Desaroyonan den futbòl lokal timnan ta vota pa baha presidente elekshon nobo na kaminda i moveshonnan di selekshon
WILLEMSTAD - Ku 19 voto PRO i 2 voto KONTRA e klupnan di FFK djabièrnè anochi den reunion a vota pa e moshon di deskonfiansa kontra di presidente di FFK Ramiro Griffith. Klupnan mes a tene un reunion general den kual e úniko punto di agenda tabata moshon di deskonfiansa den e presidente aktual. Klupnan awor lo mester manda notulo i resultado di e reunion aki pa FIFA pa por risibí ratifikashon pa e desishon aki.
KOMUNIKADO PA PRENSA
ELEKSHON DI FFK DEN YÜLI 2024
PRESIDENTE LO KEDA TE NA ELEKSHON
Durante e oranan di djabièrnè atardi, 31 di mei, ofisina di notario Fung-A-Lou & Samander a manda un mail bisa ku por firma akta di e statutonan nobo di Federashon Futbòl Kòrsou (FFK), una bes nan risibí e konfirmashon ku miembresia a bai di akuerdo ku e konsepto. Esaki ta nifiká ku elekshon por tuma lugá mas pronto ku ta posibel.
Ya kaba direktiva di FFK a informá su miembresia di e desaroyo positivo aki i na mes momento a notifiká ku ya kaba a sinta ku e konseho elektoral i ku ta den ful preparashon pa elekshon ku por tuma lugá dia 21 di yüli 2024.
Mientras tantu señor Ramiro Griffith lo sigui fungi komo presidente di FFK segun e reglanan dje statuto eksistente i tambe lo perkurá pa FFK keda kumpli ku e mandato di FIFA pa mantené e situashon manera e ta te na momento ku tin un elekshon pa elehí un direktiva nobo. P’esei mesora tambe un petishon na tur miembro di FFK pa sigui figa nan energia i esfuersonan pa un elekshon nobo i no sigui paso dje grupito chikí den FFK ku tin komo solo meta pa baha e Presidente, ku konsekuentemente por guia na ekspulshon di FFK for di FIFA.
Direktiva di FFK ta kontentu ku porfin por yega na elekshon pa un direktiva nobo di FFK.
KOMUNIKADO FFK PA WEGA DI SELEKSHON DI KÒRSOU
Kòrsou, 31 mei 2024
Na tur Redaktor Deportivo
Presente
Tópiko: partidonan pa kualifikashon pa Mundial
Apresiabel miembro di prensa,
Pa medio di e karta aki mi ta manda un invitashon na tur miembro di prensa na un rueda di prensa en konekshon ku nos próksimo partidonan pa kualifikashon pa Mundial di FIFA. Durante e rueda di prensa aki por haña tur informashon di e entrenadó di e selekshon nashonal maskulino sr. Advocaat i algun hungadó ku lo tei presente pa konta di e preparashonnan pa nos próksimo kompromisonan.
Despues di e rueda di prensa lo tin e presentashon ofisial di nos spònser nobo di unifòrm, Kelme, ku lo introdusí e unifòrm nan nobo di nos selekshon nashonal.
Fecha: djadumingu 2 yüni 2024
Orario: 4:00 PM
Lugá: Mangrove Beach Corendon Curaçao (Breeze Rooftop)
Nos ta konta ku bo presensia
RESULTADO WEGA SELEKSHON FEMENINO
Lamentablemente nos selekshon a kai vensí durante nos promé enkuentro di e Caribbean Queens Friendly Matches 2024 ku skor di 3-2.
Nos golnan a keda anotá pa Kadisha Martina i Taïsha Hansen...awor nos lo sigui prepará pa nos próksimo partido kontra Trinidad & Tobago di 30 di mei binidero!
Tambe mi ta manda un potrèt di nos selekshon maskulino ku a pisa suela di Kòrsou pa nan entrenamentunan inisiá pa dia 5 di yuni próksimo.
KOMUNIKADO PA PRENSA
PREPARASHONNAN TA KONTINUÁ PA NOS SELEKSHON NASHONAL ENFRENTÁ BARBADOS DIA 5 DI YÜNI 2024 AKI NA KÒRSOU!
GRAN PARTI DI NOS SELEKSHON TEI I A KUMINSÁ KU TRAININGNAN!
Nos selekshon tei i ta kla pa enfrentá Barbados durante nos promé kompromiso di e partidonan di kualifikashon pa Mundial di FIFA. E partido aki lo tuma lugá riba dia 5 di yüni 2024 pa mitar di 8 di anochi den Stadion Ergilio Hato. Despues di e partido aki nos selekshon lo sali rumbo pa Aruba kaminda nos lo enfrentá Aruba dia 8 di yüni den Centro Deportivo Guillermo Prospero Trinidad pa 8’or di anochi.
Ayera ‘nochi e gran mayoria di nos staf i hungadónan residensiá den eksterior a yega Kòrsou pa kontinuá ku e preparashonnan di e 2 partidonan importante aki. Den transkurso di e dianan aki e sobrá lo pisa suela di Kòrsou pa djòin nos selekshon i sigui prepará pa saka nos kara.
Awe nos selekshon ta tin su promé seshon di training parti mainta kantu di laman i mas atardi riba tereno pa kai den ‘drive’ despues di buelo largu tras di lomba. Tur e trainingnan di e dianan aki te ku 2 di yüni lo ta habrí i aksesibel pa tur ku ke bin wak nos selekshon prepará pa nos próksimo kompromisonan.
Aki ta sigui e skema di training di nos selekshon;
Fecha Orario Stadion
1 30-5-2024 6-7:30 PM Jong Holland
2 1-6-2024 6-7:30 PM Ergilio Hato
3 2-6-2024 6-7:30 PM Ergilio Hato
Karchinan pa nos partido kontra Barbados ta disponibel na e puntonan di benta di kustumber i ta bayendo duru. Entrada general ta kosta fl.25 pa adulto miéntras mucha di 6 pa 12 aña i 60+ ta paga fl.15,-. VIP ta kosta fl.125,- ku bibida i ‘snacks’ inkluí.
Un tabla lo bula dia 5 di yüni durante nos promé enkuentro di e partidonan di kualifikashon pa Mundial di FIFA.
Buska bo karchi trempan, pa bo ta sendé den stadion!
KOMENTARIO DI ANALISTA DI FUTBÒL PEPI SULVARAN
TAHITH CHONG I REICHEDLY BAZOER MESTER TA E ‘TARGETNAN’
Oportunidat di oro
Si nos ke yega mundial, falta hungado di kalidat. E kos di mas prinsipal den futbòl meskos ku hopi deporte ta kalidat di e atleta. CONCACAF no ta e konfederashon mas fuerte den FIFA i e tresnan mas fuerte di e konfederashon ya ta klasifika komo anfitrion, Canada, Merka i Mexico. Ku nan aden tin seis òf shete puesto den mundial 2026 reserva pa CONCACAF. Esaki ta un oportunidat uniko pa Kòrsou yega mundial. Normal ta 3 òf 4 puesto ku repechage ta reserva pa nos region i kasi semper ultimo dekadanan, Merka i Mexico ta bai ku dos puesto, laga tur sobra lucha pa un puesto fijo i esun via playoff so.
Mester hala Chong ku Bazoer aden
Dikon? Paso nan por ta e yabi pa nos yega mundial. Ta dos di e mihonan pa bin na remarke pa hunga pa nos i si nan bin, otronan ku ahinda ta duda lo bisa ku e kos ta bira serio, paso Chong ku Bazoer tambe ta kere den nos selekshon.
Tahith Chong
Ku Tahith su kurason ta bati pa Korsou no ta straño. Na chiki ela lanta aki i Jo su tata tabata futbòlista di entre otro Victory Boys i Abrahamsz. Jo a hunga algun aña ku nos den Abrahamsz i nos ta korda Tahith chiki ta kore ku otro mucha riba vèlt di Willemstad, kual klup su mama tabata yuda den kantina. Bo por a mira kaba ku e tabata eksela. Jo ku su señora a skohe pa duna Tahith su futbol prioridat den bida i a bai Hulanda, ela resulta den Feyenoord, despues Manchester United i sobra ta historia. Apesar ku leshon a stagna su karera, ela sa di kada be bin bèk i awe por bisa ku ela kaba di tin un bon kampaña den Liga Premier, esun mas fuerte na mundu. Apesar ku su klup Luton Town no a logra di keda ariba. Nos mester ta orguyoso di dje.
Riechedly Bazoer
Bazoer na mei 2021 a wordu skohe e miho hungado den Eredivisie riba Tadic, e gran futbolista Serbio. Ya bo sa ki tipo di hungado nos ta papia di dje. Apesar ku e no a kumpli ku tur ekspektativa haltu ku a pone riba dje for di su hubentud, e ta un señor futbolista. Di origen un medio kampo di kontenshon ku bon teknika, pero lastu añanan komo defensa sentral ku por traha e wega for di den defensa paso e tin bon pase den su pia i bon bista di wega. Ku su 27 aña, Bazoer ta bin ku maleta di eksperensia. Den Eredivisie, Ajax, Utrecht, Vitesse i AZ, pero tambe den Bundesliga ku Wolfsburgo i korto tempu ku Porto na Portugal.
Advocaat a gaña?
Advocaat den un programa di futbol na Ulanda a bisa ku Tahith no a reakshona riba su aserkamentu pa forma parti di nos selekshon. Esei a trese basta komentario riba nos hungadonan ku no a bin aden ahinda den e programa ku ta bon mira na Ulanda. Si ta bèrdat i nos no tin motibu pa duda den Tahith, ku bèrdat ela interkambia ku Advocaat, e komportashon aki ta totalmente inakseptabel i por a kosta nos hasta Tahith i otro potensial kandidato. Na mi opinión, ku esaki Advocaat kier a maskara su inkapasidat pa logra mas hungado di peso pa nos. Danki Dios Tahith ku a mustra balansa i madura, no solamente a deskwalifika e aktuashon robes aki, pero no a laga esei influensia su amor pa su isla i a pone bon kla ku ela bisa Advocaat ku despues di e dos weganan aki nan lo sigui papia. No ta prome be ku entrenadornan desemplea of di edat avansa ku nos ta keda kontrata, konstantemente ta ‘cater’ na prensa deportivo ulandes, pa papia malu di nos of nos (potensial) hungadonan, pa nan sali bon. Nan ta hasi esei, dor ku nan no por haña trabou mas na Ulanda i ora kos no bai bon aki, ta buska ekskusa a kosto di otro pa skapa nan kara aya. Esaki ta falta di FFK komo doño di trabou tambe. Semper ta meskos. Den prensa Ulandes nos mester lesa notisia di nos selekshon. Komo doño di trabou mester splikanan ku esaki ta selekshon di Kòrsou i ku e obligashon na prome luga ta ku e fanatikada lokal i no ku hasimentu di propaganda propio na otro banda di oseano. Si lokual Tahith a bisa ta korekto, mester hala Advocaat su orea riba su komportashon sin respèt i mentiroso pa e no repiti mas. Bo no por tin un entrenador ku ta gaña riba hungado. Kiko esaki?
Mester buska e formula pa trese Tahith i Riechendly
Tur dos a refuta ponensia ku nan no ta interesa i a bisa ku nan no a sera porta pa Kòrsou. Si nan tabatin komo meta selekshon Ulandes, no ta algu robes. Nan ta talento grandi i mag mik riba lo maksimo komo tòpspòrter i realidat ta, ku e selekshon Ulandes tin mas hirarkia i pa nan balor riba merkado importante. Ademas no ta atraktivo i riesgoso pa Tahith ku ta bini di un periodo largu di leshon bai kore riesgo kontra islanan chiki ku ta hunga riba forsa fisiko. Aworaki dirèkt nos no mester di nan, pero despues di juni otro aña ora nos sobrebibi e prome buelta i bai lot den tombola ku entre otro Jamaica, Costa Rica, Honduras, Panama i Surnam pa un kupo na mundial, mester di nan. Pesei mester buska e formula pa kuminsa gara nan. Paso si nan drenta tranke, sigur mas lo bin, ku of sin Advocaat. Mi tin konfiansa den esei.
%20copy.jpg)
