Entrevista ku
Edmar Cornelia manager di selekshon di Junior League Liga Pabou
WILLEMSTAD- Resientemente Liga Pabou a nombra su manager i coachnan pa dirigí selekshon pa play-off di Beisbòl Little League i Edmar ‘Boy Motor’ Cornelia a keda nombrá komo manager di Junior League. Extra a tene un entrevista ku Edmar Cornelia tokante su eksperensia den Little League komo hungadó i coach. Naturalmente nos a puntra di karera kompletu den deporte i mas detaye ken ta Boy Motor Cornelia. Boy Motor ta manager huntu ku Erwin Curial i Charly Merite di Junior League Pabou.
Edmar Cornelia mihó konosí komo Boy Motor Jr. (yu di Boy Motor tata) a nase na Kòrsou dia 15 di ougustus 1967. Boy ta biba na Kaya Loiseaux Maduro 18 (Jandoret), no ta kasá i tin 4 yu. Boy a hunga Beisbòl den organisashon Marchena for di Little League, ekipo Orange Crush i Senior League Zwitsal. Den Hubenil Edmar Cornelia a hunga den Royal Scorpions i Groot Kwartier Stars. Despues di algun aña den Dòbel A Boy Motor a opta pa hunga Sòftbòl so.
Edmar: “Ku Sòftbòl mi tabata biaha 4 pa 5 bia pa aña ku tur tim ku tabata sali foi Kòrsou pa reforsá ku mi bateo. Mi a bai Hulanda na 2000 i akinan mi a bai hunga Fastpitch den Survivors ku Sendley Reina. Aki nan mi a sali 2 aña siguí di 2 lugá den homerun i despues ma bai hunga pa Thamen ku Tuti Rumai, Enio Kwast ets ets. Aki tambe mi a sali 2 aña siguí di 2 lugá den homerun di Hulanda. Mi a kai foi mi promé aña den selekshon di Fastpitch ku tabata bou di Tuyu Mari. Mi a bai Italia, Chekoslovakia, Alemania, Belgika, Australia i Nueva Zeelandia. Nos a sali kampion di Europa na Chekoslovakia na 2003 i akinan nos mester a representá Hulanda na kampionato Mundial na Nueva Zeelandia na 2004."
KOMO COACH
“Dia ma kuminsá komo coach mi yu tabata hunga den Jandoret . Despues di un diferensia di opinion ku sr Cijntje nos a bai lanta nos mes organisashon ku yama Sint Michiel Sharks. E promé aña nos a sali kampion di Torneo Creme de la Creme i sigui despues pa esun di Vernon Isabella. Titulo nan ku mi tin komo coach ta di a gana tur e 3 torneonan importante di Kòrsou, esta torneo FABB, Vernon Isabella i Creme de la Creme. Logronan internashonal ta di a sali supkampion na Antigua i aña pasá di a bira kampion di Williamsport internashonal i supkampion di Mundu plus supkampion na Panama. Mi deseo ta di por bira skout un dia. Sigur ku si, pasobta nos tin hopi talento mes den Beisbòl. Mi mensahe komo coach ta na promé lugá pidi tur e bon hungadónan di Beisbòl Kòrsou di tur tempu ku ta full dediká na Liga 50, pa please bosonan adoptá un organisashon bou di boso brasanan. Pa no bai graf ku e konosementu di Beisbòl ku bosnan tin. Yuda nos muchanan ku tin hopi mester di esaki. Mensahe na nos muchanan, Beisbòl ta un wega di pashon i amor. Si bo no tin esakinan pe deporte, garantisá e no ta bai bon. Pues dediká na esaki i no laga pa e 2 biaha pa siman ei so ku bo ta train ku tim pa bo hasi algu. Na nos mayornan mi ké bisa ku no ta tur mucha por bira un ‘Jonathan Schoop, Kenley Jansen, Albies, Profar, òf Simmons”. Bo mes ta mira riba kua nivel bo yu ta, kompará ku e otronan. No forse bin vèlt tòg pasobra e kos no ta bai bira nada. Kaminda e por a hinka su tempu i energía den un deporte si ku e mes lo skohe i gusta.”
TRABOU
“Mi tin MTS Niveau Bouwkunde i mi ta traha pa FKP komo ‘Technisch Opzichter/ Uitvoerder. Ami ta enkargá ku tur proyekto di FKP di traha e kas-apartamentunan ku nos ta basha di beton. Mi a traha proyektonan grandi ku e sistema aki na Sapate i Montanja Abou. Awor aki preparando pa bai Tera Cora / Wechi”, Boy Motor Cornelia a terminá e entrevista.
