Ekipo Nos Goso a sera aña serka spònser Gai Lihe

WILLEMSTAD- Djasabra 11 di desèmber, ekipo Nos Goso a sera aña den ambiente serka nan spònser Gai Lihe.  Apesar ku Nos Goso no tabata aktivo riba tereno den 2021, a opta pa sera aña tòg. Mester bisa ku basta hungadó tabata aktivo den Tur Goso, organisashon 50+ di Nos Goso ku a hunga den 2021 den Liga Streanan di Ayera i bira supkampion.

Gai Lihe i kabayeronan ku a parti regalo.
Gai Lihe na palabra.
Hungadó ku a risibí pakete di Pasku serka Momon Martina.
Manager Saturnino ta risibí regalo.
Patsy Saturnino ta risibí pakete serka Johnny Isabella.
Sra. Maria ta risibí pakete.
Sr. Van der Veen ta risibí pakete.


Ekipo Nos Power  a parti unifòrm i sera aña

WILLEMSTAD – Siman pasá ekipo Nos Power a parti unifòrm i sera aña na un sitio soshal na Sun Valley. E ekipo no tabatin un bon aña riba tereno den 2021, pero a keda ku e tradishon di sera aña. E intenshon ta pa ‘regroup’ i presentá ku un ekipo muchu mas kompetitivo den 2022. Varios hungadó di nèt 60+ òf 59 aña a konfirmá nan presensia den 2022. Manager di e ekipo ta Roque Bernadina i Richard Albertsz ta Presidente. E ekipo ta di spònser pa hopi aña pa Mangusa Supermarket.

Hungadónan Oswaldo Eliza i Henry Wal ta pose unifòrm.
Hungadó i dirigentenan durante e entrega di unifòrm i sera aña.
Otmar Cadeau MC i tesorero di Nos Power Mangusa.

Junny Kock manager di Aruba Juniors a bai laga nos

WILLEMSTAD - Notisia tristu a drenta e siman aki ku un grandi di Sòftbòl Veterano 60+ na Aruba a bai sosegá. Ta trata aki Junny Kock ku a bai sosegá. Manager i un dje grandinan di ekipo Aruba Juniors. Junny Kock ta un dirigente hopi keri den 50+ i 60+. Práktikamente tur biaha di torneonan 50+ i 60+ e tabata na Kòrsou i pasa ratu alegre entre su amigunan, entre otro Feti Curie, Wimbert Hato i Rudy Brunken.  Djamars lo risibí bishita kondolensia, djarason ta entiero i lo tin algún hungadó di Kòrsou ku lo move pa Aruba.

Junny Kock ku duim ariba durante Kopa Himno i Bandera na aña 2015 na Kòrsou.

‍