Alegria entre amantenan di Tiru:
Despues di 14 aña kompetensia di Tiru Atrobe..
Amantenan dje deporte di Tiru sin duda ta kontentu, ya ku despues di 14 aña tabatin un kompetensia di Tiru atrobe na Kòrsou. Klup di Tiru Asiento na nan kancha di Tiru na Rust & Burgh a organisá e kompetensia, i ta e intenshon pa sigui monta kompetensia dje deporte bunita aki.
...”Air Pistol”...
“Air Pistol” ta un kompetensia manera e nòmber ta bisa di “pistol di aire” kaminda e partisipante ta tira 60 bala riba distansia di 10 meter. E tiradó ta haña e tempu límite di 90 minüt pa e tira su kantidat di bala.
...M.Q.S...
“Mininum Qualification Scores” ta un eksigensia di I.S.S.F. pa un tiradó di pistol di aire tira pa por bini na remarke pa partisipá na Olimpiada. I.S.S.F. ta: “International Sport Shooting Federation”.
...Elhage i Gonesh a logra eksigensia...
Sr. Philip Elhage Jr. i Sra. Ingrid Gonesh tur dos a logra di tira e eksigensia ku e federashon Internashonal ta pone. Elhage a tira .574 di un máksimo di .600 punto, siendo ku e eksigensia pa hende hòmber den e kompetensia ta di .563. Sra. Ingrid Gonesh a tira .559, miéntras ku e eksigensia Internashonal ta .550.
...Rekòrt nobo pa Kòrsou...
Tantu Philip Elhage Jr. komo Ingrid Gonesh ku nan aktuashon di djasabra último riba kancha di Tiru di Rust & Burgh a implantá un rekòrt nobo riba e modalidat di “Air Pistol” pa Kòrsou, respektivamente pa hòmber i muhé. Tin di bisa ku tantu Sr. Elhage, komo Sra. Gonesh ta tira den representashon di Aruba Internashonalmente.
...Resultado Ofisial...
E resultadonan ofisial ta: Hende Hòmber: 1) Philip Ehage Jr. .574 punto; 2) Sedney Martis; 3) John Zhu. Hende Muhé: 1) Ingrid Gonesh, .559; 2) S. Guru; 3) S. Kwas.
...Tiru bek pa keda...
Ta e intenshon pa kompetensia di Tiru kontinuá riba nos isla. Amigunan di Klup di Tiru di Asiento a komprometé nan mes di kontinuá ku organisashon di kompetensia i asina e bida regresá riba nos isla den e deporte. Tiru ta bek pa keda !
