Dr. Jerry Booi a stòp ku Sòftbòl Slowpitch i ekipo Ban Serio
WILLEMSTAD- Dr. Jerry Booi, hòmber grandi di ekipo Ban Serio i hopi aña den Sòftbòl Slowpitch, ta bai wanta un ratu ku Sòftbòl. Jerry a bisa nos ku e ta bai stòp definitivamente i bai pa deportenan individual manera entre otro tènis. Un sla sigur pa ekipo Ban Serio ku ta pèrdè un gran spònser. Naturalmente e ekipo tin fundraising i kontribushon, pero tur hende sa ku Jerry ta sòru pa mayoría gastu di ekipo, tantu lus pa training komo kos di bebe despues di wega i training. Tabatin basta hungadó ku tabata na kaminda pa Ban Serio pa bai hunga serka Jerry. Keda pendiente pa mas informashon.
Jerry Booi ta kla ku Sòftbòl Slowpitch i ekipo Ban Serio.
Michelangelo ‘Galbao’ Boekhoudt di Ban Serio pa Marlins
WILLEMSTAD- Un dje bon pichernan di Sòftbòl Slowpitch Liga 50, Michelganlo ‘Galbao’ Boekhoudt lo sali for di Ban Serio i pasa pa Marlins den kampionato 2022. Galbao Boekhoudt na 2020 a pasa pe ekipo Ban Serio despues di algún aña den Marlins. Den pasado Galbao a hunga pa ekipo Catpower tambe den Liga 50. Na 2021 Michelangelo Boekhoudt a tira 45.1 inning ku 7 ganá i 1 pèrdí. E úniko wega ku Galbao a pèrdè durante 2021 di Liga 50 tabata un wega di kampionato regular kontra di ekipo Baranka, e kampionnan di Liga 50 aña pasá. Djasabra 5 di febrüari, Galbao a partisipá su kambio serka miembronan di direktiva di Marlins ku ta presidente Patrick Elisa i miembro di Komishon di Hungadó Rignald Martina.
Michelangelo ‘Galbao’ Boekhoudt di Ban Serio pa Marlins den Liga 50. Pòtrèt saká djasabra último na Porta Blanku.
Galbao Boekhoudt a firma ku Marlins
Michelangelo ‘Galbao’ Boekhoudt a firma ku Marlins di Sòftbòl 50+ djaweps 10 di februari 2022, despues di training. Boekhoudt a hunga aña 2020 i 2021 ku ekipo Ban Serio. E firmamentu a tuma lugá na un establesimentu riba Gosieweg. Marlon Noor otro picher di kaliber ku tambe ta èks Marlins, lo bini bèk i pronto lo firma. Presidente Patrick Elisa i miembro di komishon di hungadó Rignald Martina tabata presente na momentu di firma.
.
INFORMASHON DI BEISbÒL I SÒFTBÒL
Lesadónan di Deporte Kòrsou, bontardi i felis siman. Fin di siman pasá nos a risibí basta informashon di kambionan tantu riba nivel di Beisbòl komo riba nivel di Sòftbòl Slowpitch. Nos a papia ku Kenley Jansen tambe djasabra último na apertura ofishal di kampionato di Little League. Manera ta konosí, kampionato di Little Legaue di 2022 a start aña pasá i djasabra último tabatin e apertura ofishal. E apertura tabata apart debí na medidanan den kuadro di Covid-19. Kenley Jansen ta pone hopi bala i mas material disponibel i e kampionato Junior i Senior ta kampionato Kenley Jansen. RBC Royal Bank ta spònser mayó di Little League i esei ta tumando lugá for di temporada 2001.
* * * * *
Kenley Jansen a bisa nos ku Ruderly Manuel ta kasi klá pa hunga normal den Wild Cats den 2022. Kenley Jansen a bisa nos tambe ku Wild Cats lo pèrdè un gran picher na momentu ku e hóben Joharvi Martinus firma profeshonal. Joharvi tabata klave pa Wild Cats den 2022 ku su picheonan ku tabata yega 93 mia pa ora den nos Beisbòl Dòbel A. Kenley Jansen a informá nos ku su ruman, Verney Jansen lo bai hunga Beisbòl Veterano den ekipo The Brothers den 2022. Tambe e posibilidat tei ku Verney lo bai hunga ku Santa Rosa Memories den 2022.
* * * * *
Mas notisia di Beisbòl Veterano. Jair Josepha lo bai hunga ku Refineria Isla (Isla Crackers) den 2022. Ya Jair Josepha ta den group kaba pendiente e traspaso ofishal ku mester bai tuma lugá. Isla Crackers den 2022 si ta firme pa bai ku e título. Nan a haña un picher mas i profundidat den outfield, primera i shòrtstòp. Ekipo Otrabanda tin nan outfielder Alcides Juliana bèk. 2020 Alcides a hunga pa Otrabanda i 2021 pa Santa Rosa Memories. Roderick Martina ku a bai den ekipo Marlins lo tei bèk den Otrabanda. E ekipo Otrabanda ku práktikamente tur aña ta biaha, lo ta di biahe e aña aki atrobe.
* * * * *
Otrabanda ta bai tur aña afó, ánke ta pa hunga Beisbòl riba play-station. E aña aki ta pa Havana Cuba atrobe despues ku den pasado ya nan a bishitá Cuba. Na Cuba si lo tin Beisbòl riba tereno i no riba play-station. E biahe lo tuma lugá den luna di novèmber. Aña pasá ekipo Otrabanda tabata na República Dominicana i na 2020 no tabatin biahe. 2019 e ekipo a bai Medellin (Colombia). Den dianan benidero nos lo tin mas informashon general di Beisbòl Veterano.
* * * * *
Den Slowpitch 50+ nos tin informashon kayente. Jerry Booi lo stòp definitivamente ku ekipo Ban Serio. Michelangelo ‘Galbao’ Boekhoudt lo pasa bèk pa Marlins. Galbao lo bai forma un 1-2 ku Gilbert Henrietta. Galbao tabata den kompanía di dos grandi di Marlins ku ta e presidente Patrick ‘Chape’ Elisa i Rignald Martina di komishon di hungadó. Jerry Booi a wanta un ratu i mester wak kon ta bai sigi ku e ekipo Ban Serio. Jerry Booi ta motor di Ban Serio i ta hinka hopi tempu mes den e ekipo. Otro rumor ta ku nos amigu Beer Adelina ta rumbo pa Ban Serio bèk. Den pasado Beer tabata ku Ban Serio komo manager i a logra algún título di kampion 50+ ku e ekipo.
* * * * *
Ban bèk pa Beisbòl Dòbel A. Temesh Lourens di Royal Scorpions tambe ta riba kaminda pa Wild Cats. Temesh a picha bon pa Royal Scorpions den 2021 i tabata lider di Beisbòl Dòbel A den ponche tirá. Durante temporada regular Temesh a tira 38 ponche den 31 inning. Den play-off Temesh a tira 17 inning pa Royal Scorpions. E rumor aki nos no a tende di dje, ta un dje grandinan di Wild Cats a duna nos a tep aki. Wild Cats kampion di Beisbòl Dòbel A di 2021 a la karga! Ekipo Marchena Braves ta kasi klá ku e ohochinan Alex i Alexander Henrietta i tin mas moveshon na kaminda. Santa Maria a firma Claycandy Hariquez. Nos a risibí pòtrèt kaminda Chado ta sinta huntu ku Claycandy i Claycandy ku pèn den man a kaba di firma. Ké mèn Claycandy pa Wild Cats i no Royal Scorpions.
