Detayenan di partisipashon di pais Kòrsou na Weganan Sur Amerikano 2022
WILEMSTAD- Federashon Deporte i Olímpiko Kòrsou a bira miembro asosiá di ODESUR. ODESUR ta para pa “Organización Deportiva Suramericana”.
E aña aki pa promé biaha pais Kòrsou bou di maneho di FDOK a partisipá na Weganan Suramerikano hubenil i tambe Senior. Un total di 15 pais a partisipá na e eventonan aki. E Weganan Suramerikano hubenil a tuma lugá na Rosario, Argentina di 28 aprel 2022 pa 8 di mei 2022. E Weganan Suramerikano Senior a tuma lugá 1 pa 15 di òktober 2022 na Asunción, Paraguay.
Pa loke ta trata ODESUR Senior, Kòrsou a biaha ku un delegashon di 48 persona, ku a konsistí di 28 atleta, coach, hefe di delegashon, tim médiko i tim di media. Kòrsou a partisipá den 11 diferente disiplina, kual ta natashon, atletismo,arkeria, ahedres, bòkseo, BMX, siklismo ruta, weightlifting, karate, tènis di mesa i taekwondo. Pa loke ta trata e deporte di Atletismo, Glenka Antonia a logra e medaya di plata pa Kòrsou, den bulamentu haltu.
E organisashon di ODESUR tabatin un nivel haltu, kaminda komunikashon tabata kana sublime. Tur kontratempu ku Kòrsou por a enfrentá, e organisashon di ODESUR a sa di solushoná. Tur mainta tabatin un reunion ku e hefe di delegashonnan pa asina pone tur pais na altura di e kambionan nesesario.
E delegashon di Kòrsou a wòrdu parti den diferente grupo. E promé parti di e grupo kual tabata e delegashon di mas grandi, a sali Kòrsou dia 29 sèptèmber 2022. Den transkurso di e siman e otro delegashonnan a yega Asunción i algun ku a kaba di kompetí a regresá Kòrsou. E kompetensianan a tuma lugá na Comite Olimpico Paraguayo i Secretaria Nacional de Deportes i na e estado Encarnación.
Tur atleta a sa di komportá nan mes bon, segun e akuerdo di komportashon ku nan a firma.
Próksimo aktividat lo ta Weganan di playa Sentro Amerikano i Karibe na Santa Martha, Colombia ku lo tuma lugá 17 pa 26 di novèmber 2022. Kòrsou lo biaha ku un delegashon di 11 persona ku lo konsistí di atleta, coach, hefe di delegashon i un tim médiko. Kòrsou lo kompetí den 3 diferente disiplina, kual ta tènis di Playa, vòli di Playa i natashon. Tambe FDOK a kuminsá ku preparashon nan atministrativo pa loke ta trata Weganan Sentro Amerikano i Karibe ku lo tuma lugá 23 di yüni 2023 pa 8 di yüli 2023 na San Salvador. Direktiva di FDOK ke yama un danki na pueblo di Kòrsou, Prensa, Gobièrnu di Kòrsou, i Federashonnan. Un danki ta bai tambe na e atletanan i coachnan ku a partisipá na Weganan Suramerikano 2022.
