Dick Advocaat ku promé viktoria ku selekshon di Kòrsou di Futbòl
TURKIA- Dick Advocaat a kuminsá bon den su trabou ku selekshon di Kòrsou. Djaweps, 21 di mart 2024, nos selekshon a gana Hull City ku skor di 1-0. E úniko gol a keda anotá pa Reangelo Janga eks sentro delantero di FC Doordrecht. E wega a tuma lugá na Antalya (Turkia) kontra Hull City ku ta hunga den di dos divishon di Futbol Ingles.
Hull City i Corendon Airline Parke ta di spònser pa Corendon meskos ku e selekshon di Kòrsou. Advocaat a usa hungadónan di Ere Divisie manera entre otro Ar'Jany Martha (Ajax), Sherel Floranus (Almere City) i Eloy Room (Vitesse).
Kòrsou ta den un ‘traningscamp’ i lo hunga djadumingu awor kontra di ekipo di Turkia Alanyaspor.
Kòrsou lo hunga den e promé grupo pa loke ta trata klasifikashon pa Mundial kontra di Barbados, Aruba, Sint Lucia i Haiti. E promé wega lo ta dia 5 di yüni kontra di Barbados. E dos mihónan di e pul aki (Pul C) ta bai e sigiente rònt rumbo pa klasifikashon pa Mundial 2026.
RICHEDLY BAZOER
RIECHEDLY BAZOER POR TA E YABI DI E PORTA PA MAS HUNGADO DI NIVEL
Piska grandi
Den un entrevista na Ulanda, e defensa sentral di AZ den Eredivisie Ulandes, a laga sa ku e no a sera e porta pa Kòrsou ahinda i mester di poko mas tempu pa pensa. Bazoer ku di origen ta un bolante kontroladó ku bon pase den pia, su karera no a bai manera ela spera. Ku 17 aña den Ajax ela wòrdu konsidera talento grandi ku no por hera. Ekipo grandi manera Arsenal, Chelsea i Manchester City a mustra interes, pero su karera no a kumpli ku ekspektativanan. Su pase pa Vfl Wolfsburgo di Alemania i Porto di Portugal no a resultá un éksito. Den su hubentut ela wòrdu kritiká pa falta di disiplina riba tereno i a haña e stèmpel di ta difisil pa kontrola, lokual no tabata kompletamente hustu. Hungadó hóben sa tin momentu di rebeldia.
E mihó ku nos por haña
Desapuntá ela regresá Ulanda i a hunga bon bala den tantu Vitesse, FC Utrecht i awor AZ. Den temporada 2020-2021 e revista Ulandes Voetbal International a hasta skoge komo e mihó futbolista na Ulanda. Apesar di esei e yamada pa regresá ‘Oranje’ despues di e último aparishon na 2016 ku e tabata spera, te awe no a yega. Mientras tantu Bazoer ta ku dos pia riba tera i ta atmití ku e sa ku su 27 aña, su chèns ku selekshon Ulandes ta nulo. Bazoer sin duda ta e mihó òf un di e mihó futbòlistanan ku ta bin na remarke pa ‘Pantera Negra’. Aparte di su maleta na eksperensia riba nivel máksimo i su madures, e ta un lider tambe. Aktualmente su posishon ta defensa sentral, pero ku mes fasilidat e por hunga sentral den bolante. Esaki paso su bista riba e wega ta algu natural i e tin e pase den pia pa parti e wega na tur dos puesto. E ta un hungadó ku ta bai dilanti den lucha ku un mentalidat ganado, ku na hoben a hinké den problema ora e no por a kontené emoshon. Awor e ta madura i ta un yabi pa nos logra haña mas hungadó.
E yabi pa otronan bin aden
E lo ta bon propaganda pa nos, pasobra si Riechedly bin aden, lo bira mas fásil pa konbensé otronan manera entre otro Joshua Brenet (FC Twente), Tahith Chong (Luton Town), Sontje Hansen (NEC), Armando Obispo i Shurandy Sambo, ambos PSV i Tommy St. Jago (Willem II). Laga nos spera ku Bazoer ta mira e lus, paso e sa ku ta tempu pa termina e soño di hunga pa Ulanda, sigur na e puesto ku e ta hungando último añanan, esta defensa sentral. Entre otro, van Dijk, Aké, De Vrij, De Ligt, Botman, van de Ven, tur ta su dilanti i riba nivel mas haltu. Den regio di CONCACAF e lo ta den e mihonan na e puesto ey. Bazoer su bentaha ta ku komo eks bolante sentral, e por traha e wega tantu for di atras komo mei mei di tereno. E tin e don ku bo no por siña, di mira e wega. E tin bon tiru tambe. Ku otro palabra e ta kompletu. Su último entrevista ta duna speransa, kaminda ela bisa bon kla, ku e no ta deskartá Kòrsou i ku porfin ela saka e selekshon Ulandes for di su kabes. Yuni benidero kisas e no a disidí ahinda, lokual no ta problema, paso ku Barbados i Aruba, si ta bon ta, ‘esta barato, dame dos’. Otro aña yuni si kos lo ta serio ora nos enfrenta Haïti, pa e wega ku probablemente lo disidí ken ta bai ku e promé puesto den grupo C. Di kada grupo di 5, e 2 promenan ta sigui pa e sigiente buelta ku ta kuminsá sèptèmber 2025 ora kaba sefta mucha for di hende grandi.
Respèt pa nos pueblo
Apesar ku tur kos ta bai malu den FFK i nos tin un kuerpo tókniko ku hopi ansiano, nos mester por yega sèptember 2025, pa sigui lucha pa un kupo pa mundial 2026 ku ta disponibel pa CONCACAF, sea direkto of via repechage. Laga nos spera ku pa e tempu ey si nos tin un relashonista públiko ku ta papia Papiamentu, Spaño i Ingles. Pa por informá nos den nos mes lenga i ademas ta dominá e lenganan mas importante di CONCACAF i no manera aworaki un penshonado Ulandes, amigu di Advocaat, ku no ta dominá niun di tres. Ademas ta bon kla, ku Advocaat a bin ku amigunan di edat den e kuerpo túkniko pa nan por ‘cater’ e merkado Ulandes, kaminda aworaki kaba, nos ta dependé di aya pa sa kiko ta pasa ku nos ‘Pantera Negra’. Esaki ta konta pa e dòkter penshonadó amigu di Advocaat tambe. Na Kòrsou aparentemente no tin nada simpel manera un dokter no ansiano tampoko. Ki dia nos ta siña respeta nos mes?
%20copy.jpg)
