulino a bira kampion na dos okashon. Un Panamericano i un Centro Americano, na añanan 1978 i 1985 respektivamente i tur dos tabata na Colombia. Nos tabatin hopi bon sòftbòlista maskulino i nos ta kere ku ainda nos por kompetí bon den region, mirando tur e èks profeshonalnan ku nos tin den Beisbòl Dòbel A i Sòftbòl Modified. Den Kopa ABC&S ku ta na kaminda fin di mei aki na Van Engelen Ballpark ta e mihó hungadónan di Beisbòl di islanan ABC&S nos lo mira ku ta bon hungadٕónan den Beisbòl. Ta e picheo mester bai traha duru riba dje naturalmente, pero den e ABC&S e hungadónan ta konektá e picher modified/slingshot ei normal. Wikènt awor ta e último fin di siman di Torneo Kid Boca Chica ku ta terminá djadumingu ku final pa 3’or pm. Nos ta keda te aki pa awe i te mayan ku Poder di Dios.
