Djabierne 31 di mei 2024 pa 8.30 Nos Goso Gai Lihe vs Treasure
Nos Goso Gai Lihe a gana promé wega den play-off semi-final
WILLEMSTAD - Nos Goso a gana di Treasure ku skor di 11-5 i pika dilanti den play-off semi-final di The Diamond All Stars League. Djabièrnè 24 di mei Nos Goso a klasifiká ganando di The Fighters sigiendo e wega ku a keda protestá. Semi-final a start djasabra 25 di mei i Nos Goso kampion dos biaha di Diamond All Stars League a gana den un wega ku a bai 6 inning. Carlientje Cleopa tabata e picher ganadó i Fayna de Mei a bati di 4-2. Wega number 2 ta e semi-final mihó di 3 ta sigi djabièrnè 31 di mei pa 8.30 pm.
NUMERITONAN SEMIFINAL
Nos Goso 11, Treasure 5
Nos Goso a dal 9 hit i hasi 5 eror. Carlientje Cleopa tabata e picher ganadó. Fayna de Mei a bati di 4-2, Vanessa Winklaar di 2-1. Rigxaira Bernabela-Poulina di 2-1. Treasure a bati 7 hit i kometé 9 eror. Minerva Maduro tabata e picher pèrdèdo. Chaunice Maduro a bati di 2-2. Dayanara Pieternella di 3-2.
Van Engelen Ballpark a inougurá Plenchi Pipi Jessurun
WILLEMSTAD- Djaweps, 23 di mei tabatin inougurashon di Plenchi Pipi Jesurun na Van Engelen Ballpark. Ta trata aki di e plenchi ku klenku (baksteen) tras di primera base den teritorio den rightfield. Tabata presente presidente di Van Engelen Ballpark Foundation amigu i famianan di Ivar ‘Pipi’ Jesurun. Richard ‘Chati’ Constancia tabata MC i presidente di van Engelen Ballpark sr. Sergio Leon a hiba palabra. Despues di e parti ofishal tabatin un brindis pa presentenan.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bontardi i felis wikènt. Nos a kaba un fin di siman kaminda tabatin hopi di e deportenan ku nos ta kubri, entre otro Liga 50, Liga 60 a start i Beisbòl Veterano. Nada ainda di Liga van Engelen i Liga Amstel. Parse ku 40 si lo start pronto ku partisipashon di 6 ekipo, Baranka, Twisters, Cicoza, Swift, Jaws i Gamers. Den Liga 50 ekipo Marlins a zona un kampanaso riba e kampion Ban Serio ganando ku skor di 7-6. Ta despues di hopi tempu ku ekipo Marlins a logra gana un wega di Ban Serio. Segun nos ta for di play-off semi-final di 2019 ku Marlins a empatá seri i despues Ban Serio a gana e wega finalísimo i bai final. Esei tabata den òktober 2019. Pa kolmo den e wega finalísimo di e seri vários hungadó di Marlins a bai Aruba i esnan di Ban Serio a keda Kòrsou, debí ku nan buelo di mas lat a keda kanselá. Ban Serio kompletu na e momentu ei a gana i bai final.
* * * * *
En todo kaso e wega Ban Serio vs Marlins tabata hopi pèrtá i Marlins tabata dilanti ku skor di 5-2 bayendo último inning i Ban Serio den nan último chèns. Ban Serio komo ekipo di bishita a nota 4 kareda i bai ariba 6-5. Marlins a kontestá i empatá e wega na 6, pa finalmente riba hit di Mairon Martinus laga Ban Serio den tereno. Pa loke ta trata e otro weganan, den oranan di mainta djasabra ekipo Pitufos ku ta sigi gana, a dal Jaws ku skor di 11 pa 5. Flamboyan Gamers a dal Lions 14-9. Artemisia a gana Catpower 7-6. Ku picheo di Fardy Lard nan a laga Catpower den tereno. Base por bola ku base yen a terminá e wega.
* * * * *
Djadumingu tabatin apertura di Liga 60. Kampionato 2024 ta dediká baluartenan Nelson Candelaria, Irwin Leito i Lionel Fransinet. Nos ta pendiente pa e resultadonan di e weganan di djadumingu 26 di mei. Pa loke ta Beisbòl Veterano, ekipo Azucar a kai vensí ku skor di 4-3 kontra Broncos. Tabata e promé wega di Broncos ku a presentá den gran forma ku un line up kombiná ku èks hungadónan di Vosama i The Brothers. Azucar tabata ganá 3-1 te den di 6 inning, pero Broncos ta bòltu skor den di 6 inning bai ariba 4-3 i wanta den di 7 inning pa bai ku e viktoria. Isla Crackers a gana Otrabanda pèrtá 3-0. Jurseigh Leito, Quincy Kook i Dayron Puriel a kombiná pa Isla bai ku e viktoria. Djasabra ta hunga 2 wega debí ku ta 11 ekipo tin, ke mèn no por hunga 3 wega djasabra i 3 wega djadumingu manera tabata e kaso último 10 añanan den Beisbòl Veterano. Na momentu ku start ku Liga 50 lo tin 4 wega djadumingu i 3 wega djasabra.
* * * * *
Ban pa The Diamond Stars League. Djabièrnè Nos Goso a laga The Fighters den tereno ku skor di 13-12 i Rising Phoenix a gana Treasure 7 pa 2 den play-off Diamond Stars League ku a tuma lugá djabièrnè 24 di mei na Sam Bunting Ballpark. Manera ta konosí tabatin un kantidat di protesta tokante time limit i despues protesta den protesta i finalmente e ganadónan a keda manera nan tabata, esta Rising Phoenix ta terminá i gana e wega i pasa pa final i Nos Goso tambe ta terminá e wega i gana i pasa pa semi-final. Nos Goso tabatin e wega ganá ku skor di 9 pa 8 den di 5 inning. Rising Phoenix tabata ganá ku skor di 6-2 den e weganan di djabièrnè 17 di mei. Semi-final entre Nos Goso i Treasure a start djasabra 25 di mei i Nos Goso a gana ku skor di 11-5. Djabièrnè 31 di mei pa 8.30 lo tin wega number 2 di e seri mihó di 3 di semi-final. E faborito pa bira kampion den 2024 Rising Phoenix ta den final wardando e ganadó entre Nos Goso i Treasure.
%20copy.jpg)
* * * * *
Beisbòl Rookie League mester a start djasabra último i nos ta pendiente pa mas detaye. Djaweps 23 di mei tabata apertura di plenchi Pipi Jessurun na Van Engelen Ballpark. Beisbòl Little League a slow un ratu i selekshonnan ta den training pendiente e kompetensianan den eksterior. RBC Royal Bank lo entregá e unifòrmnan den e promé siman di yüni. Nos ta keda te aki pa awe i te mayan ku Poder di Dios.
