Ekipo Un Kara e presentá unifòrm nobo i premia hungadónan
WILLEMSTAD- E ekipo super kampion di Sòftbòl Femenino Veterano, ekipo Un Kara a presentá i batisá nan unifòrm nobo djasabra 20 di febrüari na Dupont riba Winston Churchillweg.
Tabata un habri aña ku tabata masha dia planiá, pero debí na medidanan a habri aña djasabra último. E ekipo a selebrá 7 aña di eksistensia tambe djasabra den presensia di spònser, hungadó i fanátikonan. Enid ‘Chichi’ Hooi, veteranísimo di kasi 70 aña di edat lo retirá for di Liga di Nos Tur ku ta un liga di 35+.
Chichi Hooi lo sigi move den Liga 50 i lo keda aktivo komo miembro di ekipo Un Kara. A premia vários hungadó ku a destaká, entre otro Nathaly Lourens, kampion bate, Carlientje Cleofa, kampion picher, Isonette Polonius lider di homerun i MVP. Un Kara a bari den premio temporada pasá den Liga di Nos Tur i a bira kampion pa di 3 aña sigí. Den 4 aña di Liga di Nos Tur ekipo Un Kara a bira kampion na 3 okashon.
